4
Diosen' none' da' gon to tocho cont chaclen ḻježcho
1 Criston' goque' beṉe' bela' chen na' gwxaca'zi'e yežlio nga, da'nan' chio' cheyaḻa' gonc̱hac̱hlaže'cho bi gacžejlaže'cho cate' saca'zi'cho. Goncho ca', ḻe cate' ba gwzaca'zi'cho chaclenen bich chzenagcho c̱he da' malen'.
2 Na' še bi chzenagcho c̱he da' malen' šlac ṉe' mbancho, nach soa cuezcho bi goncho da' mal da' žan gon chio' beṉac̱h, san soa cuezcho goncho con can' chazlaže' Diosen'.
3 Cana' gwzoale benḻe con can' cheson beṉe' bi chesejnilaže' Diosen'. Benḻe da' nac yeḻa' zto', benḻe bite'teze da' mal da' gwzelaže' lažda'olen', gwzožele, benḻe no žaš len ḻṉi c̱helen' na' güe'ejchguale, na' gwyejnilaže'le ḻ gua'a ḻsaca' da' ca' gwna Diosen' bi cheyaḻa' šejnilaže'chon.
4 Na' beṉe' ca' ṉe' cheson ca' chesyebande' bich chonḻe txen len ḻegaque' can' chesaše' chosožiayi' cuingaque', nach chesezi'diže' le'e.
5 Perw žin ža cate' Diosen' ṉabyožde' ḻegaque' c̱he yogo'ḻoḻ da' ba gosone', Dios ben' chbeze' c̱hogbi'en nac gac c̱he beṉe' zjamban len beṉe' ca' ba gosat.
6 Ḻe da'nan' gwseḻe' beṉe' goseyix̱jue'ede' diža' güen c̱he' len beṉe' ba gosat can' goseyix̱jue'eden' len chio'. Diosen' goclaže' yesenite' mbalaz toḻi tocaṉe' can' zoa ḻe', ḻa'czḻa' nc̱hoglagüen' de yeḻa' got c̱he yogo' beṉac̱h yežlio nga.
7 Ba zoa te c̱he yežlion'. Da'nan' cheyaḻa' soacho len toze xbab na' goncho byen goncho can' chazlaže' Diosen' cont bibi gwžon soacho yoḻ güižchone'.
8 Na' da' nac da' žialaoch, cheyaḻa' gaque ḻježcho do yic̱hj do laže'cho, ḻe cate' chaque ḻježcho chezi'xencho c̱hegaque' bite'teze da' chesonde' chio'.
9 Na' cheyaḻa' gwlebcho beṉe' ḻježcho cate' yeside' ližchon' sin cbi bixjwcho.
10 Con can' ba goclen Diosen' to tocho da' noṉe' chio' grasyw c̱he bi da' chac choncho, can' cheyaḻa' gaclen ḻježcho len dan' choncho. Cheyaḻa' gwc̱hincho bite'teze grasyw da' noṉ Diosen' chio' con can' chaclaže' gwc̱hinchon, ḻe nža' nža'te da' noṉe' c̱he to tocho choncho.
11 Še Diosen' ba none' c̱hecho c̱hix̱jue'echo xtižen', ḻe xtiže' na'zen' cheyaḻa' c̱hix̱jue'echo. Na' še ba none' c̱hecho gaclencho beṉe', cheyaḻa' gaclenchone' do yic̱hj do laže'cho, ḻe Diosen' chone' cont chac chaclenchone'. Cate' bi da' goncho, gonchon ca gacxen Diosen' da' gwseḻe' Jesucriston' len chio'. Zaca'cze' gonxenchone' toḻi tocaṉe na' zaca'cze' ṉabi'e toḻi tocaṉe. Can' gacšca.
Guata' da' saca'zi' chio' chejnilaže'cho Criston'
12 Chacda' le'e beṉe' migw, na' chaclaža' bi yebanele can' chac c̱helen' chosoc̱hi chososaca'chgua beṉe' le'e. Bi naquen da' yebanele, san gwlo'en še da' ḻi chejnilaže'le Diosen'.
13 Cheyaḻa' yebele caten' chzaca'zi'le da' chejnilaže'le Criston', ḻe chac c̱hele can' goc c̱he Criston' caten' gwxaca'zi'e. Ḻe yebe caten' chzaca'zi'le cont ḻecze yebele na' soale mbalaz cate' žin ža le'ele yid Criston' ben' nac beṉe' zaca' juisyw.
14 Mbalaz chac c̱hele ṉa'a cate' chesezi'diža' beṉe' le'e da' chejnilaže'le Criston', ḻe Spiritw c̱he Dios ben' nac beṉe' zaca' juisyw zoan chaclenen le'e. Beṉe' ca' chosoc̱hi chososaque' le'e cheseṉe' mal c̱he Criston', san le'e chonxenḻne'.
15 Na' še saca'zi'le, yejṉi'a gaquen ṉec̱he chonḻe da' güen, gague ṉec̱he da' betwle beṉe' o gwlanḻe da' de c̱he beṉe' o benḻe bichle da' xiṉj o blaže' c̱hele len bi da' chac c̱he beṉe'.
16 Ḻe še saca'zi'le ṉec̱he chejnilaže'le Criston', bi cheyaḻa' gaquele zto' can' chac c̱hele, san cheyaḻa' gonxenḻe Diosen' da' ba chejnilaže'lne'.
17 Ba bžin ža Diosen' ba chone' cont chyi chzaca' chio' naccho xi'iṉe' ṉec̱he bi da' xiṉj da' choncho. Na' dan' chone' ca' zgua'tec len chio' naccho ca beṉe' ḻo' yo'o c̱he', ṉezecho ḻeca gwnežjwche' da' yesezaca'zi' beṉe' ca' bi chosozenag diža' güen c̱hen'.
18 Na' ca nac beṉe' zja'ac to ḻicha, nacchguaze yesyele' bi yesezaca'zi'e toḻi tocaṉe, nach beṉe' bi chesejnilaže' Diosen' na' chesonteze' da' xiṉj, gague bi de da' yosla ḻegaque'.
19 Da'nan' cate' chsi' Diosen' xṉezen' chyi chzaca'cho, cheyaḻa' soacho gonczcho da' güen na' gon cuincho ḻo na' Diosen', ḻe ḻen' bene' chio' beṉac̱h na' zoacze' chaclene' chio'.