Empola Nzima za Yeézu Kristu
nko óokwo zayaandikilwe na
Matayo
Obweébeembezi
Echitabu echi chikaandikwa na Matayo. Óobu Matayo akaba ali omuhaámbya, Yeézu akamwéeta kuba omuheémba woómwe. Empola nyíinzi éezo Matayo akaandika omu chitabu echi, ne éezo akazisiinza weényini ha méeso goómwe. Omu chitabu echi, Matayo akaandikila bwooli Abayahudi áabo abakamwiíkiliza Yeézu. Náho Empola Nzima habwa Yeézu ti habwa Abayahudi boónyini boónka, náho na habwa abaantu bóona be éensi ezi. Empola Nzima neesoomboola nka nikwo Yeézu niwe Kristu no Omuchuúnguzi wa abaantu. No kulabila Yeézu nka nikwo Múungu akahikiiliza góona áago akaba atiilého omulago ha baantu nka nikwo akole.
Echitabu cha Matayo chiloongizwe kuzima na nichisoomboola amahano méenzi omu bulami bwa Yeézu omu nsi ezi, kubaandiza kuzaalwa kwoómwe kuhicha kusuba kwoómwe omu igulu. Ahagáti nichisoomboola ameégeso méenzi áago Yeézu akaba naayegesa abaantu. Omu meégeso goómwe, nitubona kusoombookelwa nka nikwo buli obukáma bwa Múungu, na nitwaangiswa kutúula omu bulami bwo kumunuliza Múungu.
1
Olugaanda lwa Yeézu Kristu
(Luka 3:23-38)
1 Aga nigo amazíina go olugaanda lwa Yeézu Kristu. Yeézu Kristu akalugiilila omu luzáalo lwa Daudi óogwo akaba naalugiílila omu lugaanda lwa Ibrahímu.
2 Ibrahímu akazaala Izáaka,
Izáaka yaázáala Yakobo,
Yakobo yaázáala Yuda na badugu boómwe.
3 Yuda yaázáala Peréesi na Zera hali Tamari,
Peréesi yaázáala Hezeróoni,
Hezeróoni yaázáala Aramu,
4 Aramu yaázáala Aminadabu,
Aminadabu yaázáala Nashoni,
Nashoni yaázáala Salmoni,
5 Salmoni yaázáala Boazi hali Rahabu,
Boazi yaázáala Obedi hali Ruthu,
Obedi yaázáala Yese,
6 na Yese yaázáala omukáma Daudi.
Daudi yaázáala Selemani kuluga aha mukázi ogwo akaba ali muka Uria,
7 Selemani yaázáala Rehoboamu,
Rehoboamu yaázáala Abiya,
Abiya yaázáala Asa,
8 Asa yaázáala Yehoshafati,
Yehoshafati yaázáala Yoramu,
Yoramu yaázáala Uzia,
9 Uzia yaázáala Yoatamu,
Yoatamu yaázáala Ahazi,
Ahazi yaázáala Ezekia,
10 Ezekia yaázáala Manase,
Manase yaázáala Amoni,
Amoni yaázáala Yosia,
11 na Yosia yaázáala Yekonia na badugu boómwe,
obuchilo óobwo Abaiziraeli bakakwáatwa enkwáate babe abahálila omu nsi ya Babéeli.
12 Abaiziraeli kábaabeele baáfulukiile okwo omu nsi ya Babéeli,
Yekonia yaázáala Shealitieli,
Shealitieli yaázáala Zerubabeli,
13 Zerubabeli yaázáala Abihudi,
Abihudi yaázáala Eliakimu,
Eliakimu yaázáala Azora,
14 Azora yaázáala Zadoki,
Zadoki yaázáala Akimu,
Akimu yaázáala Eliudi,
15 Eliudi yaázáala Eleazari,
Eleazari yaázáala Matani,
Matani yaázáala Yakobo,
16 Yakobo yaázáala Yozéfu, iíba wa Mariamu,
náwe Mariamu yaámuzáala Yeézu óogwo alikwéetwa Masihi.
17 Mbwéenu, kuluga ahali Ibrahímu kuhika kuzaalwa kwo omukáma Daudi hakaba heena enzaalwa ikúmi ne eéna. Káandi, kuluga ahali Daudi kuhika ha buchilo óobwo Abaiziraeli baáfululiilwe babe abahálila omu nsi ya Babéeli, hakaba heena enzaalwa ezíindi ikúmi ne eéna. Káandi, kuluga omu buchilo óobwo baáfululiilwe okwo kuhika kuzaalwa kwa Masihi, hakaba heena enzaalwa ezíindi ikúmi ne eéna.
Kuzaalwa kwa Yeézu Kristu
(Luka 2:1-7)
18 Empola yo kuzaalwa kwa Yeézu Kristu niyo ezi. Mariamu nyina wa Yeézu, akaba asuumbikilwe na Yozéfu. Náho acháali batakalyaámile hamo, Mariamu yaásaangwa ayina éenda, ne éenda ezo akaba ayinayo aha buhicha bwo Omwooyo Mutakatíifu.
19 Yozéfu ali iíba, akaba ali omuuntu we entúungwa nzima omu méeso ga Múungu. Talayeenzile kumulega Mariamu, ha bwéecho akalamula kumuleka bweeseléke.
20 Náho obuchilo naateekuza aátyo, ahonyini maléeka wo Omukáma Múungu amweésuululukiza omu kulóota, yaámugaambila, “Yozéfu, owo luzáalo lwa Daudi otatiina kumutwáala Mariamu, habwo kuba echili omuunda yoómwe achibweene habwo obuhicha bwo Omwooyo Mutakatíifu.
21 Alyaázáala omwaana wo obwoózo, neewe olyaámuluka izíina lyoómwe Yeézu, habwo kuba ogwo niwe alichuungúla abaantu boómwe kuluga omu biheno byáabo.”
22 Ebyo byóona bikabaho bityo, chibone kuhikiilila echigaambo éecho Omukáma Múungu yaágaambile aha muháanda gwo omubáasi woómwe aáti,
23 “Léeba, omubiíkila alyaátwáala éenda,
náwe alyaázáala omutábani.
Niho bamuluke izíina lyoómwe Emanueli.”
Ensoonga yi izíina eli nikwo kugaamba oóti, “Múungu ayikala hamo neechwe.”
24 Obuchilo Yozéfu yaasisimuka omu túlo, yaákola nko óokwo maléeka wo Omukáma Múungu yaámulagila. Yozéfu yaátwáala Mariamu kuba mukazíwe,
25 náho talalyaamile náze kuhika obuchilo Mariamu yaaba yaázáala omutábani. Yozéfu yaámuluka ogwo mwáana izíina, Yeézu.