15
Lunú rriꞌi nú rriꞌi bee bene dula
(Mr. 7:1-23)
1 Chequie uyabica chiucu chuna bee fariseo cuna bee ulaxcuela enu reca ley lu Jesuse, nu nzeꞌta beella enza Jerusalén, nu uni beella lunu:
2 ―¿Xiquie núla zucuꞌ bee beneꞌlu custumbre nú utsaꞌna bee beneꞌahua enu udetela? ¿Xiquie núla naa bee beneꞌlu chenu racu beei tucu nú neca custumbre?
3 Che uni Jesuse lubeella:
―¿Leꞌca xiquie nú sanaꞌ arquiꞌhua Stichiaꞌ Diose, para nú nzenalahua lunú neca costumbreꞌtsiahua?
4 Xne uni Diose: “Luꞌcu ulaꞌna lu paꞌlu cuna lu naꞌlu”, nu “Enu riquichiꞌquiꞌ paꞌ cuna naꞌ rquiꞌña nú ati nzeꞌe.”
5 Pero liꞌihua rnihua nú nuꞌ modo ni bene lu paꞌlla cuna lu naꞌlla: “Leca modo riꞌá elietsa luhua, xne ye nú rluꞌcua necalane uꞌna para Diose”,
6 rnihua nú titse bee bene enu ni scua, la quiꞌñia nú riꞌi nzeꞌe elietsa lu paꞌ nzeꞌe cuna lu naꞌ nzeꞌe. Scua ruachuhua Stichiaꞌ Diose, nu nzenalahua costumbreꞌhua.
7 ¡Lia rriꞌihua nú nehuañi nzeꞌcahua! Neli nú uni profeta Isaías lu cuendaꞌhua chenu unilla:
8 Bee benequieꞌ rnibeei nú rluꞌcu beei ulaꞌna lua,
pero niꞌ temeꞌ la luꞌcu beei ulaꞌna lua.
9 Lecaxi sibiꞌ nú rluꞌcu beei ulaꞌna lua,
xne seteꞌtsia beei lunú xelatsia arquiꞌ bee bene.
10 Chequie ubixia Jesuse ye bee bene zeꞌe, nu uninu lubeei:
―Uzuꞌcuꞌ diacahua nu uriꞌihua beyaꞌ nú nia luhua:
11 La neca nú racu bene nú rriꞌi, nú rriꞌi bene dula. Sino que bee bedichiaꞌ nú rni bene enzeꞌe rriꞌi nú rriꞌi bene dula.
12 Chequie uyabica bee beneꞌ Jesuse lunu nu uni beella lunu:
―¿Uriꞌilu beyaꞌ nú né yuꞌ arquiꞌ bee fariseo bee bedichiaꞌ nú unilu la?
13 Nu ucuaquinu lubee beneꞌnu nú uninu:
―Ye bee aca nú lá quieni Paa liñibe yetsu hasta lue.
14 Cualaꞌ beella, xne necatsia beella xi neca bene enu nequieꞌlu enu rlubeꞌ lu stucu bene enu nequieꞌlu nú cá enza tsella, nu tunu tucu bene enu nequieꞌlu rlubeꞌ stucu bene enu nequieꞌlu cá enza tsella, che rucu beella nuꞌ modo nú zanaꞌ beella liñi tucu iꞌchiu.
15 Che uni Pedro lu Jesuse:
―Udixiuleꞌe luru xi rni bee bedichiaꞌ nú unilu.
16 Chequie uni Jesuse:
―¿Xieꞌ leꞌca nuuhua lá riꞌihua beyaꞌ lunú unia la?
17 ¿Xieꞌ la riꞌihua beyaꞌ nú ye bee elubacu nú racu bee bene rlacae xlaꞌcu bee bene, nu che chu xiuꞌu zecae la?
18 Pero bee bedichiaꞌ nú rni bee bene, xiuꞌu nucuaꞌ arquiꞌ bee bene, nu bee nucuaꞌ rriꞌi nú rriꞌi bee bene dula.
19 Xne liñi arquiꞌ bene xiuꞌu nú necha rriꞌi bene elliebacuꞌ, nú ruuti bene saꞌbene, nú rluꞌcu niyu stucu unaꞌa, urre rluꞌcu unaꞌa stucu niyu, nú rriꞌi bene eluhuexe, nú rriꞌi bene eluhuanaꞌ, nú rni bene eluquichiaꞌ, nú riquichiꞌquiꞌ bene saꞌ bene.
20 Bee nucuaꞌ rriꞌi nú rriꞌi bee bene dula. Pero tunu la naa bene chenu racu bene tucu nú neca custumbre nú riala riꞌi bene ante nú acu bene, la neca nucuaꞌ nú rriꞌi nú rriꞌi bee bene dula.
