4
Jesus kon ngol lo xyon Samaria
1 Re xaꞌ fariseo mbin xaꞌ, bro toz men nak xinꞌ teꞌd Jesus nde taja bro toz men ngole Jesus ke Juan.
2 Tenyega naꞌnakta Jesus ngole men, xinꞌ teꞌd Jesus ngole men.
3 Senꞌ mbin Jesus jwanꞌna, yaja mbroꞌ Jesus lo xyon Judea nde nda Xaꞌ lo xyon Galilea tedib gob.
4 Nde nakinꞌka rid Xaꞌ lo xyon Samaria.
5 Zya mzin xaꞌ ti yez ndole Sikar lo xyon Samaria, gax tenꞌ nax wan jwanꞌ mdaꞌyaꞌ Jakob lo xinꞌ xaꞌ José polaꞌ.
6 Nde tya ndob pos jwanꞌ ngok chanꞌ Jakob. Nde awizta mzan Jesus ndo Xaꞌ ned, yaja mdob Xaꞌ ro pos.
7 Tya mzin ti ngol xyon Samaria ndeloꞌ ngol nit, leꞌ Jesus nchab lo ngol:
—Btaꞌ lud nit gun.
8 Laja re xaꞌ nak xinꞌ teꞌd Jesus ndya yez, nda ka xaꞌ jwanꞌ wa xaꞌ.
9 Zyasa leꞌ ngol xyon Samaria nchab lo Jesus:
—¿Cho kwan liy lon nyaꞌb la nit gua nde men judí nak la, nde na nak ti ngol lo xyon Samaria?
(Ta nchab ngol, tak naꞌnzalꞌtad re xaꞌ judí kon re xaꞌ lo xyon Samaria.)
10 Leꞌ Jesus mkab, nchab Xaꞌ lo ngol:
—Tez yoloa jwanꞌ ntalaꞌs Dios, nde cho nak Xaꞌ ta ne loa: "ptaꞌ nit gun, lu jwan' nyaꞌb nit lo Xaꞌ nde ta' Xaꞌ nit naban gua.
11 Leꞌ ngol nchab:
— Naꞌngenod la jwanꞌ koꞌa nit, nde naꞌs toz pos. ¿Plo koꞌa nit naban sa?
12 ¿Cho mas ntak la ke lo Jakob xaꞌ gox lonꞌ ngo pola, xaꞌ jwan' mtanꞌ pos reꞌ lo náꞌ, ncheꞌ nguꞌ re xinꞌ xaꞌ nit nde re manꞌ xaꞌ?
13 Jesus mkab nde nchab Jesus lo ngol:
—Choja men nchuꞌ nit reꞌ, nche'k xaꞌ tedib gob;
14 Leꞌ xaꞌ gu nit jwan' tan lo xaꞌ, tiptane naꞌyektraꞌ lazoꞌ xaꞌ. Tak nit jwanꞌ tan gu xaꞌ, lenꞌ lazoꞌ xaꞌ ak tenꞌ tyob yalꞌ nit nde taꞌy yalnaban adiꞌ lo xaꞌ.
15 Leꞌ ngol nchab lo Jesus:
—Xa' Nyebe', ptaꞌ nit ya gun, sa naꞌyektraꞌ na, nekla yeꞌd loꞌn nit ncheꞌ.
16 Jesus nchab lo ngol:
—Wa chez salꞌ la sa yeꞌd rop goꞌ ncheꞌ.
17 Leꞌ ngol nchab:
—Naꞌngenot na salꞌ na.
Jesus nchab lo ngol:
—Galꞌka nea, naꞌngenod la salꞌ la;
18 tak gayꞌla xaꞌ biꞌ ndoyak salꞌ la, nde xaꞌ jwanꞌ ndobnoa naya naꞌnakte salꞌ la. Li jwanꞌ ta mdej la.
19 Leꞌ ngol nchab lo Jesus:
—Xa' Nyebe', ndyak na, lu nak ti profet.
20 Re xaꞌ gox lo náꞌ, xa' samaritan, yek yiꞌ reꞌ mbre xaꞌ mdaꞌ xa dyux lo Dios nde re goꞌ, men judí mbez Jerusalen tya ndablo taꞌ men dyux lo Dios.
