23
1 Zyasa xe mbwiꞌ Pab lo re xaꞌ nak sinꞌ nde nchab Pab:
—Wes na, axta nawiz reꞌ tatka kon xgab nambi ndon lo Dios.
2 Leꞌ Ananías mbol ngwleyꞌ ro, mnabeꞌ lo re xaꞌ nzi gax tya sa mdis xaꞌy ro Pab.
3 Zyasa nchab Pab:
—¡Dios keꞌy choa, xaꞌ kwinꞌ! Ndob la sa nyaꞌb la kwent lon xa ngeni ley nde leꞌga lu mdiꞌs la ley tak mnabeꞌa mdis xaꞌy ron.
4 Leꞌ re xaꞌ nzi tya nchab lo Pab:
—¿Cho kwan liy nixin la lo mbol ngwleyꞌ ro xaꞌ ndli sinꞌ lo Dios?
5 Leꞌ Pab mkab:
—Wesa, naꞌnyet na cho ngwleyꞌ ro nak xaꞌ; tak lo xkiꞌs Dios nchab:
—Naꞌnixinta lu xis mdan lo yez la.
6 Senꞌ mne Pab ke rol xaꞌ nzi tya nak saduceo nde rol xaꞌ nak fariseo, ne mni Pab lo re xaꞌ, nchab Pab:
—Wesa, na nak fariseo xinꞌ ti xaꞌ fariseo, nde mbezke goꞌ lon tak ndli lazoꞌn ryoꞌxban re men nguj.
7 Senꞌ ta nchab Pab, leꞌ re xaꞌ fariseo nde re xaꞌ saduceo tolo ngwa xa' kwent nde ngok rol xaꞌ.
8 Tak re xaꞌ saduceo mbez naꞌryoꞌxbanta re men nguj nekla naꞌngenta re anj nde neka re xbi, mbay re xaꞌ fariseo ndli lazoꞌ xaꞌ reta jwanꞌna.
9 Nde anta che'pa mbez reta xaꞌ, zya mdoli pla xaꞌ fariseo xaꞌ nak maestr ndloꞌ ley xkiꞌs Dios, nchab xaꞌ:
—Nek thib yalke naꞌngasalta náꞌ ndli mbiꞌ reꞌ, tak tez nzo cho xbi o anj mni lo xaꞌ, na'ke'd na' yalbyo kon Dios.
10 Nde jwanꞌ toz nzi yakbxol re xaꞌ, zyasa leꞌ mbol nyebeꞌ lo re sondad mzyeb xaꞌ yoloa naxguj xaꞌ Pab, zya mnabeꞌ xaꞌ mbyeꞌd pla sondad sa mblote xaꞌ Pab xija nde mbeꞌ xaꞌ Pab tenꞌ nzi re sondad.
11 Lo tedib yalꞌ, mbroꞌto Xa' Nyebe' lo Pab nde nchab Xa':
—Blo ne lazoꞌa Pab, ta xa mdej la xkiꞌs na yez Jerusalén, tagaꞌ nakiꞌn tej lay yez Rom.
Mbyanꞌdiꞌs re xaꞌ kuj xaꞌ Pab
12 Senꞌ mduxni tedib wiz zya mdyop pla xaꞌ judí, thita ngok diꞌs xaꞌ mxo'b xa' de xis xaꞌ mda' xa' xki's xa' na'wat xaꞌ neka gu xaꞌ nit axta kebeꞌ li xaꞌ gan gaj Pab.
13 Masraꞌ ti choꞌ xaꞌ mkeꞌyek jwanꞌna,
14 re xaꞌ reꞌ ngwa lo re ngwleyꞌ jwanꞌ nyebeꞌ nde lo re xaꞌ nak sinꞌ lo men judí, nchab xaꞌ:
—Reta náꞌ mxo'b de náꞌ xis náꞌ mdaꞌ náꞌ xkiꞌs náꞌ, ngenta kwan wa náꞌ, axta kebeꞌ li náꞌ gan gaj Pab.
15 Leꞌ naya, re goꞌ kon re xaꞌ nak sinꞌ, mnaꞌb goꞌ lo mbol nyebeꞌ lo sondad sa yeꞌdno xaꞌ Pab lo goꞌ yeꞌ, benꞌta guz goꞌ lo xaꞌ, náꞌ ncholaꞌs jwin nye náꞌ xomodpa nak kwent chanꞌ Pab, nde leꞌ re náꞌ nzisaꞌa náꞌ ned sa kuj náꞌ Pab.
16 Leꞌ mbyo xinꞌ ptanꞌ Pab, mbin mbyo ta ndyodiꞌs xaꞌ yogo'd xaꞌ ned, zya ngwa mbyo tenꞌ nzi re sondad nde nchab mbyoy lo Pab.
17 Leꞌ Pab mbrez ti xaꞌ nyebeꞌ lo sondad, nde nchab Pab lo xaꞌ:
—Beꞌ mbyo reꞌ lo mbol jwanꞌ nyebeꞌ lo re sondad, tak nakinꞌ toz tej mbyo ti jwanꞌ lo xaꞌ.
