2
Yalselyaꞌ ngo yez Caná
1 Ngok byon wiz, ngo ti yalselyaꞌ yez Caná lo xyon Galilea. Tya ndo xnaꞌ Jesus,
2 nde noga mbrez xaꞌ Jesus lo yalselyaꞌ kon re xinꞌ teꞌd Jesus.
3 Nde mbis nit ub, sa nchab xnaꞌ Jesus lo Jesus:
—Na'ngenotra xa' nit ub.
4 Leꞌ Jesus nchab:
—¿Cho kwan liy lon ta mbez la ngol? Teraꞌ sin hor chanꞌ na.
5 Leꞌ xnaꞌ Jesus nchab lo re men jwan' ndli sinꞌ tya:
—Bli goꞌ reta jwanꞌ nye Xaꞌ lo goꞌ.
6 Nde tya nzi xop yet nabiꞌ naksaꞌ ke, jwanꞌ ncho nit ndlirsinꞌ re xa' judí sa mbi xaꞌ lo Dios. Thiba yet ya ncho tap gal litr nit nde axta tib ayoꞌ litr nit nchoy.
7 Jesus nchab lo re xaꞌ ndli sinꞌ tya:
—Ptoseꞌ goꞌ re yet reꞌ kon nit.
Zyasa mtoseꞌlap xaꞌy.
8 Nde nchab Jesus lo xa':
—Bloꞌte goꞌ luda, nde beꞌ goꞌy lo xaꞌ nyebeꞌ lo ni.
Nde mbe' xaꞌy.
9 Senꞌ mbli beꞌ xaꞌ nyebeꞌ nit jwanꞌ ngolal nit ub nde nekla nye xaꞌ plo mbroꞌy, benꞌta re xaꞌ nzi li sinꞌ mney, tak re xaꞌ ya mtoseꞌ yet kon nit ye. Leꞌ xaꞌ ta ndonyebeꞌ mbrez xaꞌ mbyo ta ndoselyaꞌ ya.
10 Sa nchab xaꞌ lo mbyo:
—Reta lo ni nerla nit ub wen ndaꞌ xaꞌ nchuꞌ men nde senꞌ jwanꞌ toz la nda yuꞌ mena, zyaraꞌ sa ngiꞌd xaꞌ nit ub jwanꞌ beja ntak. Leꞌ lu sa cheꞌla mblosaꞌa nit ub wen nde axta naya ndoyiꞌd lay.
11 Jwanꞌ reꞌ nak yalnaro ner mbli Jesus yez Caná lo xyon Galilea, mbloꞌ Xaꞌ yalnaro chanꞌ Xaꞌ, nde re xinꞌ teꞌd Jesus mbli lazoꞌ xaꞌ Jesus.
12 Senꞌ mne jwanꞌ reꞌ, Jesus nda yez Capernaum, kon xnaꞌ Xaꞌ, re wes Xaꞌ nde kon re xinꞌ teꞌd Xaꞌ, nde plata wiz mbled xaꞌ tya.
Jesus mtombi yodoꞌ
(Mt. 21:12-13; Mr. 11:15-18; Lc. 19:45-46)
13 Senꞌ ndosin gaxla ni pask chanꞌ re xaꞌ judí, zya ngwap Jesus yez Jerusalén.
14 Nde tenꞌ nak yodoꞌ tya ngosiꞌb Jesus nzi ntho xa' ngon, mbakxilꞌ nde palom, nde noga re xaꞌ jwanꞌ nzilꞌ tmi nzi ndob tya.
15 Zyasa mtek Jesus ti doꞌ xa ti bins nde mbloꞌte Jesus reta men le, tagaꞌ mbloꞌte Jesus re mbakxilꞌ nde re ngon ta nzi tho xaꞌ, nde mchaꞌs Jesus tmin re xaꞌ nzilꞌ tmi nde mtub Jesus re mes xaꞌ.
16 Nde nchab Jesus lo re xaꞌ ntho palom:
—¡Bloꞌte goꞌ reta chenꞌ goꞌ ba ncheꞌ! ¡Naꞌlilalta goꞌ liz Xud na yo ncho xbiꞌ!
17 Zyasa re xaꞌ nak xinꞌ teꞌd Jesus mteꞌlaꞌs xaꞌ jwanꞌ nchab lo xkiꞌs Dios: “Yalno jwan' ngenon liz la, li gaj na.”
18 Re xaꞌ judí xaꞌ nak sinꞌ mnabdiꞌs lo Jesus, nchab xaꞌ:
—¿Cho yalnaro loꞌa lo náꞌ sa nye náꞌ ngenoa yalnyebeꞌ lia jwanꞌ reꞌ?
19 Jesus mkab lo xaꞌ, nchab Jesus:
—Psil goꞌ yodoꞌ reꞌ nde lenꞌ son wiz bere toxkwan diba.
20 Leꞌ re xaꞌ judí xaꞌ nak sinꞌ mkab, nchab xaꞌ lo Jesus:
—Choꞌbxop linꞌ mtaꞌ xaꞌ yodoꞌ reꞌ, nde lu mbez, lenꞌ sonta wiz bere toxkwaꞌa diba.
21 Leꞌ Jesus ndotej yodoꞌ jwanꞌ nak leꞌga Jesus.
22 Jwanꞌ nasa, senꞌ lo mbroꞌxban Jesus xij re men nguj, re xaꞌ nak xinꞌ teꞌd Jesus mteꞌlaꞌs xaꞌ diꞌs ta nchab Jesus, nde mbli lazoꞌ xaꞌ xkiꞌs Dios nde mbli lazoꞌ xaꞌ diꞌs ta mdej Jesus.
Nzolo Jesus lazoꞌ reta men
23 Laj benꞌ ngete Jesus yez Jerusalén lenꞌ ni chanꞌ Pask, bro toz men mbli lazoꞌ xaꞌ Jesus, tak ngwiꞌ xaꞌ re yalnaro ndli Jesus.
24 Per naꞌndlid lazoꞌ Jesus re men, tak nzolo Jesus xgab ndono re men.
25 Nde naꞌnakinꞌta Jesus choraꞌ tej nyenꞌ xomod nak men, tak nzolola Xaꞌ xgab nzo lazoꞌ men.