17
Nathoz nak gab men lo jwanꞌ narax
1 Jesus nchab lo re xin' te'd Jesus:
—Tibka nzo jwanꞌ li sa gab men lo jwanꞌ narax, per ¡nalat nya men li gab ta men naꞌ lo jwanꞌ narax!
2 Mas jwin nda xaꞌ, tyobdoꞌ thi ke ntoꞌ men jwanꞌ yen xaꞌ nde yobi xaꞌ lenꞌ nittoꞌ, ke li xaꞌ gab ti men lo yalke.
3 Pkenap goꞌ lazoꞌ goꞌ.
ꞌꞌTez cho ta goꞌ mbli jwan' narax lo goꞌ; brez go' yek xaꞌ, tez zyeꞌ ak xaꞌ la' xa' jwan' narax, ptori'd go' yek go' jwanꞌ mbli xaꞌ lo goꞌ.
4 Nde teꞌnye gaz gob li xaꞌ jwan' narax lo goꞌ lenꞌ wiz, nde tez gaz gob nde xaꞌ lo goꞌ nde nye xaꞌ lo goꞌ: ꞌꞌNalitra nayꞌꞌ, ptori'd goꞌ yek go' jwan' mblino xa' go'.
Bli sa masra' li lazo' na' lu
5 Zyasa nchab re xin'te'd Jesus lo Jesus:
—Bli sa masra' li lazo' ná' lu.
6 Zyasa nchab Jesus:
—Tez ndli lazoꞌ goꞌ Dios, masa thi jwanꞌ lud xapa thi mbis mostaz, toyal gab goꞌ lo ya reꞌ: “Byiꞌb ncheꞌya nde btob lenꞌ nittoꞌ”, txoꞌbyeka goꞌ.
Xa ndablo li mos
7 Nde nchab Jesus:
Tez thi goꞌ ba ngeno thi mos, jwanꞌ penta mbere ngwa sinꞌ wan o ngwa kenap re maꞌ, leꞌ hor mbere xaꞌ lo sinꞌ, ¿Cho tab goꞌ lo xaꞌ: ꞌꞌPtob sa waa?"
8 Cheꞌla, gab goꞌ lo xaꞌ: ꞌꞌPtoxkwaꞌ jwanꞌ wa rzyeꞌn, pseꞌ xab la nde ptosaꞌ sa koa jwanꞌ wan nde jwanꞌ gun, senꞌ mne mdan seraꞌ waa nde gua.ꞌꞌ
9 ¿Nde cho mdaꞌ goꞌ dyux lo mos lo mbli mos re jwanꞌ mnebeꞌ goꞌ?, nda lazoꞌn namdaꞌd goꞌ dyux lo xaꞌ.
10 Taga' goꞌ, ngolo mbli goꞌ re jwanꞌ mnibeꞌ Dios lo goꞌ li go', zyasa gab goꞌ: ꞌꞌMos ngen cho jwis nak náꞌ, tak benꞌta mbli náꞌ sinꞌ, jwanꞌ mnibeꞌta xaꞌ lo náꞌ ndli náꞌ.ꞌꞌ
Jesus mtodanꞌ siꞌ xaꞌ ndyak ye's ya's
11 Laj ndo Jesus ned ndya Xaꞌ yez Jerusalen, ndariꞌd Xaꞌ xij xyon men Samaria nde xyon men Galilea.
12 Nde senꞌ ndozin Jesus thi yez lud, mbroꞌ siꞌ xaꞌ biꞌ ndyak ye's ya's lo Jesus, nde re xaꞌ ya tijraꞌ mbre xaꞌ,
13 mbrez yaj xaꞌ, nchab xaꞌ:
—¡Jesus, Maestr, blat lazoꞌa náꞌ!
14 Senꞌ mbwiꞌ Jesus re xaꞌ, nchab Jesus lo xaꞌ:
—Wa goꞌ sa wiꞌ nglweyꞌ goꞌ.
Nde laj ndo xaꞌ ned, mbyak xaꞌ nde mbyanꞌ nambi belꞌ xaꞌ lo yis ndyak xaꞌ.
15 Nde thib xaꞌ ya, senꞌ mne xaꞌ mbyak xaꞌ, mbere xaꞌ nde leꞌka ne mbrez xaꞌ nde mbli naro xaꞌ le Dios.
16 Nde mdoxub xaꞌ lo Jesus, axta mdinꞌ yek xaꞌ izyo, nde mdaꞌ xaꞌ dyux lo Jesus. Nde xaꞌ reꞌ, nak xaꞌ yez Samaria.
17 Zyasa nchab Jesus:
—¿Cho nakta siꞌ goꞌ jwanꞌ mbyanꞌ nambi belꞌ naꞌ nde mbyak lo yis? ¿Mbay ma thi yeꞌ xaꞌ sa?
