14
Pab kon Bernabé ngete yez Iconio
1 Tenꞌ nak yez Iconio, Pab kon Bernabé ngote rop xaꞌ lenꞌ yo tenꞌ ndyop re men judí sa mdodi's xaꞌ xkiꞌs Dios lo re men nde bro toz re xaꞌ judí nde re xaꞌ na'nakta Israel mbli lazoꞌ xaꞌy.
2 Per re xaꞌ judí jwanꞌ naꞌndlid lazonꞌ Jesús, mtokilꞌ xaꞌ re men naꞌnakta Israel sa mbyiꞌno xaꞌ re men ndli lazonꞌ Jesús.
3 Nde tenye ta naka, bro tyemp ngo Pab kon Bernabé yez ya nde mdob xgab xaꞌ lo Xaꞌ Nyebeꞌ naꞌnzyepta xaꞌ ndyodiꞌs xaꞌ xkiꞌs Dios, leꞌ Xaꞌ Nyebeꞌ ndloꞌ ke liga re yalwen chanꞌ Xa' jwanꞌ ndyodiꞌs Pab, nde ndaꞌ Xaꞌ Nyebeꞌ yalne lo rop xa' sa ndli xaꞌ re yalnaro jwanꞌ nzoyen men.
4 Nde re men nzo yez ya ngok rol xaꞌ, nzo xaꞌ ndo kon re xaꞌ judí nde nzo xaꞌ ndo kon rop apóst.
5 Zyasa re xaꞌ judí nde re xaꞌ nanakta judí thipta ngok diꞌs xaꞌ kon re xaꞌ nak sinꞌ lo yez, sa toti xaꞌ nde gadke xaꞌ rop xaꞌ ta nak apóst.
6 Senꞌ mbin rop apóst jwanꞌ reꞌ, mxonꞌ xaꞌ nda xaꞌ yez Listra nde yez Derbe, yez jwanꞌ nzi lo xyon Licaonia nde noga nda xaꞌ reta re yez jwanꞌ nzi gax tya,
7 nde tya mdej xaꞌ diꞌs wen chanꞌ Jesucrist lo re men.
Mbwad ke xaꞌ Pab yez Listra
8 Yez Listra nzo ti mbiꞌ naꞌndyeda. Xata ngol xa nayiz ni xaꞌ jwan' nasa na'ndyed xa'. Mbiꞌ reꞌ ndob tya,
9 ndoyon xaꞌ re diꞌs ni Pab, zya mbwiꞌ Pab lo xaꞌ tak mne Pab ndlipa lazoꞌ xaꞌ dyanꞌ xaꞌ,
10 nde ne mni Pab, nchab Pab:
—¡Ptolí nde gal' pto nia!
Leꞌ mbiꞌ ya ngwat xa' nde mde xaꞌ.
11 Senꞌ mbwiꞌ re men jwanꞌ mbli Pab, zyasa ne mbrez reta xa', kon xki's men lo xyon Licaónica, nchab xaꞌ:
— ¡Dios nak re mbi' ta mzin lon' reꞌ!
12 Bernabé mblole xaꞌ Júpiter nde Pab mblole xaꞌ Mercurio, tak Pab jwanꞌ ndo ye' diꞌs.
13 Zyasa ngwleyꞌ chanꞌ Júpiter ngeno xaꞌ yodonꞌ xaꞌ ndob ngoꞌ lo yez sa ndeno xaꞌ ngon nde yeꞌ, thipta nde xaꞌ kon reta men, ncholaꞌs xaꞌ kuj xaꞌ maꞌ yon jwanꞌ taꞌ xaꞌ lo Pab kon Bernabé.
14 Senꞌ mne Bernabé kon Pab jwanꞌna, mched xaꞌ xab xaꞌ nde ngote xaꞌ xij reta men, ne mbrez xaꞌ,
15 nchab xaꞌ: —¡Reta go' ba! ¿Cho kwan liy ndli goꞌ jwanꞌ reꞌ? Rop náꞌ reꞌ, tagaꞌ men nak náꞌ xa nak goꞌ ba, jwanꞌ nasa ndetej náꞌ lo goꞌ, blaꞌ goꞌ re mnab ta ngencho sin' li nde bli lazoꞌ goꞌ Dios naban, Xaꞌ ta mdoxkwaꞌ beꞌ nde izyo, nittoꞌ, nde reta jwanꞌ nzi lo kad thibay.
