6
Udeteꞌ Jesuse nú udacu ayuꞌ mili bee bene
(Mt. 14:13-21; Mr. 6:30-44; Lc. 9:10-17)
1 Chenu udete nú unga bee nucuaꞌ, nza Jesuse stucu chú inzatuꞌ Galilea, elu leꞌca lee Tiberias.
2 Huaxi bee bene uyanala liꞌinu, xne ulañiꞌbeei bee milagro nú rriꞌinu, chenu uriꞌiyecanu bee bene enu riti.
3 Che uquie Jesuse equie tucu dañi elu uzucunu cuna bee beneꞌnu.
4 Nu bee bichia zeꞌe axula nzu eliñi baxcu, eliñi nú rriꞌi bee bene Israel.
5 Chenu uletsa Jesuse lunu ulañiꞌnu nú nzeꞌta riña huaxi bee bene lunu, che uninu lu Felipe:
―¿Cá chetsiaꞌahua nú acu ye bee benequieꞌ nee?
6 Pero unitsia Jesuse scua lu Felipe biꞌya xi cuaquii, xne nediyalaꞌnu lunú riꞌinu.
7 Chequie ucuaqui Felipe:
―Pero niꞌ chiucu ayuꞌu denario pá la riquiꞌ nú acu beei masia te pedasoae.
8 Che uni stucu beneꞌnu enu lee Andrés, bichi Simón Pedro:
9 ―Caꞌa nzu tucu enduꞌ niyu enu nuyaꞌ ayuꞌ pá cebada cuna chiucu bela, pero ¿xa riquiꞌ nucuaꞌ para lu huaxi bee benequieꞌ?
10 Chequie uni Jesuse lubeella:
―Uniꞌhua lu ye beei nú cuaꞌa beei.
Nu lunú nuꞌ ixi xata zeꞌe ucuaꞌa yebeei zeꞌe, nulu yebee bene enu nucuaꞌa zeꞌe neca tucu ayuꞌ mili puro bee niyutsia.
11 Che unaꞌtse Jesuse bee pá zeꞌe, nu chenu ulaxu nú udeteꞌnu cheꞌtsa lu Diose, udeteꞌnue ya bee beneꞌnu nu uritsiꞌ beellae luye bee bene enu nucuaꞌa zeꞌe. Leꞌca esquie uriꞌinu cuna bee bela, udeteꞌnu calutse nú uniarquiꞌbeei acubeei nu udacu beei hasta elu ubelaꞌ beei.
12 Chenu ubelaꞌ beei uni Jesuse lubee beneꞌnu:
―Uquieteꞌ saꞌhua bee pedaso nú uyaꞌna, para nú la nitilu niꞌtemeꞌe.
13 Chequie uquietesaꞌ beellae, nu uriche beella chiꞌchiucu llume bee pedaso bee pá nú uyaꞌna lu ayuꞌ pá zeꞌe.
14 Chenu ulañiꞌ bee bene zeꞌe milagro llene nú uriꞌi Jesuse, che unibeei:
―Neli nú liꞌinu necanu profeta enu nzu nú nzeꞌta lu iliulabe.
15 Pero chu uriꞌi Jesuse beyaꞌ nú niarquiꞌ beei nú uyaꞌ beei liꞌinu ala juerza para nú riꞌi beei nú acanu arre, enzeꞌe chu nzanu elu aya equie dañi zeꞌe, para nú zucu tuculiꞌinu zeꞌe.
Utse Jesuse lu inzatuꞌ
(Mt. 14:22-27; Mr. 6:45-52)
16 Chenu uyuꞌu rulaꞌ, ulaca bee beneꞌ Jesuse ruꞌu inzatuꞌ.
17 Nu uyuꞌu beella liñi tucu barco nu uquixie beella rdete beella lu inzatuꞌ zeꞌe para nú riña beella eyeche Capernaum. Nu ucabelila, nu lascaꞌ benchilaꞌ Jesuse.
18 Che uquixie nú unga tucu bii juerte, nu uquixie nú chiquiꞌ riatsaya inzatuꞌ zeꞌe.
19 Chenu nzala beella tucu ayuꞌ urre xuꞌcu kilometro, ulañiꞌ beella nú see Jesuse lu inzatuꞌ zeꞌe nu nzebicanu enza lu barcoꞌ beella, nu ulliqui beella.
