7
Dan' chchoj ḻo' laždao' beṉac̱hen' chonen cont laždagüen' bi naquen xilaže' len Diosen'
(Mt. 15:1-20)
1 Nach beṉe' fariseo ca' na' len beṉe' ca' bososed bosolo'e dan' bzoj da' Moisés gosa'aque' Jerusalénṉa' na' ja'aque' gan' zoa Jesúsen'.
2 Na' besele'ede' baḻ beṉe' ca' zjanaque' Jesúsen' txen con gosagüe' ṉeca bosyone'e zan ṉi'a can' chesacde' cheyaḻa' yesone', na' da'nan' gosezi'diže' ḻegaque'.
3 (Ḻe beṉe' fariseo ca' na' yogo' beṉe' Israel gualaž c̱heto' ca' chesonxene' costumbr ca' da' bosyocua'aṉlen da' x̱ozxta'oto' ca' neto' bi yesagüe' še biṉa' yosyone'e zan ṉi'a.
4 Na' cate' yesyežine' lagüe ya'a, bi yesagüe' še biṉa' yosyone'e, na' da' zanch costumbr da' zjana'ogüe', ca no yeseyibe' xiga' ga chese'eje' nis, no yeso' xguague, no yeso' ya na' no xcame'.)
5 Nach beṉe' fariseo ca' na' beṉe' ca' bososed bosolo'ede' dan' bzoj da' Moisésen' goseṉabde' ḻe':
―¿Bixc̱hen' bi cheson beṉe' ca' zjanaque' le' txen can' goson beṉe' gol ca'? san con chesagüe' sin cbi chosyone'e zan ṉi'a.
6 Jesúsen' gože' ḻegaque':
―Chonḻe cayaṉen' bzoj da' Isaíasen' c̱he le'e nacle beṉe' gwxiye' gan' bzoje', žan':
Beṉe' qui chesonxene' neda' len diža' cho'a,
perw bi chesonxene' neda' len lažda'ogaque'.
7 Bibi zejen dan' chesonxene' neda',
ḻe dan' chososed chosolo'eden' naquen da' chnalaže' beṉac̱hze.
8 Bi chonḻe ca chnalaže' Dios, san na'ole can' ža beṉac̱hen' cheyaḻa' gonḻe, chyible no yeso' xguague, no xiga' ga che'ejle nis, na' da' zanch da' chonḻe.
9 Qui gožch Jesúsen' ḻegaque':
―Chbejyic̱hjle da' non Diosen' mandadw gonḻe cont na'ole costumbr c̱he beṉac̱h.
10 Da' Moisésen' gwne': “Ḻe gap bala'aṉ x̱axṉa'le”, na' “Note'teze' še chžia chnite' x̱axṉe'e, cheyaḻa' gate'.”
11 Perw le'e žale to beṉe' guac ye'e x̱axṉe'e: “Bibi de goṉa' gaclena' le'e, ḻe yogo' da' de c̱hia' naquen Corbán” (zeje diža', ba bnežjuen' ḻo na' Dios).
12 Na' žale cate' to beṉe' že' ba naquen ḻo na' Diosen' nach bich cheyaḻa' gaclen x̱axṉe'e.
13 Dan' žale ca' chzoale ca'ale dan' ža Diosen' na' con chonxenḻe costumbr gole c̱he da' x̱ozxta'ole ca'. Na' da' zanch dan' nac ca' chonḻe.
14 Da' yoble gox Jesúsen' beṉe' ca', na' gože' ḻegaque':
―Yogo'le ḻe gwzenag c̱hia', na' ḻe šejni'i.
15 Bite'teze da' ye'ej gagw beṉac̱hen', bi ṉacho ḻen chonen cont lažda'ogüe' bi naquen xilaže' len Diosen'. Dan' chchoj ḻo' lažda'ogüen', ḻenṉa' chonen cont lažda'ogüe' bi naquen xilaže' len Diosen'.
16 Le'e žia nagle da' chene, ḻe gwzenag xtiža'na'.
17 Cate' bsan Jesúsen' bich bšaljlene' beṉe' ca' na' beyo'e ḻo' yo'o, nach beṉe' ca' zjanaque' ḻe' txen goseṉabde' ḻe' bi zejen dan' gože' ḻegaque'.
18 Na' Jesúsen' gože' ḻegaque':
―¿Ḻecze len le'e bi chejni'ile? ¿Bi chejni'ile gague da' ye'ej gagw beṉac̱hen' chonen cont lažda'ogüe' bi naquen xilaže' len Diosen'?
