2
1 Lo mbriꞌdla siꞌda linꞌ, ngwap na yez Jerusalén tedi gob kon Bernabé, noga Tit mde.
2 Per ngwan yez Jerusalén tak Dios mblo' lon ke nakin' yan. Tya xa'ta mtodi'snon re xa' nak sin' lo yodo', sa mblo'xkan na lo xa' di's wen chan' Jesucrist jwan' ngetetej na lo re men na'nakta judí. Mblo'xkan nay lo xa' sa yobe' ke sin' jwan' ndlin o sin' jwan' mblin na'nakte jwan' ben' nale ndlin.
3 Le' Tit, xaꞌ jwan' ngete kon na, na'nakta xa' men judí, per naꞌmnabeꞌd re xaꞌ judí tyob be' Tit.
4 Nde te'nye le'ga xij ná' nagaꞌs nzo pla xa' kwinꞌ jwan' mbez nak wes, ben'ta ngetelaꞌs xaꞌ xa mtolaꞌ Crist náꞌ lo ley, nde ncholaꞌs xaꞌ bere li náꞌ re jwan' nyebe' ley.
5 Per nek lud naꞌndaꞌd náꞌ diꞌs ntokilꞌ xaꞌ náꞌ, sa taga' go', xata mdej ná' diꞌs wen chanꞌ Jesucrist lo go' tata tyoy xij go'.
6 Per re xaꞌ jwan' nzo'b xki's na', xa' ntak lo yodoꞌ, ngen kwan jwanꞌ kub ndej xaꞌ lon lin; nde ngen kwan ndyak na tez nak xa' men ntak o men na'ntakta, tak Dios nambid Xaꞌ men.
7 Che'la re xaꞌ ya, mnela xaꞌ ke Dios mtel' na sa ndej na diꞌs wen chanꞌ Jesucrist lo re men naꞌnakta judí, ta xa mtel' Dios Pedr sa ndej Pedr diꞌs wen chanꞌ Jesucrist lo re men jwan' nak judí.
8 Tak le'ga Dios, Xa' ta mbli sa nak Pedr apost lo re men judí, leꞌga Dios ya mbli sa nak na apost lo re men naꞌnakta judí.
9 Le' Jakob, Pedr nde Juan ,re xaꞌ jwanꞌ nak xaja yato lo yodoꞌ, mbyolo xaꞌ yalwen jwanꞌ ndaꞌ Dios lon, zyasa mdaꞌ yaꞌ xaꞌ lon nde lo Bernabé sa loꞌ ke thita ndli náꞌ sin', mbyan'di's ná', leꞌ rop náꞌ Bernabé ndatej xkiꞌs Dios lo re men naꞌnakta judí nde leꞌ re yon xaꞌ nda lo re men jwan' nak judí.
10 Benꞌta mnaꞌb xaꞌ lo náꞌ sa la'sto náꞌ re men prob; nde jwanꞌ naga jwan' thibla' nchal na ndlin.
Mbrez Pab yek Pedr yez Antioquía
11 Senꞌ ngwa Pedr yez Antioquía, galꞌ lo Pedr mbrez na yek Pedr, tak nale'tirta jwanꞌ ndli Pedr.
12 Lo sen' tera' sin pla xa' jwan' mtel' Jakob, thita ncha Pedr kon re men naꞌnakta judí, per lo mzin re xa' ya, tolo mbike tij xa' nde nchak tiblad xa' tak mzyeb xa' re men ta ndli lazon' jwan' tyob be' men bi'.
13 Nde lo ta mbli Pedr noga masra' re xa' judí taga' mbli xa', axta no Bernabé mdo'bnyo jwanꞌ nagalꞌta ta mbli xaꞌ ya.
14 Senꞌ lo mnen na'ngelid xa' jwan' xa nakpa diꞌs wen chanꞌ Jesucrist, nzi wiꞌ reta xa' nchab na lo Pedr: “Lu, te'nye nak la men judí, per ngetea xa ti men na'nakta judí nde na'ndlid la xaga ti judí, ¿Cho kwan liy sa nyebeꞌa lo re men naꞌnakta judí sa li xaꞌ jwanꞌ ndli re men nak judí?”
15 Naꞌ reꞌ, axta ngol na' nak naꞌ men judí, nde na'nakta na' men nzo'bxken' jwan' xa nak re xa' ta na'nakta judí.
16 Tak mnenꞌ, nek thib men na'akta galꞌ lo Dios lo ndli men jwanꞌ nyebeꞌ ley, cheꞌla lo ndlipa lazoꞌ men Jesucrist sa nak men xaꞌ galꞌ. Jwanꞌ nasa noga na', ndli lazon' Jesucrist sa nak na' men galꞌ lo Dios lo ta ndlipa lazon' Jesucrist nde na'nakte lo ndlin' jwanꞌ nyebeꞌ ley, tak nek thib men naya'nta galꞌ lo Dios lo ndli men jwan' nyebe' ley.
17 Nde tez ngekwan' naꞌ yanꞌ naꞌ men galꞌ lo Dios lo ndlipa lazonꞌ Jesucrist, noga na' ndryo'xoꞌb nak naꞌ men nzoꞌb xkenꞌ, ¿Mbay cho Crist ndli sa nak na' men nzoꞌb xken'? Ngen, naꞌnakte jwanꞌna.
18 Tak tez re jwanꞌ mblala na nde bere li rsin nay tedi gob, yalke naka lon.
19 Tak le'ga ley mbli sa nguj na lo reta jwan' nyebe' ley, tamod sa ban na par Dios.
20 Thita mkeꞌn lo kruz kon Crist, nde naꞌnada naban, Crist naban lenꞌ lazoꞌn, nde lo ta naban na lo izyo re', naban na tak ndlipa lazoꞌn Xinꞌ Dios, Xaꞌ ta nkeꞌ lazonꞌ na nde mdayaꞌ lazoꞌ Xaꞌ por na.
21 Naꞌngotalta na yalwen chanꞌ Dios; tak tez por ley ak men xaꞌ galꞌ lo Dios, zyasa benꞌ nale nguj Crist.