21
Bydzihñ Jesúz Jerusaléṉ
(Mr. 11:1-11; Lc. 19:28-40; Jn. 12:12-19)
1 Hor-ba gadzihñ yâme gahsh Jerusaléṉ, no bydzihñ yâme ruꞌ to guiedzy-yaañ ni le Betfagé, coo to dahñ ni le Oliv, ugaty ba pshahl Jesúz chohp de lo tzipychop xmeññ me,
2 ra me lee:
―Lâ tza guiedzy-yaañ ni dxie ru tedy ziaꞌr nó. Uga güieꞌ laꞌd to burr-ndzaꞌb nliiby maꞌ yahg no xiiñ maꞌ. Lâ cshac leeyâmaꞌ, no guidno laꞌd leeyâmaꞌ.
3 No bâḻ dxuhch ga laꞌd behch, lâ ga leeyâme: “Señor‑e gaquihñ leeyâmaꞌ; luxu cshahl me leeyâmaꞌ.”
4 Guhcu ze lehdy guhc ni günii profet no ni bzaa me, ru ne me:
5 Lâ ga meññ ni nu ciuda-Sioṉ:
“Lâ güieꞌ, xṞeiy laꞌd ziaad ru nu laꞌd
no guîlndoo, no dziib me to burr,
dziib me to burryañ-nguhl, xiiñ to ma-ruu yuu.”
6 Güya xmeññ Jesúz, no guhcu mod-ra me leeyâme;
7 güiyno yâme burr-ndzaꞌb no xiiñ maꞌ, no pshob shab yâme chehsh maꞌ; no güdzib Jesúz leemaꞌ.
8 No meññ-xtahl ni ziaad, gatzihly shab yâme lo ñahz ru tedy Jesúz; no zrieñ yâme gachug ṟam-yaañ ni rahp guix, gaguihsh yâmeu lo ñahz zegahc.
9 Meññ ni zunier no zegahcu meññ ni náḻ yahc traz, rquee yâme riedz, ne yâme:
―¡Tzuguia mpyquie ni ziaad de lo xfamily ṟeiy-Davit! ¡Nu laꞌy mpyquie ni ziaad porni Dioz pshahl leeme! ¡Tzuguia Dioz ni nu gybaa!
10 Hor-bydzihñ Jesúz Jerusaléṉ, gyre meññ-nu leññ ciuda rgaꞌ rdoob, no xtahl yâme ne:
―¿Dxu leeme mpyquie-rieꞌ?
11 No ra lahd yâme:
―Jesúz‑e leeme, profet ni byruu guiedzy-Nasaret ni nu lo ṟegioṉ-Galilea.
Güloo Jesúz gyre ni nehx rquihñ tzu leññ idoró
(Mr. 11:15-19; Lc. 19:45-48; Jn. 2:13-22)
12 Güyuꞌ Jesúz leññ idoró, no guzlo güloo me meññ ni gatoꞌ no meññ ni gazii. No ptixguiat me xmiax meññ-rtzee xmedy meññ no xbangü meññ ni rtoꞌ ximbue;
13 no ra me leeyahc:
―Lo Guehtzy ru queꞌ xtiidz Dioz neu: “Diryuꞌn, par gynino meññ naa we gacu”; per laꞌd gatzoo laꞌdu beeiy ru riungaꞌdzy meññ-gübaan.
14 No gübigy meññ-ngaḻ no meññ-ndang ru zu Jesúz leññ idoró, no psiaḻ me leeyâme.
15 Per hor-bwieꞌ xjefy yahc bahl no muextr ni ruuḻ yahc xleiy Moiséz gyre xroꞌ cos ni rtzoo Jesúz, no hor-bieññ yâme gaquee mbiux riedz leññ idoró, ne: “¡Tzuguia mpyquie ni ziaad de lo xfamily ṟeiy-Davit!”, bydziaꞌdzy yâme,
16 no ra yâme Jesúz:
―¿Rieññiꞌ ni ne mbiux-wé yahc la?
Ra Jesúz leeyâme:
―Rieññaꞌ. Naꞌz laꞌd, ¿nehx ruuḻ laꞌd ni ganii lo Guehtzy ru queꞌ xtiidz Dioz de nirieꞌ la, ru neu:
Xtâ mbiux-yaañ no mdoo
guuḻ yâme lehdy cuguia yâme Dioz?