19 Ḻe da' che'ej chagw beṉac̱hen' gague cho'on ḻo' lažda'ogüen', san ḻo' ḻi'en cho'on, na' chžin hor cheden.
Na' da' gwne' ca' zeje diža' bite'teze yeḻa' guagw nacczen xilaže'.
20 Na' ḻecze gwne':
―Xbab da' yo'o ḻo' yic̱hjlaždao' beṉac̱hen', ḻenṉa' chonen cont lažda'ogaque' bi zjanaquen xilaže' len Diosen'.
21 Ḻe ḻo' yic̱hjlaždao' beṉac̱hen' chchoj xbab mal ca da' žan yesone' da' quinga: yesata'lene' no'ole bi nac xo'olgaque' o beṉe' byo bi nac beṉe' c̱hegaque', gwzoa xtogaque', yesote' beṉe',
22 yesone' gwban, yesezelaže' gata' c̱hegaque' da' de c̱he beṉe' yoble, yesone' da' mal, yeseziye'e beṉe', yesone' bichle da' nac da' yeḻa' zto', yesacxi'ede' beṉe', yeseṉeye'e c̱he beṉe', yesaque' beṉe' ya'laže', yesone' xbab da' bi zaca'.
23 Yogo' da' mal qui chesechojen ḻo' laždao' beṉac̱h na' chonen cont bi nac lažda'ogaque' xilaže' len Diosen'.
To no'ol zito' gwyejnilaže' Jesúsen'
(Mt. 15:21-28)
24 Na' beza' Jesúsen' na' gwyeje' distritw gan' mbane ciuda Tiro na' ciuda Sidón. Na' gwyo'e to ḻo' yo'o na' goclaže' nono ṉeze, perw bi goc gone' cont bi goseṉezde'.
25 Cate ḻa' gwṉezete xṉa' to bi' no'ole bi' yo'o nyazbe' da' x̱igüen', na' gwyeje' na' bzoa xibe' xṉi'a Jesúsen'.
26 No'olen' goque' beṉe' zito', no'ole Sirofenicia. Gwyeje' gwṉabde' Jesúsen' yebeje' da' x̱igüe' yo'o nyaz bi' no'ol c̱hen'.
27 Na' Jesúsen' gože'ne':
―Yogo'ze beṉe' zgua'tec chnežjue' da' chagw xi'iṉe'. Bi naquen güen yeque'e yeḻa' guagw c̱he xi'iṉe' na' gwnežjuen' yesagw beco' ca'.
28 Na' no'olen' gože'ne':
―Leczedo' can' gwnaon' X̱ana', perw ḻecze guaque gagw beco' be chi' xan mes bla'a da' chlažo' ḻo yo.
29 Nach Jesúsen' gože'ne':
―Nacczen can' gwnaon', guac yeyejo', ba bechoj da' x̱igüen' yo'o nyaz bi' no'ol c̱hion'.
30 Cate' bežin ližen' ble'ede' de bi' no'ol daon' to ḻo cam, na' ba bechoj da' x̱igüen' yo'o nyazbe'.
Jesúsen' beyone' to beṉe' cuež, beṉe' ḻecze bi goc ṉie'
31 Jesúsen' bezse'e gan' mbane Tiro na' gwdie' gan' nzi' Sidón na' yež ca' gan' mbane Decápolis, na' bežine' cho'a nisdao' c̱he Galilea.
32 Na' jasesane' to beṉe' byo beṉe' cuež na' bi goc ṉie', na' goseṉabe' x̱oa na' Jesúsen' yic̱hje'.
33 Nach Jesúsen' gwc̱he'ene' late' lchojiže' ga nono beṉe' nita', na' bde xbene' ḻo' nague' na' bži'en x̱ene' na' gwdane' ḻožen'.
34 Nach gwṉe'e ḻe'e yaba, bebande', na' gwne':
―¡Efata! ―zeje diža': ¡Byaljo!
35 Nach nag bena' besyeyaljon na' goc bende', na' ḻecze beyac ḻožen' na' goc gwṉie' binḻo.
36 Na' Jesúsen' gože' beṉe' ca' nono yese'e ca', perw ḻa'czḻa' gože' ḻegaque' ca', nachle goso'e diža' can' goca'.
37 Na' ḻeca besyebande', na' gosene':
―Yogon' chone' binḻo; chacte chone' cont chesyeyene beṉe' cuež ca' na' beṉe' ca' bi chac yeseṉe' chesyeṉie'.