18
Kugwa kwe echikaali cha Babéeli
1 Obuchilo ago kagahiingwiile, léeba naábona maléeka oóndi naahanaántuka kuluga omu igulu. Akaba ayina obuhicha buháango, ne éensi yaáyeengelela habwi ikuzo lyoómwe.
2 Náwe yaáyaambaza lwa amagala ahi iláka liháango bwooli, naagaámba aáti,
“Cháagwa!
Echikaali cha Babéeli cháagwa!
Óobu chaábeele obwiikalo bwa amazimu
no obwiikalo bwa buli izimu.
Chaábeele ahaantu ha buli nyonyi mbi no okutamisa.
3 Cháagwa habwo kuba Abanyamahaánga bóona
bakanywa evíini yaácho,
baátamiila ne enaámba yo obusaambani bwaácho.
Abakáma be éensi baásaambeene náze.
Abatuunzi be éensi
bakahíta habwo bwíinzi bwa amagala ge ebya katóozi byoómwe.”
4 Niho naáhulila iláka eliindi kuluga omu igulu, niligaámba liti,
“Abaantu baanze, mulugého hali weényini,
kuba mutateelana náze kukola ebiheno byoómwe
no kuba muteéza kugwéebwa no omuchwaáziiko hamo náze.
5 Habwo kuba ebiheno byoómwe byaábéele bíinzi,
no óobu byaáhika omu igulu.
Náwe Múungu yaábiizukile ebikolwa byoómwe byo obuzilwa.
6 Nka nikwo yaábakoliile abáandi, neemwe mumukolele mútyo nyini.
Káandi mumukolele entúlo ibili yo obuzilwa óobwo yaábakoliile abáandi.
Omu mutáho gwe,
mumutulanilize entúlo ibili ye ebyaágalalo éebyo yabatulaniilemo íimwe.
7 Nko óokwo yeekulize no kutúula omu bya katóozi, mumuchwaáziike no kumwaágalaza kwiingana ne ebikolwa bye.
Habwo kuba omu muganya gwoómwe ayebuga omu kugaamba,
‘Íinye niintegéka nko omugóle, íinye tiíndi entuúmbakazi, mala tiíndizila entíimba káandi.’
8 Ha bwéecho ennáku zóona zilaámugweela aha chilo chimo choónka,
okusiingaalika kwe enkabe, ze ennáku, ne eze enzala.
Naayochibwa butúnu no omulilo,
habwo kuba Omukáma Múungu óogwo alikuunchwaáziika niwe wo obuhicha.”
9 Abakáma be éensi áabo bakasaambana náze no kukoba hamo náze omu bya katóozi balaáchula no kubolooga obuchilo balibona omwíika gwo kusiingaalichwa kwoómwe.
10 Abakáma abo be echo chikaali habwo kweétimwa kwe ebyaágalalo byaácho, baleémeelela hala no kuchula nibagaamba:
“Ne lóoko! Ne lóoko echikaali, íiwe
Babéeli, echikaali echiina amagala!
Omuchwaáziiko gwaawe gwaákuhikile
aha káanya ke esáaha eémo yoónka.”
11 Abasúluza be éensi balaátéela empámo no kwaalama, habwo kuba tálibaho muuntu wo kugula káandi entuundo záabo.
12 Táliho omuuntu káandi wo kugula entuundo záabo ze ezaháabu, eféeza, amabáale go obukaani ne enkwaanzi, kitani nduunzi, emyéenda miluunzi ze ezaambalau, ze ehalili, ne ezili kutukula, ebiseme bye embaáho zo obubáani, nali ebiintu éebyo ebikozilwe na amahéembe ge enzozo, na buli chiintu echikozilwe kuluga embaáho zo obukaani, nali bye emiliinga, isiinza, nali emalumaalu,
13 omudalasíini, ebiluungo, omugaazu, emanemane nali obubáani, nali evíini, amazuta ge emizeituni, nali ensaano nduunzi ne engano, nali ente, entaama, efaláasi, amagáali go kukweeswa ne efaláasi, nali abahálila, abaantu áabo abeena obulami.
14 Mbwéenu, abasúluza nibagaámba báti, “Ebiintu biluunzi éebyo okaba noobiligila bwooli aha muganya gwaawe tibichibaho. Byóona ebya katóozi ne ebi ikuzo byaábahwéela. Tibichikuliho na tolibibona no obuche bwa akáti.”
15 Abasúluza áabo bakahíta kuluga hali weényini balaáyemeelela hala habwo kutíina olwo lwaágalalo, balaáyaambaza no kwaalama.
16 Nibagaámba báti,
“Ne lóoko! Ne lóoko echikaali chikúlu.
Echikaba chizweele emyéenda miluunzi ze ekitani,
ze ezaambalau, ne emyéenda elikutukula.
Chikaba cheechuma habwe ezaháabu,
amabáale go obukaani, ne enkwaanzi.
17 Náho obwo buhite bwóona bwaásikiizwe
aha mwáanya gwe esáaha eémo yoónka.”
Buli musalahaangi na ababugi bo omu nziba ababugisa amataanga, abasalahaangi na abatuunzi bóona abo omu nziba, balyeémeelela hala.
18 Obuchilo balibona omwíika gwo kusiingaalichwa kwaágwo, balyaáchula kwo kuhamuka ahi iláka nibagaámba, “Tichiliho echikaali echíindi nke echikaali chikúlu echi!”
19 Balyeésaamulila enkuungu omu mitwe yáabo kunu nibaambaza omu kugaamba báti,
“Ne lóoko! Ne lóoko echikaali chikúlu.
Echikatukola íichwe twéena abeene eméeli tube abahíte,
habwo obuhite bwaámo.
Náho echikaali chóona chaásiingaalika aha káanya ke esáaha eémo yoónka.”
20 Munulilwe, íimwe áabo mulikutúula omu igulu. Munulilwe, íimwe abaantu ba Múungu, entumwa, na ababáasi, habwo kuba Múungu achwaáziikile echikaali echo habwa áago chikabakolela íimwe.
21 Mbwéenu, maléeka wa amagala yaáyeleeza ibáale nko olubeengo luháango, yaálunaga omu nziba, yaágaamba aáti,
“Aha magala méenzi nka aga,
echikaali chikúlu cha Babéeli olyaánagwa na tolibonwa butúnu káandi.
22 Enzina za abalikutéela endono, emiléela, ne ebikuli,
talibaho omubuya wa akazeendele koóna kóona,
káandi tililihulilwa omuli íiwe no obuche bwa akáti iláka lyo olubeengo.
23 Omwaanga gwo olumuli tigulimulika káandi omuli íiwe no obuche bwa akáti.
Nali tihaáliba na amazenyi ga chisweéla nali chisweélwa.
Echikaali cha Babéeli chikakolwa chíti
habwo kuba abatuunzi baawe
bakaba bali abakúlu be éensi,
na habwo kuba amahaánga góona gabeehilwe habwo obulozi bwaawe.
24 Omuli íiwe ekabonwa enságama ya ababáasi ne enságama ya abaantu ba Múungu,
hamo ne enságama ya abaantu bóona áabo abaayisilwe aha, omu nsi.”