5
Lipa lazoꞌ men Jesús sa lyayo re jwanꞌ narax
1 Reta men jwanꞌ ndli lazonꞌ leꞌ Jesús nak Xaꞌ mtelꞌ Dios, men ya nak xinꞌ Dios. Nde reta men jwanꞌ nkeꞌ lazonꞌ xud mdyenꞌ, taga nkeꞌ lazoꞌ men re mdyenꞌ xinꞌ xaꞌ
2 Senꞌ nxobyek naꞌ yalnyebeꞌ chanꞌ Dios nde nkeꞌ lazonꞌ Xaꞌ, zyasa ndloꞌ nkeꞌ lazonꞌ re xinꞌ Xaꞌ.
3 Jwanꞌ reꞌ nak keꞌ lazoꞌ men Dios, xobyek men re yalnyebeꞌ chanꞌ Xaꞌ. Nde re yalnyebeꞌ chanꞌ Xaꞌ naꞌnakte jwanꞌ nagan,
4 tak re men jwanꞌ nak xinꞌ Dios, men ya li lyayo re jwanꞌ narax lo izyo. Senꞌ lipa lazoꞌ men Jesús, jwanꞌ reꞌ li lyayo re jwanꞌ narax lo izyo.
5 ¿Cho men li lyayo re jwanꞌ narax lo izyo? Men jwanꞌ ndli lazonꞌ Jesús nak Xinꞌ Dios.
Jwanꞌ ndej Mbi Nayon
6 Senꞌ mbyed Jesucrist lo izyo reꞌ, mbroꞌle Xaꞌ lenꞌ nit nde senꞌ nguj Xaꞌ mxo Xaꞌ ren Xaꞌ. Nde leꞌ Mbi Nayon ndej jwanꞌ reꞌ, tak Mbi Nayon nak jwanꞌ li.
7 Tak son Xaꞌ ndej lo beꞌ jwanꞌ nak Jesús, Xaꞌ ya nak: Xud naꞌ Dios, Diꞌs Naban nde Mbi Nayon. Nde re yon Xaꞌ reꞌ, thita Xaꞌ.
8 Tagaꞌ lo izyo, nzo son jwanꞌ ndej jwanꞌ nak Jesús: xbi, nit nde ren. Nde re yona thita naka.
9 Tez ndli lazonꞌ jwanꞌ ndej men lo izyo reꞌ, ndablo mas li lazonꞌ jwanꞌ ndej Dios, tak Dios ndej jwanꞌ nak Xinꞌ Xaꞌ.
10 Men jwanꞌ ndli lazonꞌ Xinꞌ Dios, neꞌ xaꞌ jwanꞌ reꞌ lenꞌ lazoꞌ xaꞌ, leꞌ xaꞌ jwanꞌ naꞌndlid lazonꞌ Dios ndlilal xaꞌ Dios xaja ti Xaꞌ kwinꞌ, tak naꞌndlid lazoꞌ xaꞌ jwanꞌ ndej Dios kwent chanꞌ Xinꞌ Dios.
11 Nde jwanꞌ reꞌ nak jwanꞌ ndej Dios: Dios mdaꞌ yalnaban adiꞌ lonꞌ, nde yalnaban reꞌ ngeno Xinꞌ Xaꞌ.
12 Men jwanꞌ ndono Xinꞌ Dios, men ya ndono yalnaban, leꞌ xaꞌ jwanꞌ naꞌndonod Xinꞌ Dios naꞌndonod xaꞌ yalnaban.
Yolo men yalnaban adiꞌ
13 Ngekeꞌn jwanꞌ reꞌ lo re goꞌ jwanꞌ ndli lazonꞌ le Xinꞌ Dios, sa nye goꞌ ngeno goꞌ yalnaban adiꞌ, nde li lazoꞌ goꞌ Xaꞌ nak Xinꞌ Dios.
14 Nde jwanꞌ reꞌ nak xlaꞌs ngenonꞌ lo Dios, tez nyaꞌb naꞌ jwanꞌ xaja ncholaꞌs Xaꞌ, ton Xaꞌ xkiꞌs naꞌ.
15 Nde tez mnenꞌ Dios nchon choja jwanꞌ nyaꞌb naꞌ lo Xaꞌ, ndablo nyenꞌ mkayaꞌla naꞌ re jwanꞌ mnaꞌb naꞌ lo Xaꞌ.
16 Tez nzo cho goꞌ ngwiꞌ ti xaꞌ ndli lazonꞌ Dios ngeli xaꞌ yalke jwanꞌ naꞌncheda men lo yalguj, mnaꞌb goꞌ lo Dios, nde Dios taꞌ yalnaban lo xaꞌ, jwanꞌ reꞌ nak lo re xaꞌ ndli yalke jwanꞌ naꞌncheda men lo yalguj. Nzo yalke ndeno yalguj, jwanꞌ na naꞌnit na lo goꞌ cho tnaꞌb goꞌ por xaꞌ ya lo Dios.
17 Reta jwanꞌ naꞌgalꞌta, yalke naka, per nzo yalke naꞌnchede men lo yalguj.
18 Mnenꞌ nek tib men jwanꞌ nak xinꞌ Dios naꞌndlid men jwanꞌ narax, tak Jesús Xinꞌ Dios nkenap Xaꞌ men nde maxuꞌ naꞌgaltraꞌ xaꞌ men.
19 Mnenꞌ, nak naꞌ xinꞌ Dios nde leꞌ dib izyo nzoyaꞌ maxuꞌy.
20 Nde mnenꞌ leꞌ Jesús Xinꞌ Dios mbyed lo izyo reꞌ, mbyed taꞌ yalnchak lonꞌ sa yolonꞌ, liga Xaꞌ nak Dios. Nde ndononꞌ Xaꞌ lipa, Xaꞌ ya nak Xinꞌ Xaꞌ Jesucrist. Xaꞌ reꞌ nak lipa Dios nde yalnaban adiꞌ.
21 Xinꞌ bix na, pkenap lazoꞌ goꞌ lo re mnab. Ta naka.