11
Re men jwanꞌ mbli lazonꞌ Dios
1 Mbay naya na, jwanꞌ ta ndli lazoꞌ men Dios nak mnepa men ke liga kayaꞌ men jwanꞌ ngembed men, teꞌnye nangwi'd mena per mnepa men ke liga nzoy nde taka.
2 Tak lo mbli lazoꞌ re xaꞌ gox lonꞌ ngo pola Dios, tamod sa wen mbwiꞌ Dios xaꞌ.
3 Tak lo ndli lazonꞌ Dios nchen naꞌ ke xkiꞌs Dios mbli sa mdoxkwaꞌ beꞌ nde izyo, tamod sa jwanꞌ ngwinꞌ naya mdoxkwaꞌy kon re jwanꞌ nangwiꞌd men.
4 Tak lo mbli lazoꞌ Abel Dios, jwanꞌ nasa mas nawe nyaꞌ maꞌ mbij Abel mdaꞌ Abel lo Dios ke jwanꞌ mdaꞌ Cain, tamod sa mbyanꞌ Abel men galꞌ lo Dios nde mbroꞌ lazoꞌ Dios jwanꞌ yon mdaꞌ Abel. Nde teꞌnyega ngujla Abel benꞌ ndloꞌy lonꞌ xa mbli lazo' Abel Dios.
5 Tak lo mbli lazoꞌ Enoc Dios jwanꞌ nasa naban xaꞌ mbeꞌ Dios xaꞌ nde nangujta xaꞌ, nde naꞌngazalta men xaꞌ tak Dios mbe xaꞌ, per lo senꞌ teraꞌ we Dios xaꞌ ya, lo xkiꞌs Dios nchab, mbroꞌ lazoꞌ Dios mod nak xaꞌ.
6 Per tez nandlid lazoꞌ men Dios naꞌlid men gan lin men jwanꞌ ndryoꞌ lazoꞌ Xaꞌ, tak men nyekeꞌ lo Dios ndablo li lazoꞌ men ke nzo Xaꞌ, nde Xaꞌ taꞌ jwanꞌ mzalꞌ re men jwanꞌ nkwanꞌ Xaꞌ.
7 Tak lo mbli lazoꞌ Noe Dios, jwanꞌ nasa mdej Dios re jwanꞌ nangwiꞌd xaꞌ nchak, mpseb lazoꞌ Noe nde mdoxkwaꞌ xaꞌ thi bark sa lyaꞌ xaꞌ kon reta men liz xaꞌ. Nde taga lo mbli lazoꞌ Noe Dios, lo jwanꞌ na mbloꞌ xaꞌ ke reta men nzo lo izyo mzalꞌ xaꞌ ya xaꞌ pen, nde mbyanꞌ Noe men galꞌ lo Dios tak mbli lazoꞌ xaꞌ Dios.
8 Tak lo mbli lazoꞌ Abraham Dios, senꞌ mbrez Dios xaꞌ, mbin xaꞌ diꞌs ro Dios, mbroꞌ xaꞌ tya nda xaꞌ tenꞌ kayaꞌ xaꞌ ak chanꞌ xaꞌ. Mbroꞌte xaꞌ las xaꞌ teꞌnye naꞌnyed xaꞌ plo nda xaꞌ.
9 Tak lo mbli lazoꞌ xaꞌ Dios, jwanꞌ nasa ngo xaꞌ xajka men thib lada izyo tenꞌ mkeyek Dios taꞌ Dios lo xaꞌ ak chanꞌ xaꞌ. Nde yo yid ngok liz xaꞌ, tagaꞌ yo yid ngo Isac nde Jacob, jwanꞌ nogaꞌ mkeyek Dios lo xaꞌ, izyo ya ak chanꞌ xaꞌ.
10 Tak Abraham ngembed yo yez jwanꞌ ne naksaꞌ xanꞌ na, yez jwanꞌ yub Dios mdixsaꞌ nde mdoxkwaꞌy.
11 Tagaꞌ tak lo mbli lazoꞌ xaꞌ Dios, axta yub Sar, teꞌnyega men nij xaꞌ, Dios mblaꞌsto xaꞌ, sa kelo xinꞌ xaꞌ nde mxan xaꞌ thi mbed senꞌ ngox tozla xaꞌ, tak mbli lazoꞌ xaꞌ ke liga tli Xaꞌ ta mdaꞌ xkiꞌs naꞌ ya jwanꞌ nchab Xaꞌ lo xaꞌ.
