12
Gachuꞌ xmeññ Jesúz do dze-risladzy meññ
(Mr. 2:23-28; Lc. 6:1-5)
1 Lo gahc tiemp-wé to dze-risladzy meññ, güdedy Jesúz leññ to lyu ru dziib trigü; galahn xmeññ me, no guzlo gachuꞌ yâme xdo trigü no gayahgü yâme ladzyu.
2 Niwé bwieꞌ meññ-nac yahc fariseu, ra yâme Jesúz:
―Bwieꞌ, gatzoo xmeññiꞌ ni nehx xñahzû gac dze-risladzy meññ.
3 Ra Jesúz leeyâme:
―¿Dgueññ guuḻ laꞌd ni ptzoo Davit tzcaḻ la, dze-bylahn me no gahc meññ-zidno me?
4 Güyuꞌ me leññ xiydoo Dioz, no güdahgü me paṉ ni guhc gun par Dioz, nîcze nehx xñahzu par Davit ni par meññ-zidno me, porni ne xleiy Moiséz nehx beeiy rahgü nyugz meññ leeu, mazyg nunzy bahl.
5 ¿O dgueññ guuḻ laꞌd lo xleiy Moiséz ru ne me, bahl rtzoo yâme dziiñ leññ idoró dze-risladzy meññ, no nehx rahcu guîlquie par leeyâme la?
6 Gapyaꞌ laꞌd, naa ni ma rsahc que idoró zuun neꞌ.
7 No bâḻ laꞌd ñieññ laꞌd ni ganii lo Guehtzy ru queꞌ xtiidz Dioz, ru neu: “Ni riuꞌdadzyaꞌ la, lâ guioob zâ-bynech laꞌd, no dac aaḻ yquee laꞌd gue ni gacnixye par to gun”, were nehx nruu laꞌd contr meññ-nehx nu mbehty chehsh.
8 Naa we Mpyquie-Pshahl Dioz Lee no rtzon mdad bia beeiy gac dze-risladzy meññ.
Mpyquie ni gübihdzy to ña
(Mr. 3:1-6; Lc. 6:6-11)
9 Byruu Jesúz de wé, güyuꞌ me leññ xiydoo yâme uga.
10 Nuty to mpyquie uga, gübihdzy to ña me; gumm gayo yâme mod-gyruu yâme contr Jesúz la, günabdiidz yâme, ra yâme leeme:
―¿Xñahzu we bâḻ dxuhch nsiaḻ meññ-gayac-ure dze-risladzy meññ la?
11 Ra Jesúz leeyâme:
―Dxu de lahd laꞌd, bâḻ rahp to xiily no ñahb maꞌ leññ to guieryu dze-risladzy meññ, ¿dâs‑e nigloo laꞌd leemaꞌ scâsy ñahb maꞌ la?
12 No, ¡ma rsahc to meññ‑e que to xiily! No leewe, xñahzu ctzoo meññ ni mos dze-risladzy meññ.
13 Luxu ra Jesúz mpyquie-caḻ ni gübihdzy ña:
―Biscaa ñay.
No biscaa me leeu, no biaḻ gahcu beeiy gahc sto ladu.
14 Byluxu byruu meññ-nac yahc fariseu idoo, no guzlo gayo yâme xnahc beeiy igaꞌdy yâme Jesúz.
Ni ziaad lo Guehtzy ni ganii de Jesúz
15 Hor-gunn Jesúz nirieꞌ, byruu me de uga; no náḻ xtahl meññ leeme, no gasiaḻ me gyre meññ-gayac-ure yahc,
16 no ra me meññ-rieꞌ yahc di ga yâme ndruhty dxu we leeme.
17 Mod-wé we guhc ni günii profet-Isaíaz ba xtze, ru ne me:
18 Nirieꞌ we ni ctzoo dixtziñaꞌ, ni güleꞌn lee,
ni ndzin lee, no rxilynon lee.
Gdedyaꞌ diSpirtaꞌ ni tzu no leeme,
no csieññ me xtâ meññ-nehx meññ-Isṟael ziaad dzé ni ctzon guîlguxtisy.
19 Nehx zdeḻydiidz me no meññ, ni nehx squee me riedz,
ndruhty nehx zieññ xriedz me lo call.