16 Pol lin'na' mdaꞌ Dios diꞌs kad men ban men axa ncholaꞌs men,
17 per thibka ndloꞌ Dios cho nak Dios, por re jwanꞌ wen ndli Xaꞌ; leꞌ Xaꞌ ndla yi ndryoꞌ lo beꞌ, sa nawe nchak re jwanꞌ bin, thiblaꞌ nzo jwanꞌ ncha men sa nale nzo lazoꞌ men.
18 Tenye nchab Pab kon Bernabé reta jwanꞌna, nen toz sa mbli xaꞌ gan mtowꞌ xaꞌ lo re men sa naꞌngujta men maꞌ yon lo xaꞌ.
19 Zyasa mzin pla xaꞌ judí mbroꞌ yez Antioquí nde Iconio, mblo xaꞌ yek reta men sa mzyeꞌ xgab men nde mbwadke xaꞌ Pab, ngolo jwanꞌ reꞌ mdoꞌbnyo xaꞌ Pab axta ro yez, tak mbli xaꞌ xgab nguj Pab.
20 Leꞌ re xaꞌ jwanꞌ ndli lazonꞌ Jesús mdyop xaꞌ tenꞌ nax Pab, zya ngoche Pab nde nda Pab lenꞌ yez. Senꞌ mduxni tedid wiz mbroꞌ Pab tya kon Bernabé nde nda xaꞌ yez Derbe.
21 Senꞌ ngolo mdej xaꞌ diꞌs wen chanꞌ Jesucrist dib yez Derbe, mbli xaꞌ gan bro toz men mbli lazoꞌ xaꞌ Jesús. Zyasa mbere Pab kon Bernabé yez Listra, yez Iconio nde yez Antioquí.
22 Re yez ya mketegone xaꞌ lazoꞌ re men jwanꞌ ndli lazonꞌ Dios, ntoni xaꞌ re men ya sa naꞌlad xaꞌ thibla' tyo xaꞌ lo jwanꞌ ndlipa lazoꞌ xaꞌ, sa nchab Pab kon Bernabé lo re xaꞌ, ndabloga rid men lo reta yalti sa yote men lo yalnyebeꞌ chanꞌ Dios.
23 Nde kad yodo' mbloꞌ xaꞌ re xa' nak sinꞌ gol , senꞌ mne mnaꞌb xaꞌ lo Dios nde mne mbli xaꞌ yalse, mdaꞌyaꞌ xaꞌ re men ya lo Jesucrist Xaꞌ ta ndli lazoꞌ xaꞌ.
Pab kon Bernabé mbere yez Antioquía lo xyon Siria
24 Xisa mbriꞌd ndab Pab kon Bernabé lo xyon Pisidia nde mzin xaꞌ lo xyon Panfilia,
25 nde senꞌ ngolo mdej xaꞌ xkiꞌs Dios yez Perge, nda rop xaꞌ yez Atalia.
26 Tya mxen xaꞌ bark ndya xaꞌ yez Antioquí, tenꞌ ta re xa' nak wes mdaya' xa' xaꞌ lo Dios sa ya tej xaꞌ xkiꞌs Dios nde sin' ya jwan' ngolo mbli xaꞌ.
27 Senꞌ mzin xaꞌ Antioquí, mthop xaꞌ reta men nzi yodoꞌ nde mdej xaꞌ plopa yalnaro mbli Dios lo xaꞌ nde xa mxyalꞌ yala jwan' li lazo' xa' lo re men naꞌnakta judí sa no re men ya mkayaꞌ xa' xkiꞌs Dios.
28 Nde bro tyemp ngo Pab kon Bernabe tya, kon re men jwanꞌ ndli lazonꞌ Dios.