2
Ni biahd Spirt-Sant
1 Dze-bydzihñ lni ni le Pentecostéz, to xilni meññ-Isṟael, xmeññ Crist bydohp yâme, nu yâme tohzy.
2 Tohzydzi bieññ to ṟid-ro ni byruu gybaa beeiy ru rxuu mbedun-ro, no güyuꞌ ṟid-caḻ leññ yuꞌ ru dxie yâme.
3 No bwieꞌ yâme biahd xtahl gue-yaañ beeiy bial no biaꞌnu chehsh to to yâme.
4 No hor-wé gahc güyuꞌ Spirt-Sant xguîlmbahñ yâme, no guzlo ganii yâme zrieñ xtiidz meññ; to to yâme günii ni gayisnii Spirt-Sant leeyâme.
5 Leññ dze-wé yahc nu xtahl meññ-Isṟael Jerusaléṉ ni byruu yahc zrieñ guiedzy gyre lad. Leeyâme ulihbu rzobdiidz xleiy Moiséz.
6 Hor-bieññ yâme ṟidé we naꞌ, bigüieꞌ yâme ru nu apóstl yahc, bydohp meññ-xtahl uga. Rtzunadz yâme, porni gayieññ yâme ganii apóstl yahc xtiidz yâme.
7 Modni rtzunadz yâme, no ra saꞌ yâme:
―¿Dâs‑e meññ-Galilea gyre meññ-rieꞌ ni ganii la?
8 No naꞌ, ¿xnahc‑e gayieññ nó ganii yâme dtiidz nó ni bynizyno nó?
9 Neꞌ gawieꞌ nó nu meññ-Partia, meññ-Media, meññ-Elamm, meññ-Mesopotamia, meññ-Judea, meññ-Capadocia, meññ-Ponto, meññ-ziaad yahc ñaz-Asia,
10 meññ-Frigia, meññ-Panfilia, meññ-Egipt no meññ-África ni nu gahsh Ciren. No nu meññ-Ṟom zegahc ni nu neꞌ ni nac meññ-Isṟael no zrieñ meññ-bidbiꞌ lahd yâme ni rtzoo yahc ni ne xleiy meññ-Isṟael.
11 Zegahc ziaad meññ-Cret no meññ-Araby; zrieñx meññ‑e nó, no ¡xnahc‑e gayieññ nó ganii yâme gyre xroꞌ cos yahc ni rtzoo Dioz no gayieññ nó leeu lo dtiidz nó!
12 Gyre yâme rtzunadz no gazacngann yâmeu, ra saꞌ yâme:
―¿Biahx‑e leeu gyre ni gawieꞌ nó?
13 Per zrieñ yâme aaḻ gaxidzyno, ne yahc:
―¡Meññ-rieꞌ nzuhdzy yâme we!
Ni günii Pedr
14 Were guzli Pedr no gydiby tzipychop apóstl, günii me ndip ra me leeyâme:
―Meññ-Judea no gyre laꞌd ni nu neꞌ Jerusaléṉ, gayapyaꞌ laꞌd rquihñu gann laꞌd nirieꞌ, no leewe lâ guieññ zaꞌgndzi ni gynin.
15 Nehx leeu mod-ne laꞌd. Meññ-rieꞌ yahc dac‑e nzuhdzy yâme. Rsily ziaꞌr‑e ngâstoo, leer las-nuevy.
16 Ni gawieꞌ laꞌd gayahc la, leeu we ni günii profet ni le Joel. Mpyquie-rieꞌ günii me, ne me:
17 Ze ne Dioz:
Leññ dzé ni gadziñgahsh gynihty guiedzylie, cshaalaꞌ diSpirtaꞌ lguia gyre meññ.
Xiñ-ñooby laꞌd no xiñ-ndzaꞌb laꞌd, zisnin leeyâme;
no xiiñ laꞌd ni mêññxtohby lee, zwieꞌ yâme ni glun leeyâme beeiy lo mpcaaḻ.
No xmeññ laꞌd ni mînguhl lee, znii xcaaḻ yâme ni rnin.
18 No leññ dze-wé yahc zdedyaꞌ diSpirtaꞌ meññ-mpyquie no meññ-ngünaa ni rtzoo dixtziñaꞌ,
no guisnin leeyâme ni dziguiahc.
19 Leññ gybaa zwieꞌ meññ guîlrtzunadz ni ctzon.
No zegahcu lo guiedzylie zwieꞌ yâme señal yahc:
rieñ no gue, no guiahs guhsh.
20 Zacncawy lo ncübidz,
no zac-nixni lo mboo beeiy rieñ,
dze-dgueññ gydzihñ ni guiaad Señor,
to dze-ro ni rsahc.
21 No nitisy dxu gnab lo Dioz gylaa la, zlaa de lo guîlnadz ni ziaad.
22 ’Meññ-Isṟael, lâ guieññ ni gapyaꞌ laꞌd. Nann laꞌd Dioz bluu me de ni pshahl me Jesúz, to meññ-Nasaret, no gucno me lee lehdy ptzoo Jesúz xroꞌ cos yahc, no guîlrtzunadz, no ni ngann, no ptzoo me leeu ñaz-lo laꞌd.
23 Per Dioz ba gahc nann me bia dziguiahc Jesúz, bdee me ñahz günahzy laꞌd leeme, no guhc ni ba ne me gac. No ru ba nu Jesúz lo ña laꞌd, gucno meññ-dirquihñ laꞌd pquehd leeme lo cruzy. No mod-wé bgaꞌdy laꞌd leeme.
