6
1 Naya lo ta nak náꞌ men ndli sinꞌ lo Dios, mbez náꞌ yek goꞌ sa naꞌkotalta goꞌ yalwen jwanꞌ mbli Dios lo goꞌ.
2 Tak lo xkiꞌs Dios nchab:
Leꞌja ngoxoꞌb beꞌy, sa mbin na xkiꞌs la,
nde wiz jwanꞌ mtola'n la, zya mblaꞌston la.
Leꞌja naya ngoxoꞌb beꞌy, nde naya nak wiz tola'n men.
3 Nek thib lo men naꞌngakta náꞌ jwanꞌ ncheb xaꞌ, sa naꞌnixinta xa' xis sinꞌ ta ndli náꞌ.
4 Cheꞌla, lo reta ned jwan' ndli ná', ndloꞌ náꞌ ke nak náꞌ men ndli sinꞌ lo Dios, nxek toz náꞌ lo reta jwanꞌ, lo re yalnathoz, lo re yalti, lo re xgab;
5 lo mdin xaꞌ náꞌ, mkeꞌ xaꞌ náꞌ lizyiꞌb, ndola mblino xaꞌ náꞌ, mbli toz náꞌ sinꞌ, jwanꞌ toz naꞌngata náꞌ, mbriꞌd náꞌ win.
6 Tenyega lo reta yalti ya, thibka nambi ndo náꞌ lo Dios, nzolo náꞌ jwanꞌ lí, na'ndlyayod lazo' ná', ndlat lazoꞌ náꞌ, lo ta ndono náꞌ Mbi Nayon, lo ta lipa nkeꞌ lazoꞌ náꞌ,
7 lo ta ndej náꞌ diꞌs lí chanꞌ Dios, lo ta ndono náꞌ yalne chanꞌ Dios, nde lo ta thibla' ndli ná' jwan' galꞌ, jwan'na nak xaja yi'b ndlay ná' lad ban, nde lad beg.
8 Nzo senꞌ nxobyek xaꞌ náꞌ nde nzo senꞌ naꞌnxobyekta xaꞌ náꞌ, nzo senꞌ wen ni xaꞌ xis náꞌ nde nzo senꞌ narax ni xaꞌ xis náꞌ. Nzo senꞌ ngole xaꞌ náꞌ men kwinꞌ, per thibka jwanꞌ li ndej náꞌ.
9 Nzo senꞌ ndlino xaꞌ náꞌ xajka men naꞌnzolod xaꞌ, te'nyega nzolo wen xaꞌ ná'; nzo senꞌ ndyak náꞌ nzola náꞌ ro yalguj per benꞌ naban náꞌ, ntati toz xaꞌ náꞌ per tera' gaj náꞌ.
10 Te'nyega nabil nzo lazoꞌ náꞌ per thibka nale nzo lazoꞌ náꞌ, xaja men proba náꞌ per men toz mbli náꞌ ngok rik, xaja men ngen kwan ngenoba náꞌ, per reta jwanꞌ ngeno náꞌ.
11 Zi'b go' men yez Corint, dib la's ná' mdej náꞌy lo goꞌ nde dib nzo lazo' ná' mni náꞌy.
12 Náꞌ keꞌ toz lazoꞌ náꞌ goꞌ, per go' naꞌnkeꞌd lazoꞌ goꞌ náꞌ.
13 Nyaꞌb na lo goꞌ xaja nyaꞌb men lo xinꞌ men, pkeꞌ lazoꞌ goꞌ náꞌ, ta xaja nkeꞌ lazoꞌ náꞌ goꞌ.
Nak naꞌ yodoꞌ chanꞌ Dios naban
14 Naꞌtyentad goꞌ kon re xaꞌ naꞌnzolod Dios, tak naꞌlalta naka, ¿Cho nsalꞌta jwanꞌ galꞌ kon jwanꞌ naꞌgalꞌta? nde ¿Cho nsalꞌta xni kon yalꞌkow?
15 ¿Nde cho toyal tsal' xki's Crist kon maxuꞌ? ¿Cho toyal tsal' xki's ti men ndli lazonꞌ Dios kon ti xaꞌ naꞌndlid lazonꞌ Dios?
16 ¿Cho toyal thita ak re mnab kon yodonꞌ Dios? Tak naꞌ nak yodonꞌ Dios naban, jwanꞌ xa nchab Dios:
Yon nde keten xij xaꞌ,
Nde na ak Dios xaꞌ,
Nde xaꞌ ak yez na.
17 Nde noga nchab Dios:
Broꞌte goꞌ xij xaꞌ nde bike tij goꞌ lo xaꞌ,
nde naꞌgalta goꞌ jwanꞌ bew.
Sa kayan goꞌ,
18 nde na ak Xud goꞌ
nde goꞌ ak xinꞌ biꞌn nde xinꞌ got na,
tamod ne Dios, Xaꞌ ngeno dib yalnyebeꞌ toz.