16
1 ’Reta jwanꞌ reꞌ mdej na lo goꞌ sa nayod thi jwan' li cheb go'.
2 Tak kote xaꞌ goꞌ lenꞌ yo tenꞌ ndyop men Israel nde sin wiz choja mena kuj xaꞌ goꞌ, nde li xa' xgab sin' wen ngeli xa' lo Dios.
3 Nde jwanꞌ reꞌ lino xa' go' tak naꞌnzolod xaꞌ Pay, nekla nzolo xaꞌ na.
4 Per nin re jwanꞌ reꞌ lo goꞌ, sa sen' sin wiz ya, teꞌlaꞌs goꞌ mdejla na jwanꞌ reꞌ lo goꞌ.
Jwanꞌ ndli Mbi Nayon
’Naꞌmdejta na jwanꞌ reꞌ lo goꞌ neraꞌ, tak zya ngetenon goꞌ.
5 Leꞌ naya ndyan lo Xaꞌ jwanꞌ mtelꞌ na, nde nek thib goꞌ naꞌnyabdiꞌsta lon: "¿Plo ndyaa?"
6 Cheꞌla, nabil ngo lazoꞌ goꞌ tak nin re jwanꞌ reꞌ lo goꞌ.
7 Nde kwent lí ndotan lo goꞌ: Mas wen naka lo goꞌ ta ndyan, tak tez naꞌyat na, naꞌyeta Xaꞌ liben go' nde la'sto go', nde tez lenꞌ ndya, tel na Xaꞌ.
8 Nde senꞌ sin Xa', ko Xaꞌ yek re men nzi lo izyo, cho men nzoꞌb xkena', cho nambi ndo nde cho xis nzo'b yalnayi' chan' Dios.
9 ¿Cho xa' nzo'b xken na? re xa' jwan' naꞌndlid lazon' na,
10 ¿cho nambi ndo? Na nambi ndo, tak leꞌn ndya lo Xud na nde naꞌwitra goꞌ na;
11 ¿cho xis nzo'bla yalnayi' chan' Dios? xis xaꞌ jwanꞌ nyebeꞌ lo izyo re'y, xa' jwan' nchabla Dios jwan' yote.
12 "Tata jwanꞌ tozraꞌ nzo tej na lo goꞌ, per naya naꞌlitra' goꞌ gan yen goꞌy.
13 Leꞌ senꞌ yeꞌd Mbi Nayon Xaꞌ nak lí nde koned Xaꞌ goꞌ lo jwanꞌ lí; tak naꞌtodiꞌsta Xaꞌ leꞌga kwent chanꞌ Xaꞌ, leꞌ Xaꞌ todiꞌs re jwanꞌ nchon Xaꞌ, nde loꞌ Xaꞌ lo goꞌ reta jwanꞌ nara ak.
14 Xa' ya li naro na, tak Xa' kaya' jwan' nak chan' na nde koxo'b Xa'y lo go'.
15 Reta jwanꞌ ngeno Xud na, naka chanꞌ na, jwanꞌ nasa mbez na lo goꞌ, kaya' Xa' jwan' nak chan' na nde koxo'b Xa'y lo go'.
Yalnabil yolala yalnale
16 "Tudla ndaꞌb naꞌwitra' goꞌ na, nde tud yoloxaba twiꞌ goꞌ na tedib gob, tak leꞌn ndya lo Xud na".
17 Zyasa pla xinꞌ teꞌd Jesus nchab lo ta xaꞌ:
—¿Xamod nak jwanꞌ ta ne Xa' lon': Tudla ndaꞌb naꞌwitra' goꞌ na nde tud yoloxaba twiꞌ goꞌ na tedib gob, tak leꞌn ndya lo Xud na?
18 ¿Xamod nak jwanꞌ ta mbez Xaꞌ: “Tudla ndaꞌb”? Naꞌyenta naꞌ jwanꞌ ne Xaꞌ.