Uriyeca Jesuse xinchiuꞌcu tucu unaꞌa Canán
(Mr. 7:24-30)
21 Chenu uchiuꞌu Jesuse lu iliu Genesaret nzanu enza lu eyeche Tiro cuna lu eyeche Sidón.
22 Enza zeꞌe uchiuꞌu tucu unaꞌa enu neca bene lu iliu Canaán lu Jesuse nu urixialinchu nú uninchu lunu:
―¡Detá, llianaꞌ David, uhuaꞌa arquiꞌ liꞌá! Biꞌyacuru xinchiuꞌcua nchiñi benechiquiꞌ arquiꞌ nu chiquiꞌ nehuana secanchu.
23 Nu né cuaquilí Jesuse lunchu. Che uyabica bee beneꞌnu lunu nu uziquie beella lunu nú uni beella:
―Uniꞌ lu unaꞌa cuaꞌ nú yanchu xne rixialinchu nzeꞌtaquienchu liaꞌahua.
24 Che uni Jesuse lubee beneꞌnu:
―Uxeꞌla Diose liꞌá para nú riꞌitsia elietsa lubee bene Israel enu la chenalaꞌ inziuꞌ Diose.
25 Pero che uyabica unaꞌa zeꞌe lunu nu utsulliquinchu lunu, nú uninchu lunu:
―¡Detá, uriꞌi elietsa lua!
26 Nu uni Jesuse lunchu:
―La neca nzeꞌca nú axi bene pá ya bee enduꞌ nu deteꞌ benene acu bee nicu.
27 Chequie uni unaꞌa zeꞌe lu Jesuse:
―Neliꞌlu nucuaꞌ Detá, pero hasta bee nicu racu bee pá ube nú sanaꞌ liñi mexaꞌ bene enu neca stene nicu.
28 Che uni Jesuse lunchu:
―¡Unaꞌa liꞌisiꞌlu chiquiꞌ nzeli arquiꞌlu liꞌá! Aca tucu nú niarquiꞌlu.
Nu hora zeꞌe, uyecaꞌ enduꞌnchu.
Uriyeca Jesuse huaxi bee bene enu riti
29 Chenu uchiuꞌu Jesuse zeꞌe uriñanu ruꞌu inzatuꞌ Galilea. Che chu uquienu equie tucu dañi nu uzucunu zeꞌe.
30 Nu uyetesaꞌ huaxi bee bene lunu zeꞌe, nu uriñayu beei bee bene enu necuxu, cuna bee bene enu niquieꞌlu, cuna bee bene enu nemangu, cuna bee bene enu la ni, cuna bee bene enu seca huaxilá lu elichia. Uriñayu beei bee bene quieꞌ lunu, nu uriyecanu beei.
31 Chequie chiquiꞌ uyanu arquiꞌ bee bene zeꞌe chenu ulañiꞌ beei nú rnila bee bene enu lani, nú uyecalaꞌ bee bene enu nemangu, nú sela bee bene enu necuxu, nú riꞌyala bee bene enu niquieꞌlu. Nu uquixie uni beella bedichiaꞌ nzeꞌca lu Dioseꞌ bee bene Israel.
Udeteꞌ Jesuse nú udacu tacu mili bee bene
(Mc. 8:1-10)
32 Chequie ubixia Jesuse bee beneꞌnu nu uninu lubeella:
―Ruꞌu arquia bee benequieꞌ, xne necala chuna bichia nú nucuaꞌa beei lua nu la uyaꞌ beei nú acu beei. La niarquia nú xeꞌlaa beei yue beei scuatsia niꞌi beei, xne cá chiulaꞌ beei inziu.
33 Che uni bee beneꞌnu lunu:
―Pero ¿ca chiyaꞌahua nú acu ye bee bene añiquieꞌ, luhuare quieꞌ elu lecati nucuaꞌa?
34 Nu unedichiaꞌ Jesuse lubeella, nú uninu:
―¿Xala pa rluꞌcuhua?
Nu ucuaqui beella lunu:
―Rluꞌcuru achine cuna chiucu chuna bee bela.
35 Nu che chu unibiyaꞌnu nú cuaꞌa bee bene zeꞌe luyuu.
36 Nu unaꞌtsenu lu achi bee pa cuna bee bela, nu udeteꞌnu cheꞌtsa lu Diose. Nu uleꞌenu bee pa zeꞌe udeteꞌnu ya bee beneꞌnu para nú ritsiꞌ beellae luye bee bene zeꞌe.
37 Ye bee bene zeꞌe udacu hasta nú ubelaꞌ beei. Nu uzucu subrascaꞌ achi llume bee pa nú uyaꞌna.
38 Bee bene enu udacu neca tacu mili bee niyu, pero la nebacuꞌ bee unaꞌa cuna bee enduꞌ.
39 Chenu ulaxu nú uni Jesuse lubee bene zeꞌe nú nzalanu. Che chu uyuꞌunu liñi barco nu nzanu lu iliu nú lee Magdala.