8
Maꞌ nguj xaꞌ lo mnab
1 Mbay naya kab na lo jwanꞌ ta nyaꞌbdiꞌs goꞌ lon kwent chan' maꞌ ta nchuj xaꞌ lo mnab. Liga reta naꞌ mnea naꞌ ke nzolonꞌ jwanꞌ reꞌ; per lo ta jwin nzolo men, jwan'na ndli nchak naro men, nde le' yalke'lazoꞌ ndli nxyen men lo xned Crist.
2 Tez nzo ti xa' ndli xgab jwanꞌ toz nzolo xa', galꞌ diꞌs teraꞌ yolo jwin xaꞌ xa nakpaꞌy.
3 Tez nzo men nkeꞌ lazonꞌ Dios, nzoloa Dios men ya.
4 Per nin lo go', leꞌ jwan' ta wa men bel' maꞌ ta mta'b xa' lo mnab, mnenꞌ leꞌ ti mnab ngen kwan naka lo izyo re', tak benꞌ thipta Dios nzo.
5 Tenyega nzo bro toz jwan' mbez men nak dios, le'y lo beꞌ nde le'y lo izyo, retay nak dios nde retay nak xaꞌ nyebeꞌ,
6 per naꞌ, mnen' benꞌta thipta Dios nzo, Dios ya nak Xud naꞌ, Xaꞌ mdoxkwaꞌ reta jwanꞌ nde naban naꞌ par Xaꞌ. Nde tagaꞌ nzo thipta Xaꞌ Nyebeꞌ, Xaꞌ ya nak Jesucrist, por Xaꞌ sa nzi reta jwanꞌ nde por Xaꞌ sa nzi reta naꞌ.
7 Per naꞌreda men ta ndli lazo'n xki's Dios mne jwanꞌ reꞌ. Tak nzo men mbyen xaꞌ nxoꞌbyek xaꞌ re mnab sa tatka ncha xaꞌ jwanꞌ xajka maꞌ ta nchuj xaꞌ mbe lo mnab nde lo ta ndli xa' jwan'na, zyasa nda'y xgab yek xaꞌ, jwanꞌna ndli nchak bew xaꞌ.
8 Naꞌnakta jwanꞌ ncha men li sa yan' wen men lo Dios; tak te'nyega wa mena na'akta men xa' ntak lo Dios o te'nyega naꞌwad mena na'akta men xa' naꞌntakta lo Dios.
9 Ndawiꞌ toz goꞌ, tak lo ta toyal wa goꞌ re jwanꞌ, jwanꞌna li sa cheb re xaꞌ ta nale' ndo lo xki's Dios.
10 Mbay tez lu mnea jwanꞌ ndlia nde ndob yaa bel' maꞌ jwanꞌ nchuj xaꞌ mblek xaꞌ lo mnab, nde zin ti xaꞌ nale' ndo lo xki's Dios, wiꞌ xaꞌ lu ndob yaa tya ¿Cho naꞌnoda men ya tla xgab yek xaꞌ toyal wa xaꞌ maꞌ jwanꞌ nchuj xaꞌ mbe lo mnab?
11 Nde lo ta mnea jwanꞌ ndlia, jwanꞌna li sa tyaꞌb wes la ta nale' ndo lo xki's Dios nde Crist nguj por xaꞌ.
12 Jwan' re' ndli goꞌ sa ndlya xgab narax yek xaꞌ ta nale' ndo lo xki's Dios nde jwanꞌna ndli nkwanꞌ goꞌ xken goꞌ lo Crist.
13 Jwanꞌ nasa, tezka jwanꞌ nchan ndli sa gab ti wes na lo yalke, mas jwin naꞌwatra na belꞌ maꞌ ta nchuj xaꞌ mbek xaꞌ lo mnab, sa na'gabta wes na lo yalke por xken na.