5
Tu guich len Bönniꞌ naquëꞌ Böꞌcuꞌ Zxílaꞌdauꞌ
1 Niꞌr bléꞌidaꞌ tu guich lu naꞌ yubél Nu naꞌ röꞌ latj blau. Guich naꞌ nac tu guich nudúb, len daꞌ didzaꞌ lëꞌil len lahuil. Naguel‑laꞌ guich naꞌ gadx le nuseyjgac lei.
2 Bléꞌidaꞌ‑nëꞌ tuëꞌ gbaz laꞌy blau, atiꞌ bëꞌë zidzj didzaꞌ, gnëꞌ: “¿Nuzxa nac lsacaꞌ uladzuꞌ le naguél‑laꞌgac guich ni len gsalj lei?”
3 Nutu nu guc gsalj guich naꞌ len cutu guc nu uyú lei, nitú nu zoa yehuaꞌ yubá, len nitú nu zoa luyú, len nitú nu zoa zxanil luyú.
4 Niꞌr grödxaꞌ le cutu bdzöli nu nac lsacaꞌ gsalj guich naꞌ, len cutu bdzöli nu nac lsacaꞌ uláb lei, len nutu nu nac lsacaꞌ uyú lei.
5 Niꞌr gudxëꞌ nedaꞌ tuëꞌ bönniꞌ gul niꞌ, gnëꞌ: “Cutu cödxuꞌ. Nu naꞌ nac ca bëdx guixiꞌ, Nu nabablen zxiꞌn xsoëꞌ Judá, len nac caꞌ zxiꞌn xsoëꞌ David, chbuxícj lu yúguꞌtë le rac, len saquiꞌ uladzuꞌ le naguél‑laꞌgac guich ni len gsalj lei.”
6 Niꞌr bléꞌidaꞌ‑nëꞌ Bönniꞌ naquëꞌ Böꞌcuꞌ Zxílaꞌdauꞌ, zuinëꞌ lahuiꞌ lau latj blau naꞌ zoa gatsj lahuiꞌl nup naꞌ nabangac len gatsj láhuiꞌlëꞌ caꞌ bönniꞌ gul naꞌ. Naquëꞌ huëꞌ ca nac qui böꞌcuꞌ zxilaꞌ zoa nu budödi lëbaꞌ, nacuáꞌ gadx luzbaꞌ len gadx yöj laubaꞌ, le tuꞌluíꞌ ca nacgac gadx böꞌ naꞌ dzaggac Dios, nasölëꞌë leygac gdutë yödzlyú.
7 Gdödëꞌ Bönniꞌ naquëꞌ Böꞌcuꞌ Zxílaꞌdauꞌ len gdel‑lëꞌë guich naꞌ lu naꞌ yubél Nu naꞌ röꞌ latj blau naꞌ.
8 Catiꞌ chgdel‑lëꞌë guich naꞌ, guluzechu zxibquëꞌ lahuëꞌ Bönniꞌ naꞌ naquëꞌ Böꞌcuꞌ Zxílaꞌdauꞌ idáp nup naꞌ nabangac len idáp uruꞌë bönniꞌ gul naꞌ. Zönquëꞌ le rul‑l nazíꞌ lei arpa tu tuëꞌ bönniꞌ gul naꞌ, len nuaꞌquëꞌ caꞌ yuguꞌ bdxiꞌ náquicni oro, yúdzugac yal, lë naꞌ ruluíꞌ yöl‑laꞌ rulídz Dios quegac bunách queëꞌ.
9 Tul‑lëꞌ tu le rul‑l yöl‑laꞌ ba, le nac cub, le rna cni:
Nacuꞌ lsacaꞌ quel‑luꞌu guich
Len uladzuꞌu le naguél‑laꞌgac lei
Le bëꞌu latj bönniꞌ guludöddëꞌ Liꞌ,
Atiꞌ len xchönuꞌ böaꞌuuꞌ bunách quië laqui queëꞌ Dios,
Nacgac bunách gzaꞌa nacuáꞌ gdutë yödzlyú,
Bunách tuiꞌ yúguꞌtë didzaꞌ yubl,
Len nababgac yúguꞌtë yödz len yúguꞌtë luyú nacuáꞌ gdutë yödzlyú.
10 Benuꞌ ga nacquëꞌ bönniꞌ uná bëꞌ
Len ga nacquëꞌ bxuz queëꞌ Dios queëruꞌ.
Benuꞌ ga taꞌná bëꞌë yödzlyú.
11 Niꞌr buyúaꞌ len byöndaꞌ chiꞌiquëꞌ zian gbaz laꞌy. Gayuáꞌ len gayuáꞌ nacuꞌë. Nacuꞌë gdu zbiꞌil latj blau naꞌ tsazxö́n len nup naꞌ nabangac lencaꞌ len yuguꞌ bönniꞌ gul naꞌ.
12 Tuꞌë zidzj didzaꞌ yúguꞌtëꞌ, taꞌnë́ꞌ:
Bönniꞌ naꞌ naquëꞌ Böꞌcuꞌ Zxílaꞌdauꞌ, guludöddëꞌ‑baꞌ,
Naquëꞌ lsacaꞌ gataꞌ lu nëꞌë yöl‑laꞌ uná bëꞌ
Len yöl‑laꞌ tsahuiꞌ
Len yöl‑laꞌ rejniꞌi
Len yöl‑laꞌ huac.
Naquëꞌ lsacaꞌ gunruꞌ‑nëꞌ ba laꞌn
Len tsej ládxiꞌruꞌ Lëꞌ
Len cuꞌruꞌ‑nëꞌ yöl‑laꞌ ba.
13 Niꞌr byöndaꞌ tul‑l yúguꞌtë bi benëꞌ Dios yehuaꞌ yubá len yödzlyú, len zxanil luyú len lu nis zxön. Tul‑l yúguꞌtë bi nacuáꞌ yuguꞌ latj naꞌ, taꞌná:
Yöl‑laꞌ ba Nu naꞌ röꞌ latj blau,
Lencaꞌ Bönniꞌ naꞌ naquëꞌ Böꞌcuꞌ Zxílaꞌdauꞌ.
Gúnteczruꞌ‑nëꞌ ba laꞌn
Len cúꞌteczruꞌ‑nëꞌ yöl‑laꞌ ba,
Atiꞌ gna bë́ꞌteczëꞌ Lëꞌ.
14 Idaptë nup naꞌ nabangac taꞌná: “Caꞌ gac.”
Niꞌr idáp uruꞌë bönniꞌ gul naꞌ gulutság lauquëꞌ lyu len gulayíj ládxiꞌquëꞌ Nu naꞌ zoatecz.