20 Pero uninu lubeella:
―¡Liꞌá ninguieꞌ, la lliquihua!
21 Nu chiquiꞌ ñia nzu arquiꞌbeella uyucu beella liꞌinu liñi barco, nu chu uriña beella elu nzuebeella.
Ucuaꞌna bee bene Jesuse
22 Chenu uyeꞌe lu yuu stucu bichia, bee bene enu nucuaꞌa stucu chu inzatuꞌ zeꞌe uriꞌibeei beyaꞌ nú nzue bee beneꞌ Jesuse liñi tucu barco nú tuculiꞌ nzu zeꞌe, pero né chaa Jesuse cuna liꞌibeella.
23 Che chiucu chuna bee barco nú nzeꞌta enza eyeche Tiberias, uriña bee axu elu udacu bee bene pá chenu ulaxu nú udeteꞌ Jesuse cheꞌtsa lu Diose.
24 Chequie chenu ulañiꞌ bee bene zeꞌe nú lecaꞌ Jesuse nu niꞌ bee beneꞌnu zeꞌe, che uyuꞌu beei liñi bee barco zeꞌe nzuebeei eyeche Capernaum nze cuaꞌna beei liꞌinu.
Jesuse neca pá nú rliquiꞌ elunehuañi
25 Chenu uriña beei stucu chú inzatuꞌ zeꞌe, ullunaꞌ beei Jesuse nu unidichiaꞌ beei lunu:
―Maestro, ¿xunga uriñalu caꞌa?
26 Nu ucuaqui Jesuse lubeei:
―Nediya nzeꞌcaa nú rlaꞌnahua liꞌá, la necane equie bee milagro nú ulañiꞌhua nú uriꞌá, liꞌihua rlaꞌnahua liꞌá equie nú udacuhua hasta nú ubelaꞌhua.
27 La chenu arquiꞌhua equie bee elubacu nú rlaxu, sino que uyanu arquiꞌhua equie bee elubacu nú rliquiꞌ elunehuañi nú leca xunga laxu lu Diose. Nu elunehuañi cuaꞌ neca nú rliquiꞌ Bene enu uxeꞌla Diose lu iliulabe quieꞌ, nu ucañila Diose liꞌinu para nucuaꞌ.
28 Chequie unidichiaꞌ beei lunu:
―¿Xi rquiꞌña riꞌiru para nú riꞌiru lunú niarquiꞌ Diose nú riꞌiru?
29 Nu ucuaqui Jesuse lubeei:
―Lunú niarquiꞌ Diose nú riꞌihua, necane nú chili arquiꞌhua Bene enu uxeꞌlanu lu iliulabe.
30 Che unibeei lunu:
―¿Xi seña lubeꞌlu luru para nú chili arquiꞌru liꞌilu? ¿Nu xi milagro rriꞌilu?
31 Bee beneꞌahua enu udetela udacu beella maná chenu ucuaꞌa beella lu dañi achi elu la nucaꞌa bee bene, tucu nú rni lu ichiꞌ Stichiaꞌ Diose elu rni: “Nú Diose udeteꞌ pá nú ulaca enza liñibe udacu beella.”
32 Chequie uni Jesuse lubeei:
―Liꞌá neli ixiuleꞌa luhua nú la neca Moisés enu uliquiꞌ pá nú ulaca enza liñibe, Pa neca enu rliquiꞌ mero pá liñibe.
33 Xne pá nú rliquiꞌ Diose, liꞌinu ubeꞌtanu enza liñibe nu rliquiꞌnu elunehuañiꞌ bee bene iliulabe.
34 Nu unibeei lunu:
―Detá, ye bichia uliꞌquiꞌ pá cuaꞌ luru.
35 Che uni Jesuse lubeei:
―Liꞌá neca pá nú rliquiꞌ elunehuañi. Nu enu yeꞌta cuna liꞌá lecaꞌ xunga liaꞌnaꞌ nzeꞌe. Nu enu chili arquiꞌ liꞌá, lecaꞌ xunga bichiꞌ nzeꞌe.
