11
Nguj Lázaro
1 Nzo ti mbiꞌ nayiz ndole Lazáro. Leꞌ xaꞌ nzo yez Betania kon Marí nde Mart ptanꞌ xaꞌ.
2 Marí ptan' Lazáro ta nayiza, ngol re' ta mdaꞌb nit naxeꞌ xis ni Xaꞌ Nyebeꞌ nde kon yis yek ngol mkwiꞌs ngol ni Xaꞌ.
3 Zyasa mtelꞌ rop bel ngol diꞌs lo Jesus, nchab ngol:
—Xaꞌ Nyebeꞌ, nayiz xaꞌ ta nkeꞌ toz lazoꞌa ya.
4 Senꞌ mbin Jesus jwanꞌna, nchab Jesus:
—Yiz reꞌ naꞌnakte sa gaj xaꞌ, leꞌy loꞌ yalnaro chan Dios. nde loꞌy yalnaroꞌ chanꞌ Xin Dios.
5 Nde nkeꞌ toz lazoꞌ Jesus Mart, Marí nde Lázaro,
6 senꞌ mbin Jesus nayiz Lázaro, benꞌ mbled Jesus ti chop wiz tenꞌ ngetega Xaꞌ.
7 Nde senꞌ ngolo rop wiz ya, zya nchab Jesus lo re xinꞌ teꞌd Xaꞌ:
—Ndanꞌ lo xyon Judea tedib gob.
8 Leꞌ re xinꞌ teꞌd Xaꞌ nchab lo Xaꞌ:
—Maestr, cho naꞌngwid la, tya leꞌ re xaꞌ judí ncholaꞌs xaꞌ gadke xaꞌ lu, ¿nde bere ndaa tya tedib gob?
9 Leꞌ Jesus mkab lo xaꞌ:
—¿Cho nangenoda wiz tib sen hor? Men jwan' ngete ndlyabe, nachepta men, tak xni wiꞌs ntoxni lo men;
10 per xaꞌ jwanꞌ ngete yalꞌ, ncheb xaꞌ, tak naꞌndod xaꞌ lo xni.
11 Senꞌ mne nchab Jesus jwanꞌ reꞌ, zya bere nchab Jesus lo xaꞌ tedib gob:
—Naxyat Lázaro xa' nsal'tan'; per ndan sa goxkalꞌ na xaꞌ.
12 Leꞌ re xinꞌ teꞌd Jesus nchab:
—Xaꞌ Nyebeꞌ, tezka naxyat xaꞌ, tyak xaꞌ.
13 Nde leꞌ Jesus ndej liga nguj Lázaro; per re xinꞌ teꞌd Jesus mbli xa' xgab benꞌta naxyat Lázaro.
14 Zyasa galꞌ nchab Jesus lo xaꞌ:
—Nguj Lazaro.
15 Nde nale nzo lazoꞌn por go' tak naꞌndot na tya, nde mas jwina par goꞌ sa toyal li lazoꞌ goꞌ na, naya ndanꞌ tenꞌ nax xaꞌ.
16 Leꞌ Max, xaꞌ ni men Kwach, nchab xaꞌ lo ta teꞌd xaꞌ:
—Ndankenꞌ xis Jesus, sa thita gaj naꞌ kon Xaꞌ.
Jesus nak yalryoxban nde yalnaban
17 Senꞌ mzin Jesus, zya ngokla thap wiz ndate mbwaꞌs Lázaro.
18 Leꞌ yez Betania gax naxa cho yez Jerusalén, nzoy masraꞌ chop mil narol metr.
19 Nde bro toz xaꞌ judí nda lo nale xaꞌ lazoꞌ Mart nde Marí lo ta nguj ptanꞌ xaꞌ.
20 Senꞌ lo mbin Mart ndozinla Jesus, zya ngwaxi' ned Mart Jesus; leꞌ Marí mbyanꞌ yo.
21 Zyasa nchab Mart lo Jesus:
—Xaꞌ Nyebeꞌ, ngaka ndoa ncheꞌ, naꞌngajta ptanꞌ na.
22 Nde naya mnen, reta jwanꞌ nyaꞌb la lo Dios, Dios taꞌy loa.
23 Jesus nchab lo Mart:
—Leꞌ ptanꞌ la ryoꞌxban.