12 Jwanꞌ nasa, Abraham, thi xaꞌ gox thoz naꞌaktraꞌ taꞌ mbed, mkeno xaꞌ xinꞌ xaꞌ nde mbyaꞌr lo bin xaꞌ nde ngen cho ak lab men lo bin xaꞌ, xaja re mbel nzi lo beꞌ ba nde xaja yux ta nzi ro nittoꞌ ba re xaꞌ.
13 Reta men ya nguj xaꞌ nde naꞌnkayaꞌd xaꞌ reta jwanꞌ mkeyek Dios taꞌ Dios lo xaꞌ, nde lo ta mbli lazoꞌ xaꞌ Dios benꞌta tij mbwiꞌ xaꞌy, per mbli lazoꞌ xaꞌ tkayaꞌga xaꞌy tak mne xaꞌ ke xaꞌ thib lad xaꞌ nde benꞌ nderidndaꞌb xaꞌ xis izyo reꞌ.
14 Re men jwanꞌ ta ndodiꞌsa, ndloꞌpaꞌ ke tata benꞌ ngete kwanꞌ xaꞌ tenꞌ ak lazpa xaꞌ.
15 Tez ngaka izyo jwanꞌ mbroꞌ xaꞌ ya nzoyek xaꞌ ak laz xaꞌ, cheꞌ ngyen lo xaꞌ mbere xaꞌ tya.
16 Per leꞌ xaꞌ ndyablaꞌs thi tenꞌ mas jwin ak laz xaꞌ, lo beꞌ ncholaꞌs xaꞌ ak laz xaꞌ. Jwanꞌ nasa nandyolaꞌsta Dios, nak Dios, Dios xaꞌ, takꞌ mdoxkwaꞌla Dios thi yez tenꞌ ak laz xaꞌ.
17 Tak lo mbli lazoꞌ Abraham Dios senꞌ mblibeꞌ Dios xaꞌ, nde mxen xaꞌ Isaac sa kuj xaꞌ or lo Dios, mxoꞌbyek xaꞌ mdaꞌ xaꞌ thibnya xinꞌ xaꞌ gaj, tenꞌnyega Dios mdaꞌ xkiꞌs Dios lo xaꞌ, nchab Dios:
18 "Por Isaac yaꞌr men lo bin la."
19 Tak Abraham mne ke Dios ngeno yalne sa koꞌxban Dios re men nguj, nde mkayaꞌ Abraham Isaac tedib gob, jwanꞌ re nak, xajka Dios mbloꞌxban Isaac.
20 Tak lo mbli lazoꞌ Isaac Dios jwanꞌ nasa mbli leyꞌ xaꞌ rop xinꞌ xaꞌ Jacob kon Esau, mdej xaꞌ re jwanꞌ nara li Dios.
21 Tak lo mbli lazoꞌ Jacob Dios, jwanꞌ nasa senꞌ mer gaj xaꞌ mbli leyꞌ xaꞌ rop xinꞌ Jose nde mxoꞌbkoꞌ xaꞌ yek yagan xaꞌ, mbli naro xaꞌ le Dios.
22 Tak lo mbli lazoꞌ Jose Dios, jwanꞌ nasa lo ndayajla xaꞌ mdej xaꞌ ke reta men nde lo bin Israel ryoꞌte xaꞌ Egipto nde mtanꞌ xaꞌ diꞌs jwanꞌ lino xaꞌ zij xaꞌ.
23 Tak lo mbli lazoꞌ xud Moises nde xnaꞌ Moises Dios, jwanꞌ nasa lo senꞌ ngol or mkaꞌs xaꞌ or son mbeꞌ, tak mbwiꞌ xaꞌ nawe nyar, namzyebta xaꞌ jwanꞌ mnebeꞌ rey ta ndablo gaj re mbed biꞌ.
24 Tak lo mbli lazoꞌ Moises Dios, jwanꞌ nasa lo senꞌ ngolal xaꞌ, naꞌndoyalta xaꞌ ngak xaꞌ xinꞌ ngol xinꞌ Faraon,
25 cheꞌla mblí xaꞌ thita rid xaꞌ yalti kon men yez Dios, ke li xaꞌ jwanꞌ narax, koꞌ xil xaꞌ lazoꞌ xaꞌ lud tyemp lo re jwanꞌ ndryoꞌ lazoꞌ belꞌ xaꞌ.
26 Mbwiꞌ xaꞌ ke mas ntak rid xaꞌ yalti, xajkaꞌ mbriꞌd Xaꞌ mtelꞌ Dios, ke keno xaꞌ re jwanꞌ ntak ngeno re xaꞌ Egipto, tak leꞌ xaꞌ nketoblo re jwanꞌ taꞌ Dios ka xaꞌ.
