3
Xa' ndli sin' lo di's kub jwan' mke'yek Dios
1 ¿Cho bere tyobte tej náꞌ lo goꞌ tedib gob re jwanꞌ wen nak náꞌ? ¿O nakinꞌ taꞌ náꞌ ti yeꞌs lo goꞌ tenꞌ ndeja ke wen nak náꞌ o nyaꞌb náꞌ sa goꞌ toxkwaꞌ yeꞌs, ta xa ndli rol men?
2 Per leꞌga goꞌ nak xaja ti yeꞌs jwanꞌ ndej ke wen nak náꞌ, ngeniy lenꞌ lazoꞌ náꞌ, reta men nzoloy nde reta xa' ndlaba.
3 Leꞌga goꞌ nak yeꞌs jwanꞌ mkeꞌ yub Crist nde náꞌ nak men tayaꞌy. Nde nak goꞌ yeꞌs jwanꞌ naꞌmkeday kon tint, leꞌy mke kon Xbin Dios naban nde naꞌmkede lo xba ke, leꞌy mke lo xba lenꞌ lazoꞌ go'.
4 Nde mnepaꞌ náꞌ ke li jwanꞌ reꞌ, lo ta ndob xgab náꞌ lo Dios por Jesucrist.
5 Nde naꞌnakte por nateꞌd náꞌ sa leꞌ li náꞌ re jwanꞌ, cheꞌla, re jwanꞌ ta ndoyal ndli náꞌ Dios ndloꞌy lo náꞌ.
6 Nde Dios mbli sa ngok náꞌ menꞌ ndli sinꞌ lo diꞌs jwanꞌ mkeꞌyek nakub Dios, nde jwanꞌ reꞌ naꞌnakte xa nchab ley, che'la chan' Mbi Nayon naka. Tak le' ley ndli sa nchaj men, nde leꞌ Mbi Nayon ndli sa mban men.
7 Mbay tez ley chan' Moisés jwan' ndeno yalguj ta mke lo xba ke mzina kon yalnaro toz nde re men yez Israel naꞌndlid xaꞌ gan ngwiꞌ xaꞌ lo Moisés, tak jwanꞌ toz ndlyabel nya xni ndyob lo Moisés. Tenyega xni ya sow' sow' ndoyu'y,
8 ¿cho nanakte mas naro xni ndlyabel toz jwan ndeno sin' ndli Mbi Nayon?
9 Mbay tez ley jwan' ndej lo men mzal' men gaj men mzina kon yalnaro toz, plopa mas naro yalnaro toz mzino Mbi Nayon jwanꞌ ndli sa nchak men men gal'.
10 Tak ana'nchen plota mbyan yalnaro ta ndeno ley pola lo jwan' re', mas yalnaro toz tir ndeno jwan' re'.
11 Tez yalnaro toz mbyedno jwan' ta luxa, choleta jwan' ta na'luxta, plopa mas yalnaro ye'dnoy.
12 Jwanꞌ nasa, lo ta ngembed naꞌ jwanꞌ reꞌ, dib xlaꞌs ndyodiꞌs náꞌy.
13 Nde naꞌndlid náꞌ jwanꞌ xa mbli Moisés, ta mtowꞌ xaꞌ lo xaꞌ kon lar, sa nawiꞌd re men nak xinꞌ Israel lo Moisés, xa ndoyuꞌ xni ndlyabel jwanꞌ ta lud mxeka.
14 Nde re xaꞌ ya ne yek xaꞌ naꞌngyenta xaꞌy, nde tatka naya, senꞌ re men ndlab xaꞌ diꞌs jwanꞌ mkeꞌyek ner Dios pola, le'ga lar ya ntowꞌ yek xa' sa na'yenta xa', tak benꞌta Crist li sa yiꞌb lar ya.
15 Nde tatka axta naya, senꞌ ndlab xaꞌ yeꞌs chanꞌ Moisés, lara benꞌ ntowꞌ lo lazoꞌ xaꞌ sa naꞌyenta xaꞌy.
16 Leꞌ senꞌ ndayaꞌ lazoꞌ men lo Xaꞌ Nyebeꞌ, zya nchiꞌb lar ta now' lo men.
17 Tak Xaꞌ Nyebeꞌ nak Xbi, nde tenꞌ ndo Xbin Xaꞌ Nyebeꞌ, tya nxyal' lo men.
18 Jwanꞌ nasa, lo ta naꞌnowꞌtraꞌ lo reta naꞌ, nak naꞌ xa nak ti spej ta ngobi xni ndlyabel chanꞌ Xaꞌ Nyebeꞌ, nde ndaseꞌ nak naꞌ sa ak naꞌ xa nak Crist. Jwanꞌ reꞌ ndli Xaꞌ Nyebeꞌ, Xaꞌ ta nak Xbi.