24 Mart mkab lo Jesus:
—Mnen troꞌxbanka xaꞌ senꞌ ryoꞌxban reta xaꞌ nguj lo yoxo'b wiz blus jwan'.
25 Jesus nchab lo Mart:
—Na ngoꞌxban men nde na nda yalnaban; men jwanꞌ li lazonꞌ na, tenye ngujla xaꞌ, tban xaꞌ.
26 Nde reta men jwanꞌ naban nde ndli lazoꞌ xaꞌ na, xaꞌ ya naꞌgajta. ¿Cho ndli lazoꞌa jwanꞌ reꞌ?
27 Mart nchab:
—Ta naka Xaꞌ Nyebeꞌ, ndli lazoꞌn leꞌ lu nak Crist, Xinꞌ Dios, Xaꞌ nakwentla yeꞌd lo izyoꞌ.
Jesus nchonꞌ ro banꞌ Lázaro
28 Senꞌ ngolo nchab Mart jwan' re', zya ngwaxiꞌ Mart Marí nde nagaꞌsta nchab Mart lo Marí:
—Leꞌ Maestr ndo ncheꞌ nde ngebez Xaꞌ lu.
29 Senꞌ mbin Marí jwanꞌna, naxax toz mdoli Marí nde nda Marí lo Jesus.
30 Leꞌ Jesus teraꞌ yote Xaꞌ lenꞌ yez, benꞌ ndo Xaꞌ ned tenꞌ ngoxi' ned Mart Xaꞌ.
31 Leꞌ re xaꞌ judí ta nzi liz Marí nde nziliben xa' Marí, senꞌ lo mbwiꞌ xaꞌ naxax mdoli Marí nde mbroꞌte Marí le, zyasa mdonke re xaꞌ xisa, tak mbli xa' xgab, ro baꞌ ndayonꞌ Marí.
32 Senꞌ mzin Marí lo Jesus, zya mdoxub Marí lo ni Jesus, nchab Marí:
—Xaꞌ Nyebeꞌ, tez ngaka ndoa ncheꞌ, naꞌngajta ptanꞌ na.
33 Senꞌ mbwiꞌ Jesus nchonꞌ Marí nde noga re xaꞌ judí ta nzi li ben rop bel ngol nchonꞌ re xaꞌ, zyasa dib Xaꞌ mden'na nde mbra'syo'b Xa',
34 sa nchab Jesus lo xaꞌ:
—¿Plo mkaꞌs goꞌ xaꞌ?
Leꞌ re xaꞌ nchab:
—Xaꞌ Nyebeꞌ, deꞌ sa wiꞌa ploy.
35 Nde mbinꞌ Jesus.
36 Zyasa nchab re xaꞌ judí:
—¡Bwiꞌ goꞌ, plopa nkeꞌ lazoꞌ Xaꞌ Lázaro!
37 Leꞌ tipla xaꞌ nchab:
—Xaꞌ reꞌ mbli mbwiꞌ mbiꞌ ta nkow lonꞌ ya, ¿Cho naꞌngakta ndli Xaꞌ ti jwanꞌ sa naꞌngajta Lázaro?
Mbroꞌxban Lázaro
38 Zyasa nabil toz ngo lazoꞌ Jesus tedib gob, mbike Jesus gax ro baꞌ. Leꞌ baꞌ naka ti yer lad ke nde tagaꞌ kon ti ke nowꞌa.
39 Leꞌ Jesus nchab lo xaꞌ:
—Pkib goꞌ ke.
Leꞌ Mart ptanꞌ thabol, nchab:
—Xaꞌ Nyebeꞌ, nakapla ndyaꞌ xaꞌ, tak ndatela tap wiz nguj xaꞌ.
40 Jesus nchab:
—¿Cho naꞌnit na loa, tez tli lazoꞌa, twiꞌa yalnaro chanꞌ Dios?
41 Zyasa mkib xaꞌ ke nowꞌ ro baꞌ tenꞌ mkaꞌs xaꞌ thabol. Leꞌ Jesus mbwiꞌ lo beꞌ nde nchab Jesus:
—Xud na, ndan dyux loa tak mbin la xkiꞌs na.