27 Tak lo mbli lazoꞌ Moises Dios, jwanꞌ nasa nanzyebta xaꞌ ak nayiꞌ rey, mbroꞌte xaꞌ Egipto nde thiblaꞌ ne mdo xaꞌ lo xgab xaꞌ, xajka men ndowiꞌpa Dios jwanꞌ naꞌakta wiꞌ men.
28 Tak lo mbli lazoꞌ Moises Dios, jwanꞌ nasa mbli Moises Pask nde mnebeꞌ Moises sa mpchub xaꞌ ren ro re yala liz xaꞌ, sa naꞌgalta anj nyebeꞌ lo yalguj re xinꞌ biꞌ ner re xaꞌ Israel.
29 Tak lo mbli lazoꞌ re xaꞌ Israel Dios, jwanꞌ nasa mbriꞌd xaꞌ Nittoꞌ Nane, xaja men ndriꞌd izyo biza, nde lo senꞌ ncholaꞌs re xaꞌ Egipto tagaꞌ rid xaꞌ, ngwap xaꞌ nit.
30 Tak lo mbli lazoꞌ re xaꞌ Israel Dios, jwanꞌ nasa ngob pto jwanꞌ nowꞌ yez Jerico, lo senꞌ ngoxoꞌb gaz wiꞌz mbyek xaꞌ dibta lad yez.
31 Tak lo mbli lazoꞌ Rahab Dios, ngol jwanꞌ ntho lad naꞌ, jwanꞌ nasa naꞌngajta ngol kon re men jwanꞌ ne yek naꞌ, tak nabeꞌz mdaꞌ ngol liz ngol mkaslo re xaꞌ Israel, xaꞌ jwanꞌ ngwalaꞌs yez Jerico.
32 ¿Kwanraꞌ mas nin lo goꞌ? Naꞌgalta tyemp tez tej na kwent chanꞌ Gedeon, kwent chanꞌ Barac, kwent chanꞌ Sanson, kwent chanꞌ Jefte, kwent chanꞌ David, jwanꞌ mbli Samuel nde kwent chanꞌ reta profet.
33 Tak lo mbli lazoꞌ xaꞌ Dios, mbli xaꞌ gan byo lo re naꞌr ned yez, mbli xaꞌ jwanꞌ galꞌ, nde mbwiꞌ xaꞌ ngok re jwanꞌ nchab Dios lo xaꞌ, mtowꞌ xaꞌ re ro mbeꞌs,
34 ngo xaꞌ lo bel thoz tir nde ngen kwan ngate xaꞌ nde mtolaꞌ lazoꞌ xaꞌ lo kuj men xaꞌ kon espad, ngo ne lazoꞌ xaꞌ senꞌ mas nalà nzo lazoꞌ xaꞌ, naꞌndlayod lazoꞌ xaꞌ nde mbli xaꞌ gan byo, mtoxonꞌ xaꞌ re sondad xaꞌga yez.
35 Ngo pla re men got mbroꞌ xban ta xaꞌ.
Ngo pla xaꞌ nguj lo pen nde naꞌndoyalta xaꞌ ndlaꞌ xaꞌ xaꞌ, tak leꞌ xaꞌ ngembed ryoꞌxban xaꞌ, sa naꞌgajtra xaꞌ.
36 Ti pla xaꞌ mxino men xaꞌ, mdin men xaꞌ, mkeꞌ lizyiꞌb men xaꞌ nde axta mdobo men xaꞌ kon kaden.
37 Nzo xaꞌ mbwadke men xaꞌ nguj xa', mchoꞌbroꞌ xaꞌ xaꞌ kon syer, mblibeꞌ xaꞌ xaꞌ. Nzo xaꞌ mbij xaꞌ kon espad, andoja plo mkete xonꞌ xaꞌ, yid mbakxilꞌ nde yid chib ngok xab xaꞌ, mbwiꞌ xaꞌ yalprob, nalat mxak xaꞌ nde mtoti men xaꞌ.
38 Reta men lo izyo reꞌ nanzalꞌta xaꞌ yo xaꞌ kon re xaꞌ ta ndli lazonꞌ Dios sa, mkete xaꞌ re izyo nagan, lenꞌ wana, re lenꞌ yeꞌr xanꞌ ke ba nde re yeꞌr lenꞌ izyo ba ngo xaꞌ.
39 Reta xaꞌ ya, teꞌnyega mbloꞌpaꞌ mbli lazoꞌ xaꞌ Dios, naꞌnkayad xaꞌ jwanꞌ nchab Dios taꞌ Dios lo xaꞌ,
40 tak Dios ngeno xgab jwanꞌ mas jwin par naꞌ, sa nanakta benꞌta xaꞌ ya yanꞌ men galꞌ, noga naꞌ thita yanꞌ naꞌ men galꞌ kon re xaꞌ ya.