21 Jesus nchab lo ngol:
—Bli lazoꞌa na ngol, mzin hor nekla yek yiꞌ reꞌ, nekla Jerusalén na'nakinꞌtra ya taꞌ goꞌ dyux lo Pay.
22 Naꞌnyed go' cho lo ndaꞌ goꞌ dyux, leꞌ náꞌ mne ná' cho lo ndaꞌ náꞌ dyux, tak Xaꞌ tolaꞌ men nde lo bin xa' judí.
23 Leꞌ hor ndosinla nde naya nak hor senꞌ re xaꞌ jwanꞌ liga ndaꞌ dyux lo Pay, taꞌ xaꞌ dyux lo Pay kon xbin xaꞌ xaga ndabloy; tak noga Pay, men ya nkwanꞌ Xaꞌ, men taꞌ dyux lo Xaꞌ.
24 Dios nak Xbi; nde men jwanꞌ ndaꞌ dyux lo Dios, ndablo li xaꞌy kon xbin xaꞌ jwanꞌ xa ncholaꞌs Dios.
25 Leꞌ ngol nchab lo Jesus:
—Mnen yeꞌd Xaꞌ telꞌ Dios (Xa' ndole Crist) —Nde senꞌ yeꞌd Xaꞌ, koꞌxkan Xaꞌ reta jwanꞌ lo náꞌ.
26 Jesus nchab:
—Na jwanꞌná, Xaꞌ ya ndotodiꞌsnoa reꞌ.
27 Zya mzin re xaꞌ nak xinꞌ teꞌd Jesus, nde nzoyen re xaꞌ tak mbwiꞌ xaꞌ ndotodiꞌsno Jesus ti ngol. Per nek thib xaꞌ nanabdiꞌsta lo Jesus, nyenꞌ cho kwanꞌ nyaꞌbdiꞌs Jesus lo ngol o cho kwan ndliy ndotodiꞌsno Jesus ngol.
28 Zyasa mblaꞌ ngol rén ngol, nde ngwa ngol yez, nchab ngol lo reta men:
29 —Deꞌ goꞌ, sa wiꞌ goꞌ tib mbiꞌ jwanꞌ mdej lon reta jwanꞌ nak na. ¿Cho naꞌnakta Xaꞌ reꞌ nak Crist?
30 Zyasa mbroꞌ re men lenꞌ yez, nda xaꞌ lo Jesus.
31 Laja leꞌ re xinꞌ teꞌd Jesus mnaꞌb xaꞌ lo Jesus, nchab xaꞌ:
—Maestr, waa lud.
32 Leꞌ Jesus nchab:
—Ngenon ti jwanꞌ wan, naka ti jwanꞌ naꞌnyed goꞌ.
33 Zyasa re xaꞌ nak xinꞌ teꞌd Jesus nchab xaꞌ lo ta xaꞌ:
—¿Cho nzo cho mbyeꞌdno jwanꞌ wa xaꞌ?
34 Jesus nchab lo xaꞌ:
—Leꞌ yalwa chanꞌ na nak lin re jwanꞌ ncholaꞌs Xaꞌ jwanꞌ mtelꞌ na, nde tolon rsinꞌ Xaꞌ.
35 Goꞌ mbez: “Ndaꞌb ti thap mbeꞌ sa dyop kosech”; leꞌ na ni lo goꞌ: Blit goꞌ lo goꞌ nde bwiꞌ goꞌ, leꞌ reta men ta ndeba nak xaꞌ xaja trig nzobinla nde ngoxoꞌbla beꞌ dyopa.
36 Nde xaꞌ jwanꞌ nthop kosech nchax nka xaꞌ, tak kosech jwan' nthop xaꞌ naka par yalnaban adiꞌ, sa xaꞌ jwanꞌ mblo bin thita nale yo lazoꞌ xaꞌ kon xaꞌ jwanꞌ mthop kosech.
37 Jwanꞌ nasa, liga jwanꞌ xa nchab diꞌs: “Xaꞌla men ngobin, nde xaꞌla men nthop kosech”
38 Na mtel goꞌ sa thop goꞌ cosech jwanꞌ namblobinta goꞌ, xaꞌla ti pla xaꞌ jwanꞌ mblobina nde goꞌ mbla lo rsinꞌ xaꞌ sa thop goꞌy.