18 ¿Cho benꞌta thib xaꞌ thiblada mbere nde linaro xaꞌ le Dios?
19 Zyasa nchab Jesus lo xaꞌ:
—Btoli nde bya; Tak mbli lazoꞌa Dios jwanꞌ na mbyak la.
Xamod ak senꞌ nyebeꞌ Dios
20 Zyasa re xaꞌ fariseo mnabdiꞌs lo Jesus, pol sin yalnyebeꞌ chanꞌ Dios, zyasa mkab Jesus lo xa':
— Yalnyebeꞌ chanꞌ Dios, na'aktey thi jwanꞌ toyal wi' reta mena sen' sina.
21 Ngen cho gab: ꞌꞌleꞌy ncheꞌyaꞌꞌ o ꞌꞌleꞌy ba", tak yalnyebeꞌ chanꞌ Dios ndola xij goꞌ.
22 Zyasa nchab Jesus lo re xin'te'd Jesus:
—Tsin wiz, sen' ncholaꞌs goꞌ wi' goꞌ thi wiz chanꞌ Xinꞌ Mbi, per naꞌwi'd goꞌy.
23 Nde ryoꞌ pla xaꞌ nye lo goꞌ: ꞌꞌLeꞌ Xaꞌ ndo ncheꞌyaꞌꞌ, o ꞌꞌle' Xa' ndo baꞌꞌ, per na'yad go' nde naꞌtyonked goꞌ xis xaꞌ.
24 Tak xaja ndloꞌ ncho xni belti dib lo be', taga' ak Xin' Mbi' senꞌ sin wiz yeꞌd Xa'.
25 Per ner nakinꞌ riꞌd Xa' bro toz yalti nde kotal re men nzi naya Xa'.
26 Ta xa ngok lenꞌ wiz senꞌ ngo Noe, taga' ak wiz senꞌ yeꞌd Xinꞌ Mbiꞌ.
27 Lenꞌ re wiz ya ncha xa' nde nchuꞌ xa', nselyaꞌ xa', nde ndaꞌ xa' xinꞌ got xa' sa selyaꞌr, axta mzin wiz senꞌ ngo Noe lenꞌ bark, nde mdobte nde nit toz tira, nde reta men mblux.
28 Nde taga' ngok lenꞌ re wiz ngo Lot: Re men ncha xaꞌ nchuꞌ xaꞌ, ndiꞌ xaꞌ nde nthoꞌ xaꞌ, ngo xaꞌ bin nde ntaꞌ xaꞌ yo.
29 Per wiz senꞌ mbroꞌte Lot yez Sodoma, mbroꞌ bel lo beꞌ xaja yike ba, nde mbluxa reta men yez Sodoma.
30 Nde taga' yotey lenꞌ wiz senꞌ ryotoꞌ Xinꞌ Mbiꞌ.
31 Wiz ya, xaꞌ jwanꞌ ndo yek yo, nalyad xa' ya xiꞌ xaꞌ chanꞌ xaꞌ nzi lenꞌ yo, nde re xaꞌ ndo len' wan naꞌbereda xaꞌ liz xa'.
32 ¡Ptelaꞌs goꞌ jwanꞌ ngote ngol Lot.
33 Xaꞌ jwanꞌ nkelo tolaꞌ yalnaban chanꞌ naꞌ, xaꞌ ya cheꞌ taꞌba, per xaꞌ jwanꞌ taꞌb yalnaban chanꞌ naꞌ lo ndli lazoꞌ xaꞌ na, xaꞌ ya cheꞌ tolaꞌy.
34 Nin lo goꞌ, yal' ya nzi yat chop xaꞌ lo ka, thib xaꞌ yoꞌ, nde tedib xaꞌ ba'.
35 Nde chop ngol thita nge yuꞌ, thib xaꞌ yoꞌ nde tedib xaꞌ baꞌ.
36 Nde chop xaꞌ biꞌ nge sinꞌ wan; thib xaꞌ yoꞌ nde tedib xaꞌ baꞌ.
37 Zyasa mnabdiꞌs re xin'te'd Jesus, nchab xa':
—¿Xaꞌ Nyebeꞌ, plo ak re jwanꞌ reꞌ?
Jesus mkab lo xaꞌ, nchab:
—Tenꞌ nax maꞌ nguj, tya ndyope re ngol.