7
Jesus nak nglweyꞌ xa nak Melquisedec
1 Melquisedec reꞌ ngok rey yez Salem, nde tagaꞌ ngok xaꞌ nglweyꞌ lo Dios ro. Senꞌ mbere Abraham ngwakeꞌ Abraham byo nde mbli Abraham gan lo temas rey, mbroꞌ xaꞌ ned lo Abraham nde mbli leyꞌ xaꞌ Abraham,
2 nde lo xaꞌ mdaꞌ Abraham reta diezmo chanꞌ reta jwanꞌ mbli Abraham gan lo byo. Nde le Melquisedec nak Rey ndli jwanꞌ galꞌ, Rey yez Salem, nde diꞌs ya nak Rey nda yalnabeꞌz.
3 Ngencho nye cho ngok xud xaꞌ, nekla cho ngok xnaꞌ xaꞌ, ngencho nye plo nde lo bin xaꞌ, neka nye men pol ngol xaꞌ nde pol nguj xaꞌ, xa nak Xinꞌ Dios nak xaꞌ, dib adiꞌ nak xaꞌ nglweyꞌ.
4 Naya bwiꞌ goꞌ nea, plopa naro ntak Melquisedec jwanꞌ nasa axta yub Abraham, xaꞌ gox lonꞌ ta ngo pola, mdaꞌ dyezmo chanꞌ reta jwanꞌ ta mbli xaꞌ gan lo byo ya, lo xaꞌ.
5 Nde liga, re men jwanꞌ nde lo bin Levi xaꞌ jwanꞌ nak nglweyꞌ, re xaꞌ ya, mnebeꞌ ley kayaꞌ xaꞌ reta dyezmo chanꞌ reta xaꞌ ta xaꞌ, teꞌnyega thita lo bin Abraham nde re xaꞌ.
6 Per Melquisedec teꞌnyega nanded xaꞌ lo bin Levi, mkayaꞌ xaꞌ dyezmo jwanꞌ mdaꞌ Abraham, nde mbli leyꞌ xaꞌ Abraham, Abraham jwanꞌ ta mdaꞌa Dios xkiꞌs Dios lonꞌ, li leyꞌ Dios sa.
7 Mbay naya ta mnea naꞌ, leꞌ xaꞌ jwanꞌ ndli leyꞌ men, xaꞌ ya mas ntak ke lo xaꞌ jwanꞌ nchak leyꞌ.
8 Naya, galꞌ diꞌs re nglweyꞌ jwanꞌ nkayaꞌ dyezmo lo izyo reꞌ, tagaꞌ men nak xaꞌ nde taj xaꞌ xaga naꞌ reꞌ, per lo xkiꞌs Dios nchaj Melquisedec xaja thi xaꞌ benꞌ nabana xaꞌ.
9 Jwanꞌ nasa toyal gab naꞌ na, lo mdaꞌ Abraham dyezmo lo Melquisedeca, nogaꞌ dyezmo chanꞌ Levi nda tya, Levi jwanꞌ ta nkayaꞌ reta dyezmo naya,
10 tak lo senꞌ mbroꞌ Melquisedec ned lo Abraham, tera gal Levi, benꞌ nzo xaꞌ lad xud xaꞌ Abraham.
11 Re xaꞌ Israel mkayaꞌ xaꞌ ley, sa re xaꞌ nde lo bin Levi ak xaꞌ nglweyꞌ, mbay tez liga por re ngwleyꞌ ya ndli sa galꞌ ngak re men jwanꞌ nxobyek ley, nanakinꞌtraꞌ ngyeꞌd tedib nglweyꞌ, cheꞌla mbyeꞌd thi nglweyꞌ jwanꞌ xa ngok Melquisedec jwanꞌ nanded lo bin Aaron.
12 Tak lo mzyeꞌ lo bin xaꞌ nak nglweyꞌ, tagaꞌ nakinꞌ zyeꞌ ley.
13 Mbay Jesus, xaꞌ ta nak nglweyꞌ ndej xkiꞌs Dios reꞌ, tedibaꞌ lo bin xinꞌ Israel nde xaꞌ, nde lo bin ya, nekthib xaꞌ nangokta nglweyꞌ.