42 Nde mnea na, lu thibla nchon la xkiꞌs na; per mbez na jwanꞌ reꞌ loa por re men ta nzi ncheꞌ, sa li lazoꞌ xaꞌ leꞌ lu mtelꞌ na.
43 Senꞌ ngolo ta nchab Jesus lo Dios, zya ne mbrez Jesus, nchab Xaꞌ:
—¡Lázaro, deꞌ le reꞌ!
44 Zyasa leꞌ xaꞌ ta nguja, mbroꞌte xaꞌ lenꞌ baꞌ, nachal lar yaꞌ xaꞌ, ni xaꞌ nde dib lo xaꞌ. Jesus nchab:
—Pkib goꞌ lar ta nachal xaꞌ, nde ptaꞌ goꞌ diꞌs ya xaꞌ.
Ngok di's re men kuj xaꞌ Jesus
(Mt. 26:1-5; Mr. 14:1-2; Lc. 22:1-2)
45 Zyasa bro toz re xaꞌ judí, xaꞌ jwanꞌ mblo nale lazoꞌ rop bel Marí, mbli lazoꞌ xaꞌ Jesus tak mbwiꞌ xaꞌ jwanꞌ mbli Jesus.
46 Per pla xaꞌ nzo xija, ngwaꞌ xaꞌ lo re xaꞌ nak fariseo nde mdej xaꞌ jwanꞌ mbli Jesus.
47 Zyasa re ngwleyꞌ jwanꞌ nyebeꞌ nde re xaꞌ fariseo mthop xaꞌ re men nak sinꞌ lo yez Israel, nde nchab xaꞌ:
—¿Cho kwan linꞌ? Tak mbiꞌ reꞌ jwanꞌ toz ndli Xa' re yalnaro.
48 Tez tatka tanꞌ diꞌs, reta men ndoli lazoꞌ men Xaꞌ; nde tyeꞌd re xaꞌ yez Rom tolu'x xaꞌ yodonꞌ náꞌ nde yez náꞌ.
49 Zyasa ti xaꞌ nzo xija ndole Caifás, xaꞌ jwanꞌ nak mbol ngwleyꞌ ro lenꞌ linꞌ ya, nchab xaꞌ:
—Ngen kwan mne goꞌ ba,
50 neka ndli goꞌ xgab, yalwen naka lonꞌ thipta mbiꞌ gaj por dib yez, ke reta men yez gaj.
51 Diꞌs reꞌ naꞌngolte yek Caifás nde leꞌ xaꞌ nak mbol ngwleyꞌ ro lenꞌ linꞌ ya, jwanꞌ nasa Dios mni lo xaꞌ sa tej xaꞌ lo men leꞌ Jesus gaj por reta men yez.
52 Nde naꞌnakte benꞌta por reta men yez judi, noga sa thipta dyop re men nak xinꞌ Dios, re xaꞌ jwanꞌ ngetendraꞌs.
53 Nde xata wiz ya, mbyanꞌdiꞌs re xaꞌ nak sinꞌ lo men judí sa kuj xaꞌ Jesus.
54 Jwanꞌ nasa, nangetetra Jesus dibxlaꞌs xij re men judí, mbroꞌte Xaꞌ lo xyon Judea nde nda Xaꞌ gax izyo biz, tenꞌ nax ti yez ndole Efraín. Tya mbyanꞌ Jesus kon re xinꞌ teꞌd Xaꞌ.
55 Nde ndoyenla pask, ni chanꞌ re xaꞌ judí; nde bro toz re men nzo yez, mbya xaꞌ Jerusalén senꞌ tera gal ni chanꞌ pask sa tombi lazoꞌ xaꞌ.
56 Nkwanꞌ xaꞌ Jesus, lo nzi xaꞌ yodoꞌ nyabdiꞌs xaꞌ lo ta xaꞌ, nchab xaꞌ:
—¿Cho xgab ndli goꞌ? ¿Cho nayeꞌdta Jesus lo ni?
57 Nde re ngwleyꞌ jwanꞌ nyebeꞌ nde re xaꞌ fariseo, mnabeꞌ xaꞌ, tez cho men nye plo ngete Jesus, tej xaꞌy sa yaxen xaꞌ Jesus.