14
Jesus nak ned zin men lo Dios
1 ’Nazye'd xgab goꞌ, thibla ptob xgab goꞌ lo Dios, noga ptob xgab goꞌ kon na.
2 Liz Xud na jwan' toz nzo tenꞌ yo men; tez natada naka, chen seba mdejla nay lo goꞌ, ndyan, sa ndebektsa'n tenꞌ yo goꞌ.
3 Nde tes ndyan nde kwektsa'n tenꞌ yo goꞌ, beren tedib gob, nde le'ga na wen go, sa tenꞌ yon tyagaꞌ yo goꞌ.
4 Mnea goꞌ plo ndan nde nzolo goꞌ ned.
5 Leꞌ Max nchab lo Jesus:
—Xaꞌ Nyebeꞌ, naꞌnyed náꞌ plo ndaa, ¿Xomod, li ná' gan, nye náꞌ plo nda ned?
6 Jesus nchab lo xa':
—Na nak ned, na nak lipa, nde na nak yalnaban; ngen cho sin lo Pay, tez na'nakte por na.
7 Tez ngolo goꞌ na, noga Pay talo go', nde xata naya nzolo goꞌ Xaꞌ nde mbwiꞌ goꞌ Xaꞌ.
8 Le' Blib nchab lo Xa':
—Xaꞌ Nyebeꞌ, bloꞌ Pay lo náꞌ sa mbli lazoꞌ náꞌ.
9 Jesus nchab:
—¿Plopa ndatela ndonon goꞌ, nde teraꞌ yoloa na Blib? Men jwanꞌ mbwiꞌla na, mbwiꞌla xaꞌ Pay; ¿Cho kwan liy sa mbez la: Bloꞌ Pay lo náꞌ?
10 ¿Cho naꞌndlid lazoꞌa, na ndono Pay nde Pay ndono na? Re diꞌs jwanꞌ ndyodiꞌs na, naꞌndyodi'sta nay por kwent chan' na, che'la Pay jwanꞌ nzo ban lenꞌ lazoꞌn, Xaꞌ ndli reta jwa' mbwi' go' mblin.
11 Bli lazoꞌ goꞌ leꞌ na ndono Pay, nde Pay ndono na; tezka nandlid lazo' go'y, bli lazo' go' na por re jwan' ta mbwi' go' ngok.
12 Gal' di's nipa na lo go': Men ndli lazonꞌ na, reta jwan' ta mblin, noga xa' ya tak liy, nde mas naro jwanꞌ li xaꞌ, tak na ndya lo Pay.
13 Nde reta jwanꞌ nyaꞌb goꞌ lo Pay lo len, na liy, sa ak naro Pay por Xin' Xa'.
14 Tez nzo kwan nyaꞌb goꞌ lo len, na liy.
Jesus mkeꞌyek telꞌ Mbi Nayon
15 ’Tez nkeꞌ lazoꞌ goꞌ na, bxobyek goꞌ re yalnyebeꞌ chanꞌ na.
16 Nde na nyaꞌb lo Pay, sa Xaꞌ ta' tedib Xaꞌ li ben go' nde la'sto go', Xaꞌ ya tyono goꞌ thiptane:
17 Le' Xbi ndlo' jwan' gal', re men lo izyo naꞌlid men gan kayaꞌ men Xa', tak nangwiꞌd men Xa', nekla ncholo men Xa', per goꞌ, nzolo goꞌ Xa', tak nzono go' Xa' nde tyono Xa' go'.
18 Naꞌtanptyabta na goꞌ, tberen lo goꞌ.
19 Nda'b tiplata wiz, re men lo izyo nawiꞌtra xaꞌ na, per goꞌ twiꞌ goꞌ na, tak na naban na, noga goꞌ tban goꞌ.
20 Senꞌ sin wiz ya, yolo goꞌ leꞌ na ndono Pay, nde goꞌ ndono na, nde na ndono goꞌ.
21 Xaꞌ jwan' nkaya' re yalnyebeꞌ chanꞌ na, nde nxobyek xaꞌy, xaꞌ ya nkeꞌ lazonꞌ na. Nde xaꞌ jwanꞌ nkeꞌ lazonꞌ na, keꞌ lazoꞌ Pay xaꞌ nde noga na keꞌ lazoꞌn xaꞌ nde ryoꞌton lo xa'.
22 Nchab Judas, (xa' naꞌnakte Iscariote):
—Xaꞌ Nyebeꞌ, ¿Cho kwan liy sa benꞌta lo náꞌ ryoꞌtoa nde naꞌryotot la lo reta men lo izyo?
23 Mkab Jesus nde nchab Xaꞌ:
—Men jwanꞌ nkeꞌ lazonꞌ na, xkiꞌs na xo'byek xaꞌ nde keꞌ lazoꞌ Pay xaꞌ, nde rop náꞌ yeꞌd lo xa' nde yono náꞌ xaꞌ.
24 Leꞌ xaꞌ jwanꞌ nankeꞌd lazonꞌ na, nanxobyekta xaꞌ xkiꞌs na. Nde re diꞌs jwanꞌ mbin goꞌ, naꞌnakte xkiꞌs na, che'la xkiꞌs pay naka, Xaꞌ ta mtelꞌ na.
25 ’Ndej na re jwan' re' lo goꞌ na ta benꞌ ndon xij goꞌ.
26 Leꞌ Xaꞌ jwan' liben goꞌ nde la'sto go', Xa' nak Mbi Nayon, Xa' ta telꞌ Xud na lo len, Xaꞌ loꞌ reta jwanꞌ lo goꞌ nde Xaꞌ te'la's lo goꞌ reta jwanꞌ ta mdej na lo goꞌ reꞌ.
27 ’Yalnabeꞌz tanon goꞌ, yalnabeꞌz chanꞌ na tan lo goꞌ, naꞌtat nay lo goꞌ jwanꞌ xa ndaꞌ re men lo izyo reꞌy. Naꞌakropta xgab goꞌ, nekla zyeb goꞌ.
28 Mbinla goꞌ ta nin lo goꞌ: Ndyan, nde bere yal na lo goꞌ. Tez liga nkeꞌ lazoꞌ goꞌ na, ndablo nale ngo lazoꞌ goꞌ, tak nia na lo goꞌ leꞌn bere lo Pay; tak Pay nak Xaꞌ ro lon.
29 Nde naya axnia nay lo go' nal tera' aka, sa senꞌ lo aka, tli lazoꞌ goꞌy.
30 ’Naꞌyentra todi's na masra' jwan' lo goꞌ, tak ndosin gaxla xa' nyebeꞌ lo izyo re', nde naꞌnyebeꞌd xa' ya lon.
31 Ta sa nye re men lo izyo nkeꞌ lazoꞌn Pay, nde xa mnabe' Pay lon ta mbli ney. Ptoli goꞌ, yaꞌ goꞌ ndanꞌ.