36 Pero tucu nú unilá luhua, añinzuca nú ulañiꞌlaꞌhua liꞌá pero la chili arquiꞌhua liꞌá.
37 Ye bee bene enu uxeꞌla Paa lua, nzeꞌta bee nzeꞌe cuna liꞌá, nu bee bene enu nzeꞌta lua, la luachua bee nzeꞌe.
38 Xne liꞌá nzela desde liñibe para nú riꞌá tucu nú niarquiꞌ Pa Diose enu uxeꞌla liꞌá, nu lá yela para nú riꞌá tucu nú niarquitsia.
39 Nu Pa enu uxeꞌla liꞌá, lunú niarquiꞌnu necane nú ye bee bene enu uxeꞌlanu lua la nitia niꞌ tucu beei, sino que riꞌá nú huañi zeca beei chenu riꞌi Diose elu usticiaꞌnu.
40 Xne Pa Diose niarquiꞌnu nú ye bee bene enu zela nú chili arquiꞌ Lliꞌñinu, luꞌcu beella elunehuañi nú leca xunga laxu cuna liꞌinu. Nu liꞌá riꞌá nú huañi zeca beella chenu riꞌi Diose elu usticiaꞌnu.
41 Che uquixie bee bene Israel nú uzeꞌta beei Jesuse, equie nú uninu: “Liꞌá neca pá nú ulaca enza liñibe.”
42 Nu unibeei:
―¿Xieꞌ lacanú nucuaꞌ neca Jesuse llianaꞌ José la? Liaꞌahua nuꞌluꞌahua paꞌ nucuaꞌ cuna naꞌ nucuaꞌ. Nu ¿xinu rni nucuaꞌ nú ulaca nucuaꞌ enza liñibe?
43 Chequie uni Jesuse lubeei:
―Utsanaꞌhua nú seꞌtahua liꞌá lusaꞌhua.
44 Lecati aca yeꞌta lua, tunu la xeꞌla Diose nzeꞌe lua. Liꞌinu enu uxeꞌla liꞌá, nu liꞌá riꞌá nú huañi zeca nzeꞌe chenu riꞌi Diose elu usticiaꞌnu.
45 Lu libro nú uquieꞌe bee profetaꞌ Diose rni: “Diose zeteꞌ ye bee bene.” Enzeꞌe ye bee enu rieneꞌ stichiaꞌnu, nu reca lunú seteꞌnu, liꞌibeella nzeꞌta beella cuna liꞌá.
46 ’Niꞌ tucu lecati lascaꞌ lañiꞌ Diose, enu uxeꞌlatsia Diose lu iliulabe ulañiꞌlaꞌ liꞌinu.
47 Neli rnia luhua nú enu nzeli arquiꞌ liꞌá, rluꞌcula nzeꞌe elunehuañi nú leca xunga laxu lu Diose.
48 Liꞌá neca pá nú rliquiꞌ elunehuañi.
49 Bee beneꞌhua enu udetela udacu beella maná lu dañi achi elu la nucuaꞌa bee bene, nu añica nú unguti beella;
50 pero liꞌá rnia luhua equie cuendaꞌ pá nú ulaca enza liñibe, nu bene enu acune la atiaꞌlla.
51 Liꞌá neca pá nú nehuañi nú ulaca enza liñibe, nu enu acu pá quieꞌ, luꞌculla elunehuañi nú leca xunga laxu lu Diose. Nu pá nú rliquia necane cuerpoa. Liꞌá detene para nú luꞌcu bee bene iliulabe elunehuañi.
52 Chequie uquixie bee bene Israel zeꞌe nú unixuu beei lu saꞌbeei, nú unibeei:
―¿Xamodo aca benecuaꞌ liquiꞌ nucuaꞌ cuerpoꞌ nucuaꞌ daꞌcuaꞌahua?
53 Che uni Jesuse lubeei:
―Liꞌá neli nia luhua nú tunu la acuhua cuerpoꞌ Bene enu uxeꞌla Diose nu tunu la hueꞌhua reneꞌnu la luꞌcuhua elunehuañi che.
54 Pero enu acu cuerpoa nu hueꞌ renea, luꞌcu nzeꞌe elunehuañi nú leca xunga laxu lu Diose, nu liꞌá riꞌá nú huañi zeca nzeꞌe chenu riꞌi Diose elu usticiaꞌnu.
