5
Xomod ak xaꞌ ta ndobno tedibla ngol
1 Liga nzo'b di's le' xij goꞌ nzo jwan' bew, nde axta re men naꞌnzolod Dios naꞌnchenta ndli xaꞌ jwanꞌna, tak rida ndli go' nzo ti go' xija ndobno leꞌga ngol xud naꞌ.
2 ¡Leꞌ goꞌ che'la ngenkwan ndyak go'y! ¿Cho naꞌndabloda mas jwin ta' xgaba yek goꞌ, sa ko'te go' xa' ta ndli jwan' xkapa xij goꞌ?
3 Di's gal'pa, te'nyega naꞌndod yub na, per xbin na ndoga, nde mblila na xgab xomod ak chan' xa' ta ndli jwan' xkapa.
4 Senꞌ lo thita dyopbe goꞌ lo le Jesucrist Xaꞌ Nyebeꞌ lon', nde yalne chanꞌ Jesús Xaꞌ Nyebeꞌ lon' li sa non tyo tya.
5 Le' xa' ta ndli jwanꞌ xkapa tayaꞌ go' xa' lo Maxuꞌ sa lux re jwan' ndryo' lazo' bel' xaꞌ, leꞌ xbin xaꞌ lyaꞌ senꞌ sin beꞌ yeꞌd Jesús, Xaꞌ Nyebeꞌ.
6 Naleꞌda nak ta nxyalꞌ goꞌ. ¿Cho naꞌnyed goꞌ nzo ti diꞌs nchab: “lud levadur ndli ndyebes dib koꞌb”?
7 Jwanꞌ nasa, bloꞌte goꞌ xaꞌ ta nak xa nak levadur gox xij go', sa ak goꞌ xa nak koꞌb kub jwanꞌ naꞌngenta lebadur ta ncha men lo ni pask. Tak Crist nak Mbak Xilꞌ yen' ta nguj sa mbyax reta xken naꞌ.
8 Jwanꞌ nasa, lo linꞌ ni pask, naꞌlid naꞌy kon lebadur gox, nekla kon lebadur chanꞌ jwanꞌ narax nde lebadur chanꞌ jwanꞌ xkap, cheꞌla li neꞌy kon pan naꞌngenta lebadur jwanꞌ nak jwan' galꞌ nde jwanꞌ lipa.
9 Yeꞌs ta mkeꞌn lo goꞌ, tya mbez na; naꞌsal'tad goꞌ re xaꞌ ta ndli jwan' xkap,
10 na'nakte thiptane na'sal'tad go' re xa' lo izyo re', re xaꞌ ta ndli jwan' xkap, re xaꞌ ta ndyaꞌblaꞌs keno masraꞌ jwanꞌ, re xaꞌ wanꞌ o re xaꞌ ta nxobyek re mnab, tak tez thiptane na'sal'tad goꞌ re xaꞌ ya, nakinꞌ ryoꞌte goꞌ lo izyo reꞌ.
11 Jwanꞌ mkeꞌn lo goꞌ nak, naꞌsal'tad goꞌ kon nek thib xaꞌ ta mbez nak wes, nde ndli xa' jwan' xkap, o re xaꞌ ta ndyaꞌblaꞌs keno re jwanꞌ, o xaꞌ nxobyek re mnab, xaꞌ nkeꞌde xis men, xaꞌ guy, o xaꞌ wanꞌ. Re xaꞌ ta ndli jwan' reꞌ, ana'tyob go' wa goꞌ kon xaꞌ.
12 Tak ¿Cho nak na sa goxyon re xaꞌ ta teraꞌ li lazonꞌ Dios? ¿Cho naꞌnakiꞌnta nerla koxyo goꞌ re xaꞌ ta ndli jwanꞌ narax nzo xij goꞌ ba?
13 Tak re xaꞌ ta teraꞌ li lazonꞌ Dios, Dios nyaꞌb kwent lo xaꞌ. Jwanꞌ nasa, bloꞌte goꞌ xaꞌ xkapa xij goꞌ.