3
Mas ntak Jesus ke lo Moises
1 Jwanꞌ nasa wes na nde ptanꞌ na, men nayon chanꞌ Dios, mbrez Dios goꞌ sa ak goꞌ men chanꞌ Dios, ne ptob goꞌ xgab goꞌ lo jwanꞌ mbli Jesus, Xaꞌ nak Xaꞌ mtelꞌ Dios nde Xaꞌ nak nglweyꞌ ro lo jwanꞌ ta ndli lazonꞌ ba.
2 Jesus mblì Xaꞌ xata nchab Dios lo Xaꞌ, Dios jwan' ta mblí Xaꞌ, ta xa mblì Moises jwanꞌ nchab Dios lo Moises, lo reta men yez Dios.
3 Tak mas ntak Jesus ke lo Moises, ta xa mas ntak thi xaꞌ ntaꞌ thi yo ke leꞌga yo jwanꞌ mtaꞌ xaꞌ.
4 Nde reta yo ba nzo thi men mtaꞌy, per Dios mdoxkwaꞌ reta jwanꞌ.
5 Galꞌ diꞌs Moises mxoꞌbyek xaꞌ reta jwanꞌ nchab Dios lo xaꞌ, lo mbli xaꞌ sinꞌ lo Dios, sa tej xaꞌ jwanꞌ ncholaꞌs Dios gab Dios lo re men liz Dios.
6 Mbay leꞌ Crist lo nak Xaꞌ Xinꞌ Dios thiblaꞌ ndo Xaꞌ lo re men liz Dios, jwanꞌ nak re naꞌ reꞌ, tezka thiblaꞌ ne ndo naꞌ lo jwanꞌ ndli lazonꞌ nde thiblaꞌ ne tob xgab naꞌ lo jwanꞌ nkembed naꞌ.
Ryoꞌxkwen men yez Dios
7 Jwanꞌ nasa, ta xa ne Mbi Nayon:
Tez naya gon goꞌ jwanꞌ ndoni Dios,
8 naꞌlined lazoꞌ goꞌ lo Dios ta xa ngok ne lazoꞌ re xaꞌ naꞌngonta diꞌs ro Dios pola
nde mblibeꞌ xaꞌ Dios lad izyo nagan.
9 Tya mblibeꞌ re xaꞌ gox lo goꞌ na pola,
teꞌnyega dib lenꞌ choꞌ linꞌ mbwiꞌ xaꞌ reta jwanꞌ mblin.
10 Tamod sa mxi lazoꞌn mbwiꞌn re men ngo tyemp ya,
nde nchab na: "Thiblaꞌ ngan xgab xaꞌ,
nde nancholaꞌsta xaꞌ yo xaꞌ lo xned na."
11 Jwanꞌ nasa lo xyan ya mkeyek na,
naꞌyoted xaꞌ tenꞌ ngenon ryoꞌxkwen xaꞌ.
12 Wes na, ptanꞌ na, nda wiꞌ thoz goꞌ, sa nek thib goꞌ naꞌlyad jwanꞌ narax lazonꞌ, nde kay diꞌs li lazoꞌ goꞌ Dios nde bike tij goꞌ lo Dios nabana.
13 Cheꞌla reta wiz ptobeꞌ goꞌ yek ta goꞌ, naya ta benꞌ nzo tyemp reꞌ, sa nek thib goꞌ naꞌakned lazonꞌ nde gab goꞌ lo yalkwinꞌ chanꞌ jwanꞌ narax.
14 Tak nogaꞌ naꞌ thita nak naꞌ kon Crist, tezka thiblaꞌ tob naꞌ xgab naꞌ lo jwanꞌ ndli lazonꞌ, ta xa mbli lazoꞌ neꞌy lo senꞌ mdobte ner naꞌ, tagaꞌ li lazoꞌ neꞌy axta lulka.
15 Ta xa nchabka lo xkiꞌs Dios:
Tez naya gon goꞌ jwanꞌ ndoni Dios,
naꞌlined lazoꞌ goꞌ lo Dios ta xa ngok ne lazoꞌ re xaꞌ naꞌngonta diꞌs ro Dios pola.
16 Mbay, ¿cho re xaꞌ ta teꞌnye mbin xaꞌ jwanꞌ nchab Dios nde mtoxi xaꞌ lazoꞌ Dios saꞌ? ¿Cho naꞌnaktey reta xaꞌ ta mbloꞌte Moises lo xyon Egipto yaꞌ?
17 Mbay, ¿kon cho re xaꞌ ngonaxi lazoꞌ Dios dib lenꞌ choꞌ linꞌ naꞌ? ¿Cho naꞌnaktey kon re xaꞌ ta mbli jwanꞌ narax ta nguj izyo nagan nay?
18 Nde ¿cho lo xaꞌ mkeyek Dios naꞌyoted xaꞌ tenꞌ ryoꞌxkwen xaꞌ ya? ¿Cho naꞌnaktey lo re xaꞌ ta naꞌngonta diꞌs say?
19 Nde ncheꞌya ngwinꞌ naya naꞌndlid xaꞌ gan ngate xaꞌ tya, tak naꞌndlid lazoꞌ xaꞌ Dios.