2
1 Nzhaklan gon go, dox bid ninen por go no por rë men che'n Jesukrist xa' nzho yezh Laodicea, mbaino nu por más rë men che'n Jesukrist xa' nagat libe' da.
2 Se' nilen par más yila go widi'zh che'n Dios, no nazhebt go lo rë kwa'n nizak go, no par le' go tutsa xigab, no chizhi' go rë wech go, no par gap go rë kwa'n wen che'n Dios, nes par nane go, walika mizobyek go xmod nak rë widi'zh naga'ch che'n Dios, no widi'zh naga'ch re' nak yub Jesukrist,
3 porke nab tsa Jesukrist nzhak nile' nixa'l yek men par ne bixa' rë kwa'n nzhak Dios no rë kwa'n nane Dios; no rë kure' nak nela tu kwa'n dox tsak mbaino naga'che par lo rë men.
4 Nin rë kure' lo go par nayila go rë xa' kwa'n chigab wali kwa'n nidi'zh ba', per ka mbël bixa'.
5 Ter gat nzot yuba kun go, per nak da nela tu men chigab nzo ka kun go ga', porke zilita' nilen xigab por go, kuze' nizak laxto'n por tutsa nak xigab che'n rë go, mbaino por naye nzo go lo kwa'n ngwayila go Jesukrist.
6 Nela nguziyël go, nile' Krist Jesús mandad lo go, se'ska naki'n ban go nela xmod nzhakla Me, par nilu' tutsa nak go kun lë' Me.
7 Naye guzo go lo kwa'n ngwayila go Jesukrist, nela tu ya kwa'n dox luch kinu ga', o nela tu yo' kwa'n nzob lo tu simient dox na'ch ga'; nes par ro'b go lo widi'zh che'n Dios kwa'n ngwayila go no rë widi'zh kwa'n mitse'd go. No zilita' bilu' go lo Dios, lë' go dox nizak laxto' por rë kwa'n wen kwa'n mine' Me nka' go.
Yalnaban kwa'n niza' Jesukrist ban men
8 No gok natsin go par nala' go kide rë men ba' go, rë xa' kwa'n nidi'zh chigab rë kwa'n wali no rë kwa'n chul, per pura rë kwa'n nichao' yek bixa'i. No rë men ba', nile' bixa' rë kwa'n che'n mbi mal kwa'n nikizë yizhyuo kun poder, porke rë men ba', gat nile't bixa' kwa'n nzhab Krist,
9 porke xmod nak Dios, no rë kwa'n kinu Dios, sa' ska nak Jesukrist lo mis lë'ska Diose, ter ngop Jesukrist tu kwerp che'n men yizhyuo,
10 no kinu go yub yalnaban kwa'n nazhon che'n Jesukrist, Me más tsak, no Me más nile' mandad lo wanei cho xtu sprit, ter kwa'n más naye mandad che'ne, o kwa'n we'tsa nile' mandade.
11 No nu por nak go tutsa kun Jesukrist, mikë' Krist tu señ laxto' go, no gat lë't nela rë señ kwa'n nikë' rë men kwerp che'n wech bixa'. Kuze', mile' go gan lo rë kwa'n nzhakla kwerp che'n go, le' go, rë kwa'n nzhakla wei' go par yachin go lo rë kwa'n gat lë',
12 porke ngoklëi' go le'n nits por nak go men che'n Jesukrist, kure' nilu'; nu go miga'ch tutsa kun Jesukrist or miga'ch Me; no nu or nguruban Me, nu go nguruban junt kun lë' Me; porke ñila go, kinu Xuz Me Dios yalnazhon kwa'n mile', nguruban Jesukrist.
13 No lë' go, galo laka ngok go nela men ngut ga' lo Dios por rë kwa'n nzë'b xki go, no por gat lë't men Israel go, no nu por gat kinut go ley che'n Muisés. Per nal, tutsa kun Krist, mile' Dios nguruban go, no miche' Me rë kwa'n nzë'b xki go.
14 Dios miche' la lo yech che'n Me plo nzobni' rë kwa'n ñal zakzi be por rë kwa'n nzë'b xki be lo Me, plo nzob rë ley kwa'n nzhab: “Nale'tal kuba'.” Mizubchi Dios yech re' or nkë' Jesukrist lo krus.
15 No or ngut Jesukrist lo krus, mizubchi Me rë poder kwa'n kinu wanei cho rë sprit kwa'n nile' mandad. No or mizubchi Jesukrist rë poder kwa'n kinu rë sprit re', orze' milu' Jesukrist, ni tu ra' más rë sprit re' kinu poder par le' mandad.
Bikwa'n go nab tsa rë kwa'n nak che'n Dios
16 No bizob yek go rë widi'zh kwa'n milun lo go, par nayaa laxto' go or di'zh cho rë men tich go, por kwa'n nzhao go o por kwa'n nzho go, o, ¿chon gat nile' go rë lani kwa'n naki'n le' go?, o, ¿chon gat ña laxto' go, le' go lani rë zhë kwa'n nibi mbëo', o rë zhë kwa'n nayi' kë men Israel zhi'n?
17 Rë kure' nak nela tu xkal ga' par kwa'n laore gak, no kwa'n laore gak re' nak Jesukrist.
18 Kuze' nin lo go, nala't go chi cho men gakla kubchi kwa'n nak che'n go lo Jesukrist. Rë men re', chigab nilu' más nzhak bixa', no nilu' nado' bixa' más ke xtu men; mbaino ño laxto' bixa', nizuxib bixa' lo rë ganj, nela lo Dios ga'. No nzhab bixa', nine bixa' rë kwa'n nazhon. Per por gat lë' nak xigab che'n bixa', yent cho kwent rë kwa'n nidi'zh bixa', mbaino marian bixa'.
19 Rë men ba', gat nzhont bixa' ro' Jesukrist, Me kwa'n nile' mandad lo rë men che'n Me, nela xmod nile' yek men mandad lo dub kwerp che'n men; no niza' Jesukrist yalnaban kwa'n kinu Me, par ka' rë men che'n Me, no por Jesukrist, tutsa nak bixa', mbaino más nzhak nayax bixa' no niro'b bixa' lo kwa'n nak che'n Dios, nela xmod nzhakla Dios.
20 No go, tutsa ngok go kun Krist por ngut Krist lo krus, kuze' gat ñaltra' le' go rë kwa'n nak che'n rë sprit kwa'n kinu poder par le' mandad lo yizhyuo re'. No chi walika ngulo' Krist go lo rë kuba', orze', ¿chon nikizë ra' go, nela xmod nikizë rë men yizhyuo re'? No, ¿chon nzhon go ro' rë xa' nidi'zh:
21 “Nazental kuba', no nale'tal preb xtu kuba', o nazental kuba' kun ya'l”?
22 Rë kwa'n nidi'zh bixa' re', kwa'n nzë yek bixa'i, nidi'zh bixa' pura kwa'n nzhao men o kwa'n nzho men, kwa'n lwega' nilox.
23 No nzho men se' nidi'zh bixa' por rë kuba': “Wenka rë kure' par be, porke nile'i jwers, nizuxib be lo Dios, no gak nado' laxto' be lo Dios, mbaino zakzi be kwerp che'n be par wi' Dios wen lo be.”
Per nin lo go, yent cho kwent rë kuba', porke nagakt ka'ne lo rë kwa'n gat lë' kwa'n ngolnu be.