55 Xne cuerpoa neca elubacu nú neli neca, nu renea neca nú neli neca nú hueꞌ bee bene.
56 Nu bene enu acu cuerpoa nu hueꞌ renea, liꞌilla nehuañilla cuna liꞌá, nu liꞌá nehuañia cuna liꞌilla.
57 Pa liñibe enu uxeꞌla liꞌá rluꞌcunu elunehuañi, nu liꞌá nehuañia equie cuendaꞌ liꞌinu. Leꞌca esquie enu racu cuerpoa luꞌcu nzeꞌe elunehuañi lu Diose equie cuendaꞌ liꞌá.
58 Liꞌá rnia equie cuendaꞌ pá nú ulaca enza liñibe. Nu la neca pá quieꞌ xi neca maná nú udacu bee beneꞌhua enu udetela, xne añinzuca nú udacu beellae unguti beella, pero bene enu acu páquieꞌ luꞌcu nzeꞌe elunehuañi nú leca xunga laxu lu Diose.
59 Bee nucuaꞌ neca nú uzeteꞌ Jesuse bee bene liñi indu Capernaum.
Bee bedichiaꞌ nú rliquiꞌ elunehuañi nú leca xunga laxu
60 Chenu ubeneꞌ beei lunú uzeteꞌ Jesuse liꞌibeei huaxi bee bene enu nzequie liꞌinu unibeei:
―Chiquiꞌ neriñaꞌ nú riꞌahua beyaꞌ xa neca nú rni stichiaꞌnu. ¿Ti aca riꞌi caso lunú rninu?
61 Chenu uriꞌi Jesuse beyaꞌ lunú rnibeei, che uninu lubeei:
―¿Xieꞌ rcuu arquiꞌhua lunú unia scua la?
62 ¿Xa riꞌihua tunu lañiꞌhua nú quie zeca Bene enu uxeꞌla Diose elu nzucunu huaꞌtu?
63 Equie cuendaꞌtsia Espíritu Santo rluꞌcu bene elunehuañi nú leca xunga laxu, lecaxi aca bene riꞌilla leꞌcatsia liꞌilla. Nu equie cuendaꞌ Espíritu Santo nzeꞌta bee bedichiaꞌ nú unilá luhua, nu equie cuendaꞌ bee bedichiaꞌ cuaꞌ rluꞌcu bene elunehuañi.
64 Pero nuꞌscaꞌhua enu la chili arquiꞌ liꞌá.
Uni Jesuse scua xne nediyaꞌ nzeꞌcaꞌnu desde ante nú taa bee bene enu la chili arquiꞌ liꞌinu, nu ta bene enu deteꞌ cuenda liꞌinu.
65 Nu leꞌca uninu lubeei:
―Enzeꞌe unia luhua nú lecati aca yeꞌta lua, tunu la xeꞌla Pa liñibe nzeꞌe lua.
66 Desde bichia zeꞌe, huaxi bee bene enu uyaquie Jesuse chu utsanaꞌ arquiꞌbeei liꞌinu, nu nechenzenuaꞌbeei liꞌinu.
67 Chequie uni Jesuse lu ye chiꞌchiucu bee beneꞌnu:
―¿Leꞌca nuhua niarquiꞌhua chuehua la?
68 Pero ucuaqui Simón Pedro lunu nú unilla:
―Detá, ¿tilu nzaꞌaru che? Xne stichiaꞌlu neca nú nzeꞌta yuu elunehuañi nú leca xunga laxu lu Diose.
69 Liꞌiru nzelíla arquiꞌru liꞌilu, nu nediyaꞌlaꞌru nú necalu Cristo Lliꞌñi Diose enu nehuañi.
70 Chequie uni Jesuse lubeella:
―Añinzuca nú liꞌá ucañia lu ye chiꞌchiucuhua, pero nuꞌ tucuhua enu neca bezeꞌlu.
71 Uni Jesuse scua, equie cuendaꞌ Judas llianaꞌ Simón Iscariote, xne Judas quieꞌ neca enu udeteꞌ cuenda liꞌinu, añinzuca nú necai tucu lu chiꞌchiucu bee beneꞌnu.