17 Luxu psaꞌn Jesúz leeyâme, byruu me ciuda-wé, no za me guiedzy-Betania, no uga bydzie me.
Gülu-dia Jesúz to yag-duug ni nehx queꞌ lo
(Mr. 11:12-14, 20-26)
18 Ni byre guiaal, byruu Jesúz uga, za me Jerusaléṉ gyzac no guzlo galahn me.
19 No bwieꞌ me to yag-duug coo ñahz, no güya me ru zuw, per nehx bydzial me duug lou, xguie guix dziib lou. Were ra me yag-duug:
―¡Ba nehx ziuꞌr dze-yqueꞌ duug loꞌy!
No gübihdzy gahcu.
20 Hor-bwieꞌ xmeññ me nirieꞌ, ptzunadz yâme no ra yâme Jesúz:
―¿Bia mód ngueeḻy gahc gübihdzy yag-duug?
21 Ra Jesúz leeyâme:
―Gapyaꞌ laꞌd ni uli, bâḻ rlíladzy laꞌd, no nehx rqueꞌladzy laꞌd mbehty la, nehx nunzy ni ptzon no yag-duug ntzoo laꞌd, mazyg zegahc beeiy ña laꞌd dañ-rieꞌ: “Byruu de wé no biahb lo nisdoo”, no ñahcu ze.
22 No gyre ni gnab laꞌd hor-ganino laꞌd Dioz la, zdee meu laꞌd bâḻ rlíladzy laꞌd.
Günabdiidz yâme dxu nac Jesúz
(Mr. 11:27-33; Lc. 20:1-8)
23 Byluxu güyuꞌ Jesúz leññ idoró, no hor-galuu me meññ, xjefy yahc bahl no zrieñ mînguhl yahc ni nac guxtisy lahd meññ-Isṟael, gübigy yâme no ra yâme leeme:
―¿Dxu naquiꞌ par ctzooy gyre nirieꞌ? ¿No dxu guhdzy lii ctzooyu?
24 Ra Jesúz leeyâme:
―Naa zegahc rapaꞌ to ni gnabdiidzaꞌ laꞌd; no bâḻ ga laꞌd naa xnahc leeu la, naꞌ gapyaꞌ laꞌd dxu nacaꞌ par ctzon gyre nirieꞌ.
25 ¿Dxu pshahl Juaṉ lehdy bidchôbnihs me meññ? ¿Dioz ni nu gybaa la, o cuentz meññ?
Guzlo gaya saꞌ yâme:
―¿Biaz‑e naꞌ ga nó leeme? Bâḻ nó ga nó Dioz pshahl Juaṉ, za me nó: “¿Biaz nacu naꞌ di nlíladzy laꞌd leeme?”
26 No bâḻ ga nó, cuentz meññ pshahl leeme, ndzieeby gyruu meññ-guiedzy dchehsh nó; porni ne yâme Juaṉ, profet‑e leeme ni günii ni gu Dioz lee.
27 Leewe ra yâme Jesúz:
―Nehx nann noꞌ.
Were ra Jesúz leeyâme:
―Zegahc naa nehx zapyaꞌ laꞌd dxu nacaꞌ par ctzon gyre nirieꞌ.
Ejempl xchieñ chohp xiiñ to mpyquie
28 Günabdiidz Jesúz leeyâme, ra me:
―¿Bia ne laꞌd lguia nirieꞌ? To mpyquie rahp chohp xiiñ me, no ra me to de leeyâme: “Shiꞌñ, tzaꞌy dzêrieꞌ dzictzooy dziiñ lo lyu ru bdzibaꞌ blatzy.”
29 Ra xiiñ me leeme: “¡Nehx neu naa tzan!” Per luxu gyzac ne xiiñ me: “Beeiydí tzan ru gashahl dtadaꞌ naa”, no za me.
30 Gyzac ra mpyquie-caḻ sto xiiñ me mod-wé gahc. No wé ra leeme: “Yo, dad, naa tzan.” Per luxu, di ña me.
31 ¿Dxu de lo gyrop yâme ptzoo ni ne xtad?
Ra yâme Jesúz:
―Ni ra me nier lee.
Ra Jesúz leeyâme:
―Gapyaꞌ laꞌd ni uli, meññ-rcuquix mpuezd no meññ-ngünaa yahc ni nehx rahp tohzy mpyquie, ma ngueeḻy ziuꞌ yâme ru rtzoo Dioz mdad que laꞌd.