14 Tak cheꞌ mne naꞌ leꞌ Jesus Xaꞌ Nyebeꞌ lonꞌ, nde lo bin Juda, mbay na lo bin Juda namdejta Moises ak xaꞌ nglweyꞌ.
15 Jwanꞌ reꞌ mas nambi mbroꞌxkana, tak nglweyꞌ kub ta mbroꞌto reꞌ, xa nak Melquisedec nak xaꞌ,
16 xaꞌ reꞌ nangokta nglweyꞌ jwanꞌ xa ndej ley nyenꞌ cho lo bin ndablo ryoꞌ nglweyꞌ, cheꞌla leꞌ Xaꞌ ngok nglweyꞌ tak Dios mbloꞌ Xaꞌ, nde ngeno Xaꞌ yalne chanꞌ yalnaban adiꞌ.
17 Tak jwanꞌ reꞌ ndej Dios nak Xaꞌ:
Lu nak nglweyꞌ dib tyemp,
ta xa ngok Melquisedec nglweyꞌ.
18 Jwanꞌ nasa mbroꞌtal ley nera, tak nalay nde naꞌlitra sinꞌ na.
19 Tak ley naꞌndlidey gan ndli galꞌ la nekthib men. Mbay jwanꞌ ngembed naꞌ naya mas jwina, nde leꞌy ndli sa mbike gax naꞌ lo Dios.
20 Nde jwanꞌ reꞌ ngoka, leꞌga leꞌ yub Dios mtobro Dios.
21 Lo mbloꞌ Dios tedib ned nglweyꞌ ya namtobrod Xaꞌ nek thib jwanꞌ, per Jesus ngolal nglweyꞌ, por jwanꞌ ta mtobro Dios mdaꞌ Dios xkiꞌs Dios, tak lo xkiꞌs Dios nchab:
Lo jwanꞌ nkeyek Dios naꞌntseꞌd Xaꞌ xgab Xaꞌ:
“Lu nak nglweyꞌ dib tyemp,
ta xa ngok Melquisedec nglweyꞌ.”
22 Jwanꞌ nasa mnenꞌ ke por Jesus mas jwin nak jwanꞌ mkeyek Dios, kon jwanꞌ mbli Xaꞌ por re men, ke lo jwanꞌ neraꞌ.
23 Leꞌ tedib ned nglweyꞌ ya, naꞌr toz xaꞌ ngo, tak lo nchaj xaꞌ nakinꞌ tediba xaꞌ kayaꞌ rsinꞌ xaꞌ,
24 mbay nglweyꞌ reꞌ, lo ta thiptane naban Xaꞌ, nanakintra tayaꞌ Xaꞌ rsinꞌ Xaꞌ lo tedib nglweyꞌ.
25 Jwanꞌ nasa tli Xaꞌ gan thipta gob nde thiptane tolaꞌ Xaꞌ reta men jwanꞌ mbike lo Dios por Xaꞌ, tak thiptane naban Xaꞌ sa nyaꞌb Xaꞌ lo Dios por re men ya.
26 Tak thi nglweyꞌ ro jwanꞌ tapaꞌ naka nakinꞌ naꞌ: Nayon Xaꞌ, nanzobta xken Xaꞌ, naꞌlud namblid Xaꞌ jwanꞌ narax, nde natsalꞌtad Xaꞌ re xaꞌ ndli jwanꞌ narax nde mas gap ndob Xaꞌ ke lo beꞌ.
27 Nanakinꞌta Xaꞌ li Xaꞌ, xa ndli tedib ned nglweyꞌ ro ba, rejaꞌ wiz nerla nguj xaꞌ maꞌ sa dyonꞌ xken xaꞌ, seraꞌ kuj xaꞌ maꞌ sa dyonꞌ xken reta men yez, mbay leꞌ nglweyꞌ ro reꞌ na, leꞌ mdayaꞌ Xaꞌ lazoꞌ Xaꞌ, thib gobta nguj Xaꞌ nde dib tyemp ndli sinꞌ na.
28 Leꞌ ley chanꞌ Moises leꞌga leꞌ re men nzoꞌb xkena ba ndlilala nglweyꞌ ro, per xis ta nzola leya, Dios mtobro mtanꞌ Dios Xinꞌ Dios ak nglweyꞌ ro, nde thiptane galꞌ nak Xaꞌ.