11
1 Orguin wkakwent noo te gobkyii ne nak zegnak te bëg ne rkyiinen mén chene rdiix men, no won noo te rëz ne na lo noo:
―Gusuli, gutsa ydiix de xeydoo Dëdyuzh no ydiix de lo fkuuk no ylab de gan blazh mén rzaknon Dëdyuzh lenydoo guin.
2 Per ydiixdet de lo leey ne nak ruydoo, porke che wkakwent men ne nakdet men-Israelo; laa men nak ne ynebééy lo men-Jerusalén txuplalno-txup mëëw.
3 Noo yxaal txup xpén noo ynii por noo temilno-txupgwyuuno-tsonlal gbiz; lër ne rak mén ne ruu gyelgut gak men yrup men.
4 Laa men nak yrup yag-olivo no le yrup kantler ne zu lo Dëdyuzh; laa Ne rnebééy ydendxee gyëzlyu.
5 Belne nuu mén rlaan yzakzi men, rnelen men gyi gyedruu men rluzh men yrandxee mén ne rwinyaan men. Zenga nak ne guet kwaskyertee mén ne rlaan yzakzi men.
6 Rap ménree poder yrup men ne ytsëë men gyeybaa chen gyabdet gyo ydeblo ne yzëët men diiz ne rguu Dëdyuzh lextoo men no rap ke men poder por ne ylaa men ne gak nis ren no por ne ylaa men ne gak yralondxee gyelerdxeeb gyëzlyu laltee tir ne rlaan men gako.
7 Per chene gyal yzëët men xdiiz Dëdyuzh, yruu te mazab lenpos ne kesentyent gyët, til ma men, gun ma gan lo men, yket ma men.
8 Noze runëz ganzeeb xkwerp men lenlgyëzroo ledne wkaa Jesucrist lo kruz, ledne rnii ke mén Sodoma no le Egipto.
9 Tson gbizgwrol kwii mén gaa xkwerp yrup ménree nga; yrandxee gyëz, yralondxee klas mén, yrandxee mén ne rnii wren wren diiz, yrandxee nacion kwii we, no ydeedet yra mén guin si tsugyeer men.
10 No kesentyent yzhiilen yra mén ne nuu gyëzlyu ne guet yrup ménree, axtegue nuu te ne ygueed men lo xkompanyer men tant yzhiilen men, porke kesentyent wzakzi yrup ménree men.
11 Per chene wzaa tson gbizgwrol wneban ke Dëdyuzh men, waxee men ste; yrandxee mén ne wii ne waxee men, kesentyent wdxe men.
12 Zhich guin won men wlen te rëz ne kesentyent fwert axtegue gyeybaa, re we lo men yrup men:
―¡Gugyeep nee!
Lex wyeep men gyeybaa kon te bëw; yra mén ne nyaan rwii men wii ne le men syayeep.
13 Orke guin kesentyent wni lyu, wzenyuu tebchii lal ne nak gyëz guin, wet guedxmil mén. Le yra mén ne wetet, kesentyent wdxe men, wzelo men wzaknon men Dëdyuzhnzoon.
14 Wdesu ne wrup gyelerdxeeb, per wyob gak ne gyono.
Ne wzaa trompet guedx
15 Or ne wbëz angel ne wzaa angel guedx xtrompet ne, kesentyent ndíp wlen ndal rëz gyeybaa, re we:
Yrandxee mén ne rnebééy gyëzlyu, ynebééydetre men;
laa Dëdyuzh nak ne ynebééy yrup Ne XeCrist Ne;
laa Ne ynebééy ydeblo siguelendxee.
16 Orguin wzuzhib yra galebtap mengol ne zob lo yagzhil ne zu nes lo Dëdyuzh axtegue wtee lo men lyu, wzaknon men Dëdyuzh,
17 re men:
Dëdyuzhe, laa de rnebééy, laa de nak ne kesentyent rap poder,
laa de nak Dëdyuzh axtegue chekwlo no laake de nak Dëdyuzh naaree no laake de nak ne chiid,
rniiz noo dexkyizhtee lo de,
porke rbonyoo de ne kesentyent rap de poder
no le de che wzelo rnebééy.
18 Wlayaa yra mengyëzlyu lo de,
per che wdxiin dxe ne konyoo de ne no de rlayaa lo men
no che wdxiin dxe ne ylaa de gyelextis lo mengut
no ydee de ne ryal yra profet ne wlaa xdxiin de
no le ne ryal yra mén ne nak xpén de no le ne ryal yra mén ne rzaknon de,
nigle men ne non, nigle men ne zhi non,
no sluzh de yra mén ne rluzh yra mén ne nuu gyëzlyu.
19 Wluzh nga wyal xeydoo Dëdyuzh, ydoo ne zob gyeybaa; lenydoo guin nyoo zob te kajon ne nutsoow xley Dëdyuzh; orguin weep nis, wuu be, watsyaa ngwzii, wni lyu, no kesentyent wyab gyogye.