39 Nde bro toz men lo xyon Samaria mbliꞌ lazoꞌ xaꞌ Jesus, por diꞌs jwanꞌ ndej ngol, tak nchab ngol: “Reta jwanꞌ mblin mdej Xaꞌ lon.”
40 Zyasa re xaꞌ lo xyon Samaria mbyeꞌd xaꞌ lo Jesus nde mnaꞌb xaꞌ sa yanꞌ Jesus tya kon xaꞌ. Nde mbyanꞌ Jesus tya chop wiz.
41 Nde masraꞌ bro men mbli lazoꞌ xaꞌ xkiꞌspa Jesus.
42 Nde nchab re xaꞌ lo ngol:
—Naya naꞌnakta benꞌta xkiꞌs la ndli lazoꞌ náꞌ, noga yub diꞌs ro Xaꞌ mbin ná', nde mne náꞌ Xaꞌ reꞌ lipa nak Xaꞌ ntolaꞌ men lo xken men, Xaꞌ nak Crist.
Jesus mtodaꞌn xinꞌ ti mbiꞌ ndli sinꞌ lo rey
43 Mbri'd chop wiz, Jesus mbroꞌ lo xyon Samaria nda Xaꞌ lo xyon Galilea.
44 Tak yub Jesus mdej ke ti profet tenꞌ nak las xaꞌ naꞌnxobyekta men xaꞌ.
45 Senꞌ mzin Jesus Galilea, re men yez ya ndyen xaꞌ mzin Jesus, tak mbwiꞌ xaꞌ re jwanꞌ mbli Jesus yez Jerusalén lo ni chanꞌ Pask; tak no re xaꞌ ya ngwa lo ni.
46 Senꞌ mbere Jesus tedib gob yez Caná lo xyon Galilea tenꞌ ta mbli Jesus yalnaro mblilal Xaꞌ nit ye nit ub. Tya nzo ti mbiꞌ jwanꞌ ndli sinꞌ lo rey, ngeno xaꞌ tib xinꞌ xaꞌ nayiz nzo yez Capernaum.
47 Mbiꞌ reꞌ, senꞌ mbin xaꞌ mbroꞌ Jesus lo xyon Judea nde mzin Jesus lo xyon Galilea, zya mbyeꞌd xaꞌ lo Jesus, mnaꞌb xaꞌ ya Jesus liz xaꞌ sa todanꞌ Jesus xinꞌ xaꞌ jwan' ndayajla.
48 Zyasa nchab Jesus lo xaꞌ:
—Tez naꞌngwiꞌd goꞌ re yalnaro nde re jwanꞌ ndloꞌn lo goꞌ, pa li lazoꞌ goꞌ na.
49 Leꞌ xaꞌ ta ndli sinꞌ lo rey, nchab xaꞌ:
—Pken goꞌ ndyanꞌ liz na, naya tera gaj xinꞌ na.
50 Leꞌ Jesus nchab lo mbiꞌ:
—Bya, mbyak la xinꞌ la.
Leꞌ mbiꞌ ya mbli lazoꞌ xaꞌ diꞌs nchab Jesus lo xaꞌ, nde ndya xaꞌ.
51 Senꞌ ndya xaꞌ, zya ngwaxiꞌned re mos xaꞌ, nde nchab mos lo xa:
—Seba mbyak la xinꞌ la.
52 Zyasa mnabdiꞌs xaꞌ lo mos:
—¿Cho hor ndobteꞌ ngo wen lazoꞌr?
Leꞌ mos nchab:
—Naꞌya hor thib bsyeba mbroꞌ xlyer.
53 Zyasa xaꞌ nak xud or mbyen xaꞌ, hor yaxa ta nchab Jesus lo xaꞌ: “Mbyak la xinꞌ la;” nde re liz xaꞌ mbli lazoꞌ xa' Jesus.
54 Jwanꞌ reꞌ nak mbrop yalnaroꞌ mbli Jesus, senꞌ mbere Xaꞌ ngwa Xaꞌ lo xyon Judea nde mzin Xaꞌ lo xyon Galilea.