8
Jesúz‑e bahl ni nac jefy no racno me nó
1 Ni ma rsahc ni ganii noꞌ, leeu we nirieꞌ: de ni rahp nó to bahl gybaa ni nac jefy ni dxie lad-drech coo Dioz ru rtzoo mdad,
2 no rtzoo me xtziiñ bahl ru ma nda leññ ni ulihbu idoo ni bzaa Dioz no dac ni bzaa meññ.
3 Xjefy gyre bahl naꞌ, meññ-rbee we leeyâme lehdy gdee yâme gun no yquee yâme gue maꞌ lo Dioz, no leewe rquihñu tzu to ni gdee Crist zegahc.
4 No bâḻ ñuꞌ me guiedzylie, ba nehx ñahc me bahl, porni nu ziaꞌ xtahl bahl ni rdee gun lo Dioz mod-ne xleiy Moiséz.
5 Bal-rieꞌ yahc naꞌ, ni rtzoo yâme, beeiy tohzy mble we leeu, no nacu beeiy ni nu gybaa; porni mod-wé bwieꞌ Moiséz dze-gzaa me idoo de lahr, ru ra Dioz leeme: “Güieꞌ gay ctzooy gyreu mod-blun lii chehsh dañ-Sinaí.”
6 Per ma rsahc dziiñ ni rtzoo Crist que xtziiñ bahl tzcaḻ, porni nu me entr Dioz no meññ de to ni ma mos ni bdee Dioz diidz ni ctzoo no meññ, no nirieꞌ naꞌ, ziaadu de to ni ma mos ni bdee Dioz xtiidz me.
7 Bâḻ diidz ni nier lee bdee Dioz ni ctzoo me no meññ, ñacnou ñactziaawy yâme, nehx nquihñ ndee me diidz ni byrohpu.
8 Per Dioz bwieꞌ me nehx ractziaawy meññ-wé yahc, günii me lo Guehtzy ru queꞌ xtiidz me, neu:
Dioz ne me: Ziaad dzé
gdedyaꞌ diidz ni ctzon to mod-coby no meññ-Isṟael no meññ-Judá.
9 Nirieꞌ ni rdedyaꞌ diidz ni ctzon no leeyâme, nehx stzonu mod-ptzon no xmeññ yâme ni güyuꞌ ba xtze
dze-gucnon byruu yâme Egipt;
no gumm nehx ptzoo yâme mod-bdedyaꞌ diidz ni ctzon no leeyâme la,
leewe psanaꞌ leeyâme, ne Dioz.
10 Ni gdedyaꞌ diidz ctzon no meññ-Isṟael tedyz dze-caḻ yahc, leeu we nirieꞌ, ne Dioz:
Zgun dleiyaꞌ lo xguîlriehñ yâme,
no gzanu leññ xguîlmbahñ yâme.
No gácaꞌ xDioz yâme,
no leeyâme gac dmeññaꞌ.
11 No nehx squihñ gluu meññ zâ-bynech,
ni ndruhty nehx za xfamily: “Lâ gzaclo Dioz”,
porni gyre yâme ssaclo naa,
xtâ meññ ni uxiee rsahc no xtâ meññ ni ma rsahc.
12 No ssiaaḻdadzyaꞌ ni ptzoo yâme ni nehx xñahzû,
no nehx zitsêlou naa xguîlquie yâme no zegahc ni dirquihñ ni ptzoo yâme.
13 Ru rnii Dioz gdee me diidz ctzoo me to mod-coby no meññ, ne me nehx squihñ diidz ni nier lee bdee me; no ni nehx squihñ la, ni güdedy‑e leeu, ba dzigynihtyu.