20 Nehx stzuné me meññ ni ntihdy beeiy to gobgui,
no gacno me meññ ni rluu beeiy to mech ni ba nunzy guhsh gaboo,
glo dze-güieꞌ me ba gayahc xguîlguxtisy me byzaꞌzy.
21 No byzaꞌzy lo guiedzylie zbiahz meññ guislaa me leeyâme de lo guîlnadz ni ziaad.
Ne yâme bêndzab we racno Jesúz
(Mr. 3:19-30; Lc. 11:14-23; 12:10)
22 To mpyquie ni ngaḻ no ngop ni nu mbenahcsy lee, güiyno yâme leeme lo Jesúz; no psiaḻ Jesúz leeme, no guzlo gahc gawieꞌ me no ganii me.
23 Rtzunadz gyre meññ, no ne yâme:
―¿Dac‑e leeme ni nac diidz guiaad de lo xfamily ṟeiy-Davit la?
24 Hor-bieññ meññ-nac yahc fariseu ni ganii meññ, ne yâme:
―Beelzebú, ni nac xjefy gyre mbenahcsy, racno leeme; leewe rboo me mbenahcsy meññ.
25 Jesúz naꞌ nann me bia ganii leññ ihqy cad to meññ-wé yahc, ra me leeyâme:
―Bâḻ meññ-nac yahc xguxtisy to guiedzy nruu chohp cuib no ndeḻy yâme la, nnitylo de ni rtzoo yâme mdad‑e. No bâḻ to ciuda o to family nruu chohp cuib no ndeḻy yâme la, nnidylo saꞌ yâme we.
26 No bâḻ bêndzab mboo me leegahcme, were ba garuu me chehsh gahcme; ¿bia mód‑e naꞌ beeiy ñahc ni nnii me?
27 Ne laꞌd rboon mbenahcsy porni racno Beelzebú naa; no bâḻ ze leeu la, ¿dxu racno xmeññ laꞌd lehdy gboo yâmeu zegahc? No leewe, leegahc yâme rdee diidz nehx xñahzu ni rnii laꞌd.
28 Per naa rboon mbenahcsy porni nu xiSpirt Dioz no naa, no niwé we rdee diidz ba gatzoo Dioz mdad neꞌ ru nu laꞌd.
29 ’¿Bia mód‑e ñuꞌ dxuhch leññ xiryuꞌ to mpyquie-ndip no ncaꞌ gyre ni rahp me, bâḻ di glihby leeme nier? No mod-wé were beeiy ncaꞌ gyre ni rahp me.
30 ’Dxu nehx nu no naa, garuu contr naa; no dxu nehx racno naa lehdy gac xtahl dmeññaꞌ la, gaboxtzu me meññ ni ba biahd.
31 ’No leewe gapyaꞌ laꞌd: Dioz csiaaḻladzy me gyre xguîlquie meññ no nitisy didz-nahcsy ni rnii yâme contr leeme; per dxu gynii didz-nahcsy contr xiSpirt Dioz la, wé nehx ssiaaḻladzy Dioz xguîlquie.
32 Dxu gynii contr naa, Mpyquie-Pshahl Dioz Lee la, Dioz csiaaḻladzy xguîlquie me; per dxu gynii contr Spirt-Sant la, wé nehx ssiaaḻladzy Dioz xguîlquie ni tiemp-rieꞌ ni tiemp-ziaad ziaꞌ.
Ni rtzooy, wé we rdee diidz dxu lii
(Lc. 6:43-45)
33 ’Bâḻ to yahg yag-tziaawy leeu la, mos xqueꞌu; per bâḻ nehx yag-tziaawy leeu la, were nehx mos xqueꞌu. Cad to yahg rzaclo meññ leeu por xqueꞌu.
34 ¡Laꞌd meññ-dirquihñ ni zidguiahc beeiy mbaḻbeedzy! ¿Bia mód‑e nnii laꞌd ni mos, no meññ-dirquihñ laꞌd? Porni ni rnii meññ, wé we rdee diidz bia nu leññ xguîlmbahñ yâme.
35 Meññ-tziaawy la, rtzoo no rnii ni mos, porni ni mos nu leññ xguîlmbahñ yâme. No meññ-dirquihñ la, wé rtzoo no rnii ni dirquihñ, porni ni dirquihñ nu leññ xguîlmbahñ yâme.
