6
Gacno dsaꞌ nó
1 Rman, bâḻ güieꞌ laꞌd dxuhch de lahd laꞌd gatzoo guîlquie, laꞌd ni rtzoo ni ne xiSpirt Dioz, lâ gacno leeme gyo me Dioz gyzac. Per lâ ctzoo leeu no guîlndoo, no to to laꞌd gax lâ gann, di gdee laꞌd ñahz tzu ni yquihly laꞌd zegahc.
2 Lâ gacno saꞌ laꞌd hor-gadedy laꞌd behch ni zidguiahc beeiy yuu ni naꞌy, no were neññ gatzoo laꞌd ni ptzoo Crist mdad ctzoo nó.
3 Bâḻ dxuhch ne lee ma rsahc, no luxu ndruhty nehx nac me la, leegahcme risquiee me leeme.
4 No leewe, to to meññ rquihñ güieꞌ leegahc zaꞌgndzi no mod-rtzoo, no gyxilyno meu no di glaꞌdzy me ni gatzoo zrieñ.
5 To to meññ tziyno ni zidguiahc beeiy xyuu.
6 Gyre meññ ni gazeedy xtiidz Crist, rquihñu gacno yâme meññ-rluu leeyâme.
7 Di guisquiee laꞌd laꞌd gahc: Dioz ndruhty nehx beeiy nisquiee leeme. Ni rtzoo meññ, leegahcu we rahc lo yâme.
8 Dxu rtzoo ni nehzy ihqy la, ni nehzy ihqy gahcme we gniꞌdy leeme; no dxu rtzoo ni ne xiSpirt Dioz la, de xiSpirt Dioz scaꞌ me guîlmbahñ ni nehx zluhx.
9 Di cshacdadzy nó de ni rtzoo nó ni mos; porni bâḻ rtzoo nóu, no di cshacdadzy nó la, zdzihñ dzé ycaꞌ nó guîlnzaꞌg lguia ni mos ni ptzoo nó.
10 No leewe, hor-beeiyu, gacno nó meññ, no mahbu meññ ni ba bylíladzy xtiidz Dioz.
Ni dzigylux guehtzy
11 ¡Lâ güieꞌ xnahc‑e letr-roob ni gazan neꞌ naa yoꞌby lo guehtzy ni cshaalaꞌ lo laꞌd!
12 Meññ ni racladzy glesyguia zrieñ meññ lee la, leeyâme we gatzunñaad tzu señ lady laꞌd, porni nehx racladzy yâme igultihp meññ leeyâme bâḻ ña yâme guhty Crist lo cruzy lehdy gylaa meññ de gyre niwé.
13 Per ni leegahc yâme ni nu señ lady nehx rtzoo gyre ni queꞌ lo leiy; mazyg racladzy yâme tzu señ lady laꞌd, lehdy gyxilyno yâme güieꞌ yâme náḻ laꞌd ni gatzoo yâme.
14 Naa naꞌ, nehx racdadzyaꞌ tzuguian de mbehty, mazyg tzuguian de ni guhty Jesucrist lo cruzy, leeme rtzoo mdad nó. Porni lo xcruzy me, ba guhty ni nahcsy ni nu lo guiedzylie par naa; no par ctzon ni nahcsy ni nu lo guiedzylie la, rahc cuent ba guhtyaꞌ we.
15 Porni lo xñahz Crist Jesúz, nehx rsahc señ bâḻ ñuꞌu lady meññ o nehx ñuꞌu; mazyg ni rsahc‑e, bâḻ rahp meññ guîlmbañ-coby ni rdee Dioz.
16 No dxu rtzoo mod-rieꞌ, ziuꞌ yâme dzie tziaawy, no Dioz zioob leeyâme no gyre meññ ni ulihbu xmeññ me lee.
17 Glohdy hôrrieꞌ nehx neu naa ctzuné ndruhty naa lguia gyre nirieꞌ; porni dladyaꞌ queꞌ masy ni rdee diidz nacaꞌ xmeññ Jesúz ni rtzoo mdad.
18 Jesucrist, ni rtzoo mdad nó, cu xlaꞌy gyre laꞌd, rman. Modé gacu.