13
1 Jwanꞌ reꞌ ak byon gob yatwiꞌn goꞌ. Reta yalke ndryoꞌxkana di's ro chop men o tson men jwanꞌ liga mney.
2 Mnila nay lo goꞌ nera, nde naya bere tej nay lo goꞌ tedib gob xajka yub na ndo lo goꞌ, leꞌ naya naꞌndod yub na lo goꞌ per ngekeꞌn yeꞌs reꞌ lo re goꞌ ta mbli jwanꞌ narax neraꞌ nde lo re masraꞌ goꞌ, tez yatwiꞌn goꞌ tedib gob, naꞌlyata lazoꞌn goꞌ.
3 Zyasa yolo go' ke Crist ndli rsin' Xa' na sa ndyodi's na xki's Xa'. Tak Jesucrist naꞌnalada nak Xa' lo toxuꞌt Xaꞌ goꞌ, cheꞌla loꞌ Xaꞌ yalne chan' Xaꞌ lo goꞌ.
4 Te'nyega senꞌ lo mke Jesucrist lo kruz ngok Xaꞌ men nala nzo lazon' nde leꞌ naya naban Xaꞌ kon yalne chanꞌ Dios. Tagaꞌ nala nzo lazo' náꞌ jwan' xa ngok Jesucrist, per naban náꞌ kon Jesucrist por yalne chanꞌ Dios sa toyal li náꞌ sinꞌ lo goꞌ.
5 Jwin bwiꞌ goꞌ xa nak goꞌ nyenꞌ cho liga ndlipa lazoꞌ goꞌ Jesucrist; bli beꞌ goꞌ lazoꞌ goꞌ. ¿O naꞌnzolod goꞌ leꞌga goꞌ, cho naꞌnyed goꞌ Jesucrist ndono goꞌ? Nday na mblayo goꞌ.
6 Per ncholas na nye goꞌ, leꞌ náꞌ naꞌmblayot náꞌ.
7 Nde nyaꞌb náꞌ lo Dios sa naꞌlid goꞌ nek thib jwanꞌ narax; naꞌnakte sa ryo'xob re jwan' wen ndli ná', cheꞌla nya'b náꞌy lo Dios sa li goꞌ jwanꞌ wen, tenyega ndyak men ke mblayo náꞌ.
8 Tak na'ngen kwan ak li ná' sa tokan ná' jwanꞌ lí chanꞌ Dios, cheꞌla benꞌ jwanꞌ gal' toyal li ná' xis jwan' lí chan' Dios.
9 Jwanꞌ nasa ndyen toz náꞌ lo ta nala nzo lazo' náꞌ, sa leꞌ goꞌ ne yo lazo' goꞌ, nde tatka nyaꞌb náꞌ lo Dios sa yoxo'b xyut ban goꞌ xa nchola's Dios.
10 Jwanꞌ nasa, ngekeꞌn ye's re' lo goꞌ lo ta tij ndon reꞌ, sa senꞌ sin na lo goꞌ naꞌnakinꞌta tokox na goꞌ, tak yalnyebeꞌ jwanꞌ ndaꞌ Dios lon li rsin nay sa xyen goꞌ nde naꞌnakte par luꞌx na goꞌ.
Dyux chanꞌ Pab
11 Leꞌ naya wes na, ptan na, blo nale lazoꞌ goꞌ, yoxo'b xyut ban goꞌ xa nchola's Dios, blo ne go' lazo' ta goꞌ, thita xgab pkeno goꞌ, nde nabeꞌz bre goꞌ. Nde Dios ta nak chan' yalnabeꞌz nde ta nkeꞌ lazoꞌ Xaꞌ naꞌ, Xaꞌ ya tyono goꞌ.
12 Ptaꞌ goꞌ dyux lo ta goꞌ kon ti chut nayon.
13 Re men nayon ta ndli lazonꞌ Jesucrist ntelꞌ xaꞌ dyux lo goꞌ.
14 Yalwen chanꞌ Jesucrist Xaꞌ Nyebeꞌ, nde yalkeꞌ lazoꞌ chanꞌ Dios, nde jwan' ta thita nak na' kon Mbi Nayon, tyono reta goꞌ. Ta aka.