10
Mbez Pab yek re men ta ndli lazonꞌ mnab
1 Wes na, ptan na, naꞌncholasta na yaj yek goꞌ jwanꞌ mbriꞌd re xaꞌ gox lonꞌ ngo pola, senꞌ ngo reta xaꞌ xanꞌ xkow nde reta xaꞌ mbriꞌd lenꞌ nittoꞌ.
2 Reta xaꞌ mbroꞌle lenꞌ xkow nde lenꞌ nittoꞌ sa thita ngok xaꞌ kon Moisés.
3 Thibneta jwanꞌ mdaꞌ Dios mda reta xaꞌ.
4 Nde thibneta nit mdaꞌ Dios nguꞌ reta xaꞌ. Tak leꞌ xaꞌ nguꞌ nit ndryoꞌ lad ke jwanꞌ mdaꞌ Dios, ke ta mketenke xis xaꞌ nde ke ya nak Crist.
5 Nde tenyega reta jwanꞌna mbli Dios por xaꞌ, bro toz xaꞌ naꞌmblida jwanꞌ ndryoꞌ lazoꞌ Dios, jwanꞌ nasa nguj xaꞌ nde mbyanꞌ xaꞌ izyo biz.
6 Reta jwanꞌ reꞌ ngok sa teꞌd naꞌ, naꞌtyablaꞌsta naꞌ jwanꞌ narax, ta xa mbli re xaꞌ gox lonꞌ ta mbre pola.
7 Nekla xobyek goꞌ re mnab, ta xa mbli pla re xaꞌ gox lonꞌ ta ngo pola, nde xa nchabka lo xkiꞌs Dios: “Reta men mdob mda, nguꞌ xaꞌ nit, nde mbli xaꞌ ni.”
8 Nekla lin' re jwan' bew kon men na'nakta sal' na', jwanꞌ xa mbli pla xaꞌ gox lonꞌ ta ngo pola, nde lenꞌ ti wizta nguj gal bson mil xaꞌ.
9 Nekla liben' Crist, jwanꞌ xa mbli pla xaꞌ gox lonꞌ ta ngo pola nde nguj xaꞌ tak mkeꞌ mbelꞌla cho xaꞌ.
10 Nekla ni narax goꞌ xis Dios jwanꞌ xa mbli pla xaꞌ gox lonꞌ ta ngo pola, mni xaꞌ xis Dios nde mbyeꞌd áng chanꞌ yalguj, mbij áng xaꞌ.
11 Reta jwanꞌ reꞌ mbriꞌd re xaꞌ gox lonꞌ ngo pola, nde ngey lo yeꞌs sa mbeza yek reta naꞌ ta nzi lult tyemp re'.
12 Jwanꞌ nasa, men jwan' ndli xgab galꞌ ndo, ndawiꞌ toz xaꞌ naꞌgab xaꞌ.
13 Re prueb ta ndoriꞌd goꞌ, retka men ndri'da. Per gal' nak Dios naꞌtaꞌd Xaꞌ diꞌs tokil' jwan' narax goꞌ, re jwanꞌ naꞌxekta goꞌ. Cheꞌla senꞌ lo ntokil' jwanꞌ narax goꞌ, Dios la'sto go' sa ryoꞌte goꞌ lo jwanꞌna, nde tamod li goꞌ gan xek goꞌ.
14 Jwanꞌ nasa, wes na, ptan na, nkeꞌ lazoꞌn goꞌ, bxonꞌ goꞌ lo re jwanꞌ chan' mnaba.
15 Todi'snon goꞌ xajka men nchena, sa toyal yenꞌ goꞌ jwanꞌ ndej na.
16 Lo senꞌ nchunꞌ kop chan' yalwen nde ndanꞌ dyux lo Dios, ¿Cho najwanꞌnada ndli sa thita nak naꞌ lo ren chanꞌ Crist? Nde lo senꞌ nchanꞌ pan jwanꞌ ndlirol naꞌ, ¿Cho najwanꞌnada ndli sa thita nak naꞌ lo belꞌ Crist?
