Yeꞌs jwanꞌ mkeꞌ Santiag
1
Dyux chanꞌ Santiag
1 Na, Santiag, nkeꞌn rsinꞌ Dios nde rsinꞌ Jesucrist Xaꞌ Nyebeꞌ. Dios li leyꞌ re tib sen bin men Israel, re xaꞌ jwanꞌ mbryaꞌs dib lo izyo.
Yalnchak jwanꞌ ndaꞌ Dios
2 Reta goꞌ wes na, blo nale lazoꞌ goꞌ senꞌ lo rid goꞌ chojaꞌ re yalti.
3 Tak mnela goꞌ senꞌ lo ndlipa lazoꞌ goꞌ Dios, zya nde yalti, bxek goꞌ lo yalti, tamod sa xyen goꞌ.
4 Nde senꞌ mxek goꞌ lo yalti, sa ak goꞌ men ndosaꞌ, men ngol xgab naꞌ, nde reta jwanꞌ tsal li goꞌy.
5 Nde tez cho goꞌ nangenoda yalnchak, mnaꞌb goꞌy lo Dios, Xaꞌ ndaꞌ bro toza lo reta men jwanꞌ nyaꞌba, nde nambezked Xaꞌy lo ndaꞌ Xaꞌy.
6 Senꞌ lo nyaꞌb goꞌy, blipa lazoꞌ goꞌ Dios nde tamod sa taꞌ Xaꞌy, naꞌakropta xgab goꞌ, tak men jwanꞌ nchak rop xgab naꞌ, xaꞌ ya nak xaja bde lo nittoꞌ, ndano mbiy lada lada.
7 Leꞌ xaꞌ jwanꞌ ta naka, anaꞌli xaꞌ xgab kayaꞌ xaꞌ nek tib yalwen chanꞌ Dios,
8 tak nchak rop xgab xaꞌ. Naya ndli xaꞌ tib xgab nde yeꞌ tediba, nantolid xaꞌ xgab xaꞌ.
9 Wes jwanꞌ nabil ndarid lo izyo reꞌ, ndablo nale yo lazoꞌ xaꞌ, tak xaꞌ ya nak tib men ntak lo Dios.
10 Taga re xaꞌ rik ndablo nale yo lazoꞌ xaꞌ senꞌ ndolux chanꞌ xaꞌ, tak re jwanꞌ ngeno xaꞌ naka xaja yeꞌ ndo lo wan.
11 Senꞌ lo ndryoꞌ wiz nde ndlya toz be, zya mbis wan, nchab yeꞌ nde ndlux yalnawe nyay. Taga yote re men jwanꞌ ngeno bro toz jwanꞌ lo izyo reꞌ, lux xaꞌ lo reta chanꞌ xaꞌ.
Xek men lo re yalti
12 Wen toz nda men jwanꞌ nxek lo re yalti nde lo reta jwanꞌ narax ntokilꞌ men lo izyo; tak senꞌ lo mxek xaꞌ lo reta jwanꞌ na, xaꞌ ya kayaꞌ yalnaban adiꞌ, jwanꞌ reꞌ mkeꞌ yek Dios tayaꞌ Xaꞌ lo re men jwanꞌ nkeꞌ lazonꞌ Dios.
13 Senꞌ lo ndlya tib xgab yek men li men jwanꞌ narax, nagapta men: “Dios mtokilꞌ na”, tak Dios neka ndli Xaꞌ xgab li Xaꞌ jwanꞌ narax nde neka ntokilꞌ Xaꞌ men sa li mena.
14 Tak, senꞌ lo ndlya xgab narax yek men, lega xgab men naka, jwanꞌ na mbey men nde ntokilꞌ la men.
15 Nde lo xgab narax ya nchal xken men; nde leꞌ yalke ya, senꞌ lo mxyen na, ngok naroy nde ncholala yalguj lo men.
16 Wes na, nkeꞌ lazoꞌn goꞌ, nataꞌd goꞌ diꞌs tyaꞌb yek goꞌ.
17 Tak reta jwanꞌ wen nde reta jwanꞌ galꞌ ndey lo beꞌ, lo Xud naꞌ, Xaꞌ nak xwanꞌ reta xni ndob lo beꞌ. Dios nanzyed Xaꞌ nde nangenta yalꞌ kow par Xaꞌ.
18 Dios dib nzo lazoꞌ Xaꞌ, mbli Xaꞌ ngol nakub naꞌ lo xkiꞌs Xaꞌ diꞌs galꞌ, sa ak naꞌ jwanꞌ ndak lo reta jwanꞌ mdoxkwaꞌ Xaꞌ.
Ndablo li men jwanꞌ ngenabeꞌ xkiꞌs Dios
19 Wes na, pteꞌlas goꞌ jwanꞌ reꞌ: Reta goꞌ ndablo jwin gon goꞌ tib jwanꞌ, nde nerla li goꞌ xgaba zyara kab goꞌ, nde ndablo sowꞌ ak nayiꞌ goꞌ.
20 Tak men jwanꞌ nayiꞌ, nandlid men jwanꞌ galꞌ lo Dios.
21 Jwanꞌ nasa bloꞌtal goꞌ reta jwanꞌ xkap nde reta jwanꞌ narax toz nzo lo izyo nde kon yalnadoꞌ pkayaꞌ goꞌ xkiꞌs Dios lenꞌ lazoꞌ goꞌ, tak benꞌta xkiꞌs Dios tolaꞌ xbin goꞌ.
22 Nde bli goꞌ re jwanꞌ ngeni xkiꞌs Dios, naꞌakta goꞌ men benꞌta nchon na, naꞌkwinꞌnod goꞌ lazoꞌ goꞌ.
23 Tak tez xanya goꞌ benꞌta nchon xkiꞌs Dios nde nandlid goꞌy, nak goꞌ xaja tib xaꞌ ngwiꞌ lonꞌ tib lo spej.
24 Naya ndo wiꞌ xaꞌ lo spej nyenꞌ xanya lo xaꞌ nde nda xaꞌ nde zyaga mbyaj yek xaꞌ xa ndab lo xaꞌ.
25 Leꞌ xaꞌ jwanꞌ jwin nchon xkiꞌs Dios, diꞌs galꞌ jwanꞌ ntolaꞌ men, nde nxek xaꞌ tiblaꞌ ndo xaꞌ lo xkiꞌs Dios, nanchajtay yek xaꞌ, cheꞌla ndli xaꞌ re jwanꞌ ngeni xkiꞌs Dios, xaꞌ ya wen toz nda lo reta jwanꞌ ndli xaꞌ.
26 Tez nzo xaꞌ ndli xgab, galꞌ toz ndo xaꞌ lo xned Dios nde nankenapta xaꞌ loz xaꞌ benꞌta nkwinꞌno xaꞌ lazoꞌ xaꞌ, nde leꞌ jwanꞌ ta ndli xaꞌ xgab galꞌ toz ndo xaꞌ lo xned Dios, nalid sinꞌ na.
27 Leꞌ ned galꞌpa nde ned nambi lo Dios, jwanꞌ na nak: Ya tna men or ptyab nde re xaꞌ jwanꞌ nguj salꞌ naꞌ, laꞌsto men xaꞌ lo yaltin xaꞌ, nde kenap men lazoꞌ men lo re jwanꞌ narax nzo lo izyo.