32 Porni Juaṉ ni rchôbnihs bidluu me laꞌd ni nac xñahzû, per di nlíladzy laꞌd mod-ra me laꞌd. Per meññ-rcuquix mpuezd no ngüna-rieꞌ yahc ni nehx rahp tohzy mpyquie, bylíladzy yâme no ptzoo yâme mod-ra Juaṉ leeyâme. Per laꞌd naꞌ, nîcze bwieꞌ laꞌd nirieꞌ, di ne laꞌd ctzee mod-nac laꞌd no di nlíladzy laꞌd xtiidz Juaṉ.
Ejempl xchieñ meññ ni ptzoo xtziiñ blatzy
(Mr. 12:1-12; Lc. 20:9-19)
33 ’Lâ guieññ sto ni gynin ndaagü lo diidz: Güyuꞌ to xbixwaan to lyu-ro, bdziib me blatzy lo xilyu me, no ptahgü me guingybiu; luxu güdahñ me to guieryu ru gyxii blatzy, no bzaa me beeiy to yuꞌ ni nsuu lehdy ycuniꞌ xmeññ me ru gayahc dziiñ.
’No luxu bdee me lyu-rieꞌ zrieñ meññ-ctzoo dziiñu por glaꞌy, no leeme za me to ru ziht.
34 Dze-ba gayahc xicüsech blatzy‑e naꞌ, pshahl me chohp tzonn xmós me, ziycaꞌ ni ctzulaꞌy yâme de lo cüsech ru nu meññ-caḻ yahc ni gatzoo dziiñ.
35 Per meññ-gatzoo dziiñ lo lyu-rieꞌ naꞌ, aaḻ pquelo yâme mós yahc, güdihñ yâme to me, sto me bgaꞌdy yâme lee, no sto me guznáḻ yâme lee no guie.
36 Gyzac pshahl xbixwaan lyu ma xtahl mós que ni güya nier; per gyzac mod-wé gahc guhc yâme.
37 ’No luxu pshahl xbixwaan lyu-rieꞌ merp xiiñ me, porni ne me: “Stzoo yâme ni gynii me porni dshiñaꞌ leeme.”
38 Per hor-bwieꞌ meññ-caḻ ni gatzoo yahc dziiñ ziaad xiiñ xbixwaan lyu, ra saꞌ yâme: “Mpyquie-ziaad, leeme we ni guian-no gyrenac dziiñ dze-ba guhty xtad me; igaꞌdy nó leeme lehdy gac dixchieñ nó gyreu.”
39 Were günahzy yâme leeme, güloo yâme leeme leññ lyu ru dziib blatzy, no bgaꞌdy yâme leeme.
40 Were ra Jesúz leeyâme:
―Dze-guibyguiat xbixwaan lyu-caḻ, ¿bia ctzoo me no meññ-rieꞌ yahc ni gatzoo dziiñ lo xilyu me?
41 Ra yâme Jesúz:
―Ba nehx nu guîlrioob, gaty meññ-rieꞌ yahc ni nac meññ-dirquihñ, no gdee xbixwaan lyu-wé xtziiñ me zrieñ meññ ni gdee ni ctzulaꞌy yâme de cad cüsech.
42 No ra Jesúz leeyâme:
―¿Dgueññ guuḻ laꞌd lo Guehtzy ru queꞌ xtiidz Dioz la?, ru neu mod-rieꞌ:
Guie ni di ne meññ-rzaa yuꞌ nquihñ,
naꞌ lehbu ba nash squiñp ru raa guie ni ma rquihñ lehdy tzaa yuꞌ zaꞌgndzi.
Dioz ni rtzoo mdad, leeme we ptzoo leeu,
no gatzunadz nó rwieꞌ nó leeu.
43 No leewe racdadzyaꞌ gann laꞌd, ba nehx beeiy tzu laꞌd ru rtzoo Dioz mdad; ba zrieñ meññ‑e tzu ni zidguiahc beeiy meññ-rdee ni nac xchieñ cad cüsech xbixwaanu.
44 No de guie naꞌ ni ganii nó, dxu guiahb chehshu la, stzubiuw lee; no bâḻ leeu guiahbu chehsh dxuhch, dé we ctzoou lee.
45 Hor-bieññ xjefy yahc bahl no zrieñ meññ-nac yahc fariseu nirieꞌ ni günii Jesúz ndaagü lo diidz, gunn yâme de leeyâme ganii me.
46 Gucladzy yâme nnahzy yâme leeme, per rdzie yâme porni meññ-guiedzy ne yâme Jesúz profet‑e leeme.