19 Zyasa mnela Jesus, leꞌ re xinꞌ teꞌd Jesus ncholaꞌs xa' nyaꞌbdiꞌs xa' lo Jesus, jwanꞌ nasa ner Jesus nchab lo xaꞌ:
—¿Goꞌ nyaꞌbdiꞌs lo ta goꞌ jwanꞌ ta mbez na lo goꞌ: Tudla ndaꞌb naꞌwitra goꞌ na, nde tud yoloxaba twiꞌ goꞌ na tedib gob.
20 Nipa na lo goꞌ, tonꞌ goꞌ nde tonabil lazoꞌ goꞌ, nde le' re men lo izyo che' lyen xaꞌ. Nde tenyega nabil yo lazoꞌ goꞌ, leꞌ yalnabil chanꞌ goꞌ yolala yalnale.
21 Thi men got sen' ryoꞌke xaꞌ, nzi'b yo'b lo xa' tak mzin be' gal xin' xa', leꞌ senꞌ ngola mbed, naꞌtetra lazoꞌ xaꞌ re yoꞌb tak ndyen toz xaꞌ mzin ti mbed lo izyo.
22 Tagaꞌ goꞌ naya, nabil nzo lazoꞌ goꞌ; per senꞌ yeꞌdtwiꞌn goꞌ tedib gob, zyasa nale toz yo lazoꞌ goꞌ nde ngenta cho kib yalnale ya lazoꞌ goꞌ.
23 ’Senꞌ sin wiz ya, ngentraꞌ kwan nyaꞌbdiꞌs goꞌ lon. Nipa na lo go', reta jwanꞌ nyaꞌb goꞌ lo Xud na lo len, Xaꞌ taꞌy.
24 Axta naya nek thib jwanꞌ tera nyaꞌb goꞌ lo len; mnaꞌb goꞌy, nde kayaꞌ goꞌy, sa yonale toz tir lazo' reta goꞌ.
Jesucrist nak Xaꞌ mbli gan
25 ’Reta jwanꞌ reꞌ mdej na lo goꞌ kon di's nagan; nde tzin wiz senꞌ naꞌtejta nay lo goꞌ kon diꞌs naga yen men, zyasa galꞌ tej na kwent chanꞌ Pay lo go'.
26 Le' wiz ya nyaꞌb go' lo len, nde na'nakintra' na nya'b lo Pay por go',
27 yub Pay nkeꞌ lazoꞌ Xaꞌ goꞌ, tak goꞌ nkeꞌ lazoꞌ goꞌ na nde ndli lazoꞌ goꞌ leꞌ na mbroꞌ lo Dios.
28 Mbroꞌn lo Pay, nde ndal na lo izyo, tedib gob lan izyo, nde ndyan lo Pay.
29 Zyasa nchab re xinꞌ teꞌd Xaꞌ lo Xaꞌ:
—¡Naya nambi tir ndyodiꞌs la, naꞌmdejta luy kon diꞌs nagan yen men!
30 Naya mbyenla náꞌ, ke mnela lu reta jwanꞌ, naꞌnakinꞌta lu nyaꞌbdiꞌs men loa, jwanꞌ nasa ndli lazoꞌ náꞌ leꞌ lu mbro' lo Dios.
31 Jesus mkab lo xaꞌ:
—¿Cho naya ndli lazoꞌ goꞌ na?
32 ¡Naya msinla wiz, nde seba mzinley, leꞌ goꞌ ryaꞌs, thiba goꞌ tyen xned goꞌ nde laꞌ goꞌ thib na! Per nandod tib na, tak Pay ndono na.
33 Reta jwanꞌ reꞌ mdej na lo goꞌ, sa kon na keno go' yalnabez. Lo izyo rid goꞌ yalti; per blipa lazoꞌ goꞌ na, na mbli gan lo re jwan' narax lo izyo.