18 Zyasa ngwano xaꞌ mbyo lo mbol nyebeꞌ nde nchab xaꞌ:
—Pab xaꞌ ta nge lizyiꞌb, mbrez xaꞌ na nde mnaꞌb xaꞌ lon sa ndenon mbyo reꞌ, tak ngeno mbyo ti jwanꞌ tej mbyo loa.
19 Leꞌ mbol nyebeꞌ mxen xaꞌ yaꞌ mbyo, mbeꞌ xaꞌ mbyo tedib lad nde tya mnabdiꞌs xaꞌ lo mbyo, nchab xaꞌ:
—¿Cho kwan ncholaꞌs la tej la lon?
20 Leꞌ mbyo nchab:
—Re xaꞌ judí thita ngok diꞌs xaꞌ sa yeꞌdnaꞌb xaꞌ lo goꞌ, ke yeꞌ we goꞌ Pab lo re xaꞌ nak sinꞌ, xajka men jwanꞌ jwin ncholaꞌs nye xomod nak yalke chanꞌ Pab.
21 Per naꞌlid lazoꞌ goꞌy, tak masraꞌ choꞌ xaꞌ nzisaꞌla towꞌ ned, nde mxo'b xa' de xis xaꞌ mdaꞌ xaꞌ xkiꞌs xaꞌ naꞌwad xaꞌ neka gu xaꞌ nit, axta kebeꞌ kuj xaꞌ Pab. Nde naya nzisaꞌa xaꞌ benꞌta ngembed xaꞌ nyenꞌ kwan gab goꞌ.
22 Zyasa mbloned mbol mbyo ndyar nde mnabeꞌ mbol lor sa ngenta cho lo gab or jwanꞌ ngwatner lo mbol.
Mtelꞌ xaꞌ Pab lo Félix xaꞌ nyebeꞌ ro
23 Leꞌ mbol nyebeꞌ lo re sondad, mbrez xaꞌ chop sondad xaꞌ jwanꞌ nyebeꞌgaꞌ, sa nyabeꞌ xaꞌ, kwesaꞌ chop ayoꞌ sondad tye ni, songal nzo siꞌ sondad tyob way nde chop ayoꞌ sondad we yi'b nalé xinꞌ, sa ya xaꞌ yez Cesarea hor ye' yalꞌla,
24 nde mnabeꞌ xaꞌ ngoxab ti way tyob Pab sa naxuta we xaꞌ Pab lo Félix, xaꞌ nyebeꞌ ro.
25 Nde mkeꞌ xaꞌ ti yeꞌs jwanꞌ nchab:
26 “Na, Claudio Lisias, ngeke'n yeꞌs reꞌ loa Félix, xaꞌ nyebeꞌ ro, dyux nin loa.
27 Re xaꞌ judí mxen xaꞌ mbiꞌ reꞌ nde ncholaꞌs xaꞌ kuj xaꞌ xaꞌ, per senꞌ mbin na xaꞌ Rom nak xaꞌ, zya ngwatolaꞌn xaꞌ kon re sondad na.
28 Nde ncholas na nyen cho yalke nchap xaꞌ sa mben xaꞌ lo re xaꞌ nak sinꞌ lo men judí.
29 Nde ngosi'b na, leꞌ yalke jwanꞌ nkeꞌ re men yek xaꞌ nak, leꞌga kwent chanꞌ ley jwanꞌ nzino xaꞌy nde naꞌnakte yalke jwanꞌ nzalꞌ gaj xaꞌ, o ya xaꞌ lizyiꞌb.
30 Per mbin na, leꞌ re xaꞌ judí ngok diꞌs xaꞌ kuj xaꞌ mbiꞌ reꞌ, jwanꞌ nasa zyaga mtel na xaꞌ loa nde gab na lo re men jwanꞌ nkeꞌ yalke yek xaꞌ, sa loa yatej xaꞌ nyenꞌ kwan nak yalke. Ba ndesalꞌ naꞌ.”
31 Zyasa reta sondad mbli xaꞌy axa mnabeꞌ xaꞌ nyebeꞌy lo xaꞌ, yalꞌ mbeꞌ xaꞌ Pab nda xaꞌ yez Antípatris.
32 Nde tedib wiz leꞌ re sondad ta nda ni ya mbere xaꞌ tenꞌ nziga xaꞌ nde leꞌ re sondad ta ndob way ndanoga xaꞌ Pab.
33 Senꞌ mzin xaꞌ yez Cesarea, mda'yaꞌ xaꞌ yeꞌs lo Félix xaꞌ nyebeꞌ ro nde tagaꞌ mda'yaꞌ xaꞌ Pab.
34 Senꞌ ngolo mblab Félix yeꞌs, mnabdiꞌs xaꞌ cho yez nde Pab, sen' lo mne xaꞌ leꞌ Pab nak men Cilisia,
35 nchab xaꞌ lo Pab:
—Senꞌ yeꞌd re xaꞌ jwanꞌ nkeꞌ yalke yek la zyasa tej la lon xomod nak kwent chanꞌ la.
Zyasa mnabeꞌ xaꞌ jwin kenap xaꞌ Pab tenꞌ ndob yolow chanꞌ Herodes.