24 Per Dioz bispahñ leeme, güloo leeme ladzyña guîlguhty, porni guîlguhty nehx beeiy ncau leeme.
25 Ṟeiy-Davit günii me lguia Jesúz, ne me:
Naa nannaꞌ tirgahc‑e nu Dioz no naa,
No nehx zruganaꞌ, porni gayacno me naa.
26 No leewe rxihlyaꞌ, no rguguian leeme.
Naa nannaꞌ guîlguhty nehx stzoo naa mbehty, mazyg glesy Dioz naa,
27 porni lii nehx ssaꞌniꞌ naa lahd mînguty,
ni nehx zdeedyiꞌ ñahz gynihty xcuerp xiiñiꞌ ni ndziy lee.
28 Bluuy naa ñahz ni rdee guîlmbahñ ni nehx ziuꞌ dzé gynihty;
no zegahc rxihlyaꞌ porni nuy no naa.
29 ’Rman, gapyaꞌ laꞌd ni uli, gyre nó nann ngydo-ṟeiy-Davit ni guhc difamily nó, guhty me no bygaꞌdzy me, no xbaa me, leexu nu ziaꞌ no nó glo naꞌ.
30 Per ṟeiy-Davit, profet leeme, no leewe nann me togahcs günii Dioz gdee to ṟeiy nó ni gyruu de lo gahc xfamily me no ni guiaꞌn ctzoo mdad xilgar me.
31 Ṟeiy-Davit, scâsy ni nwieꞌ me ni dziguiahcr lguia ni gübahñ Crist. Leewe günii gahcme, ne me nehx ziaꞌn Crist lahd mînguty, no nehx znihty xcuerp me.
32 No leeme we Jesúz ni bispahñ Dioz lee, no noꞌ bwieꞌ noꞌ guhcu mod-wé.
33 No leewe, biahs me zia me zicchie me coo Dioz lad-drech, no xTad me Dioz bdee Spirt-Sant cuaꞌ me, ni ba nac diidz tzu no leeme. No luxu, güdiiz me nirieꞌ ni gawieꞌ laꞌd no ni gayieññ laꞌd.
34 Dac‑e ṟeiy-Davit biahs zia gybaa, nîcze leegahcme ne:
Ze ne Dioz, ra me Señor ni rtzoo mdad naa:
“Gürie dcoon lad-drech,
35 xtâ glo ctzon de ni gyre meññ ni rdziadzyno lii guisshiby yâme loꞌy.”
36 ’Laꞌd meññ-Isṟael, racdadzyaꞌ gann laꞌd ni uli: Jesúz ni gazataꞌ lee, ni pquee laꞌd lee lo cruzy la, leeme we ni ptzoo Dioz lee Señor ni rtzoo mdad no ni nac Crist.
37 No diidz ni bieno Pedr leeyâme bydzihñu xtâ leññ xguîlmbahñ yâme, no günabdiidz yâme Pedr no zrieñ apóstl, ra yâme lee:
―Rman, lâ ga noꞌ, ¿xnahc ntzoo noꞌ naꞌ?
38 Ra Pedr leeyâme:
―Lâ csaan ni nahcsy ni nac laꞌd, no to to laꞌd lâ gyrôbnihs por le Jesucrist lehdy guieññ ba psiaaḻladzy Dioz xguîlquie laꞌd; no zdee me Spirt-Sant laꞌd.
39 Nirieꞌ ni bdee Jesúz xtiidz me cshahl me, par laꞌd‑e leeu, no zegahcu par xiiñ laꞌd no xtâ gyre meññ ni nur ziht; leeu we gyre meññ ni yqueer tDioz nó riedz lee, leeme we ni rtzoo mdad.
40 No nirieꞌ no zrieñ yahc diidz güluꞌ Pedr xguîlriehñ yâme, ne me:
―¡Lâ gyruu lahd meññ-dirquihñ ni nu ni naꞌ par di gynihty laꞌd dze-gynihty yâme!
41 No leewe, gyre meññ ni bylíladzy ni günii Pedr, byrôbnihs yâme; no dze-wé güyuꞌ beeiy stzonn mily meññ lo xtiidz Dioz.
42 No nehx rrugan yâme de ni gatzoo yâme ni galuu apóstl yahc leeyâme. No tohzy nu gyre yâme, no rahgü yâme no rnab yâme lo Dioz.
Mod-rtzoo xmeññ Crist ni güyuꞌ nier lee
43 Gyre meññ ni nu uga rtzunadz por xroꞌ cos yahc no zrieñ ni ngann ni ptzoo apóstl yahc.
44 No gyre meññ ni ba bylíladzy xtiidz Dioz ba tohzy guîlriehñ rahp yâme, no to to yâme ni rahp xcos, rdee yâmeu beeiy gahc ñahcu xchieñ gyre yâme.
45 No rtoꞌ xtziiñ yâme no zrieñ ni rahp yâme, rguiiz yâme sahcu rcaꞌ meññ-rman ni gayaadz ni yquihñ.
46 No gyre dzé rdohp yâme leññ idoró tohzy. No zegahc ria yâme xiryuꞌ saꞌ yâme, rahgü yâme tohzy no guîlrxihly, no ndruhty yâme nehx rguguia leegahc.
47 Tirgahc gaguguia yâme Dioz, no gyre meññ ni nu leññ guiedzy-caḻ biuꞌladzy ni gatzoo yâme. No to to dzé ma gane yâme, porni gayislaa Dioz xtahl meññ de lo guîlnadz no gayuꞌ gahc yâme lahd xmeññ me.