17 Nde te'nyega brotoz naꞌ, thita pan ncha reta naꞌ sa jwanꞌna ndli thita nak naꞌ.
18 Bwiꞌ goꞌ xa' Israel, sen' ncha xa' belꞌ ma' yon, thita nak xa' kon ten' nayon jwan' ta nchuj xa' ma'.
19 ¿Cho kwan nak jwan' ta ncholas na tej na lo go' re'? na'nit na lo go' ke re mnaba ntaka, nekla ntak re bel' ma' yon ta nchuj xa' ndaya' xa' lo mnab.
20 Jwanꞌ nin lo goꞌ nak, re xaꞌ ta naꞌnzolod Dios, lo senꞌ nchuj xaꞌ maꞌ jwanꞌ mbek xaꞌ lo re mnab, naꞌngelid xaꞌy lo Dios leꞌ xaꞌ ngeliy lo re mbi narax, nde nanchola'sta na thita ak go' kon re mbi narax.
21 Naꞌnyed gu goꞌ kop chanꞌ Xaꞌ Nyebeꞌ, nde kop chanꞌ re mbi narax; naꞌnyeda wa goꞌ jwanꞌ nzo lo mes chanꞌ Xaꞌ Nyebeꞌ nde wa goꞌ jwanꞌ nzo lo mes chanꞌ re mbi narax.
22 ¿Cho ncholaꞌs naꞌ linꞌ sa ak no lazoꞌ Xa' Nyebe'? ¿Cho ndyak goꞌ mas nenꞌ ke Xa'?
Li men reta jwan' sa li naro men Dios
23 Reta jwanꞌ toyal lin, per na'rede li sinꞌ, nde liga retay toyal lin per na'rede li xyen na lo xkiꞌs Dios.
24 Naꞌndabloda kwanꞌ men yalwen benꞌ par leꞌga men, ndablo kwanꞌ mena par masraꞌ xaꞌ.
25 Reta belꞌ ta ntho xaꞌ, toyal wa goꞌy, nde naꞌnyabdiꞌsta goꞌ plo ndey sa naꞌlyad xgab narax yek goꞌ;
26 tak chanꞌ Xaꞌ Nyebeꞌ nak dib nax izyo nde chanꞌ Xaꞌ nak reta jwanꞌ nzi lo izyo.
27 Tez ti xaꞌ naꞌnzoloda Dios, kwez xaꞌ goꞌ lo yalwa, wa goꞌ tez ncholaꞌs goꞌ ya goꞌ, bda goꞌ reta jwanꞌ kwek xaꞌ lo goꞌ, nde naꞌnyabdiꞌsta goꞌ plo ndey sa naꞌlyad xgab narax yek goꞌ.
28 Nde tez nzo xaꞌ nye lo goꞌ: “Belꞌ maꞌ mbij xaꞌ mbre lo mnab jwan' re'” naꞌwad goꞌy, tak mdejla xaꞌ xomod naka, nde mne goꞌ xgab jwanꞌ ndono xaꞌ. Tak chanꞌ Xaꞌ Nyebeꞌ nak dib nax izyo nde chanꞌ Xaꞌ nak reta jwanꞌ nzi lo izyo.
29 Na ndotej xgab tedib xaꞌ ya, naꞌnit na, goꞌ ndli xgab ya.
Nzo goꞌ nye lon: “¿Cho kwan liy sa xgab tedib xaꞌ ya li sa naꞌtoyalta wan jwanꞌ taꞌ xaꞌ?
30 Nde tez ndan dyux lo Dios lo re jwanꞌ nchan ¿Cho kwan liy koxyo xaꞌ na lo wa ney?”
31 Jwanꞌ nasa, tez wa goꞌ cho jwanꞌ o gu goꞌ cho nit o choja tedib jwanꞌ li goꞌ, bli goꞌy sa li naro goꞌ Dios.
32 Naꞌakta lu jwanꞌ cheb re xaꞌ judí, re xaꞌ naꞌnakta judí nde re xaꞌ yodoꞌ chanꞌ Dios.
33 Ta xa na reꞌ, nchal na ngo nalen lazoꞌ re men lo reta jwanꞌ, naꞌnkwanta na benꞌ jwanꞌ li wen lon, leꞌn nkwan yalwen chanꞌ masraꞌ men, sa lyaꞌ men.