36 Per naa gapyaꞌ laꞌd, dze-gac xguîlnadz Dioz, gyre didz-nadz ni günii meññ lee, gac guîlguxtisy lguiau.
37 Xtiidz gahquiꞌ gynii ni naquiꞌ, no gluu yahcu bâḻ nehx nu mbehty chehshiꞌ o bâḻ rahpiꞌ doḻ.
Rnab meññ ntzoo Jesúz to ni ngann
(Mr. 8:12; Lc. 11:29-32)
38 Lahd meññ-nac yahc fariseu no zrieñ muextr ni ruuḻ yahc xleiy Moiséz, ra yâme Jesúz:
―Muextr, riuꞌdadzy noꞌ nwieꞌ noꞌ ntzooy to ni ngann ni nunzy Dioz beeiy rtzoo.
39 Ra Jesúz leeyâme:
―Meññ-di rzobdiidz ni nu ni naꞌ, ni pur ni nadz nu leññ ihqy, rnab nwieꞌ to ni ngann ni nunzy Dioz beeiy rtzoo; per ni ngann ni guhc no profet-Jonáz, niwéhzy‑e güieꞌ yâme.
40 Porni mod-güyuꞌ Jonáz tzonn dzé no tzonn guiaal leññ to mbaḻ ni modni xroꞌ, mod-wé gahc‑e naa, Mpyquie-Pshahl Dioz Lee, ziun leññ yu tzonn dzé no tzonn guiaal.
41 Meññ-Nínive, dze-gac xguîlnadz Dioz ziahs yâme, no mod-wé zieññ nu guîlquie chehsh meññ-nu ni naꞌ; porni meññ-Nínive byo yâme Dioz hor-bieññ yâme xtiidz me ni bieno Jonáz leeyâme. Per naa ni ma rsahc que Jonáz zuun neꞌ.
42 No dze-gac xguîlnadz Dioz, ziahs ṟein ni güyuꞌ ñaz-mbenihs no mod-wé zieññ nu guîlquie chehsh meññ-nu ni naꞌ; porni leeme, nîcze ziht güyuꞌ me, per biahd me ru nu Salomóṉ, bidguieññ me xguîlnann. Per naa ni ma rsahc que Salomóṉ zuun neꞌ.
Mbenahcsy ni ribyguiat sto
(Lc. 11:24-26)
43 ’Hor-ba byruu mbenahcsy to meññ, ba zau, ganzeꞌu zrieñ lad, gayohbyu ru guisladzyu, no mbahty di rdzialu lgar.
44 Were ba neu: “Guibyguiataꞌ ru byruu gahcaꞌ.” Hor-ba gubyguiatu we naꞌ, rwieꞌu xguîlmbahñ meññ-wé beeiy to yuꞌ ni ndahtzy, no nyar no guctziaawy leññ.
45 Were rigyohbyu zgahdzy mbenahcsy ni ma udedy que leeu, no hor-ba ptohp saꞌu, ribyguiat yahcu, riuꞌu meññ-wé sto; no ba ma udedy meññ-dirquihñ rahc meññ ni ba byrohp riuꞌ mbenahcsy lee. Mod-wé gahc‑e gac gyre meññ-dirquihñ ni nu ni naꞌ.
Xmam Jesúz no meññ-behtzy me
(Mr. 3:31-35; Lc. 8:19-21)
46 Ganii ziaꞌ Jesúz ze no meññ-nuno me leeyahc, tohzy bydzihñ xmam me no meññ-behtzy me. Biaꞌn yâme stziuꞌ gahc, no racladzy yâme gynino yâme Jesúz.
47 Were byruu to lahd gahc meññ, ra leeme:
―Xmamiꞌ no meññ-behtzyiꞌ zu stziuꞌ racladzy gynino lii.
48 Per ra me meññ-ra leeme ze:
―¿Dxu we leeme dmamaꞌ, no dxu we leeyâme meññ-dbetzyaꞌ?
49 Luxu, bluu ña me xmeññ me, no ra me:
―Meññ-rieꞌ yahc‑e dmamaꞌ no meññ-dbetzy yahcaꞌ.
50 Porni nitisy dxu rtzoo mod-racladzy dTadaꞌ ni nu gybaa, wé we dbetzyaꞌ, wé we dsanaꞌ, no wé we dmamaꞌ.