8
Regunaa ni gucnäj Jesús
1 Dxejcti gusloj huij Jesús guiraa reguejdx näjza rerench, cagusule'ni xtidx Dios, caguluiini xcuent xcäḻrnibee Dios loj rebejṉ. Sanäni rexpejṉpacni
2 näjza gaii gunaa ni abasiajcni, agulääni rebeṉdxab lastooreni, näjza basiajcni xcäḻguijdxreni. Tejni laa Marii ni laaza Magdaleṉ, ni gulää Jesús gajdz beṉdxab neṉ lastooni.
3 Stee gunaa laa Xuan, ni najc chääl Chuza, ni ruhuii xhixten Herodes. Stee gunaa laa Susaṉ. Guyu'za sgaii gunaa. Guiraa reni'c rudeed lagajc xhixtenreni te rio' recos ni rquiinreni.
Xcuent bejṉ ni rbe'c binij
(Mt. 13:1‑9; Mr. 4:1‑9)
4 Dxejcti bire' xhidajl bejṉ lojni ni birii xhidajl reguejdx. Lojreni gunii Jesús con te cuent ni ruluii, räjpni:
5 ―Birii te bejṉ sale'c binij. Cheni cabe'cni binij, yu' binij ni bitejb cuä' nezyuj. Che sadejd rebejṉ baläjreni yejc binijga, biäädza remane' ni rutajt xhaguibaa, gudajwrenini.
6 Yu'za lajt bitejb binijga neṉ reguij cadro xheti xhidajl yuj. Che gulejn binijga, gubidzgajcni sa'csi xheti xcojp ro'c.
7 Yu'za lajt bitejbni nez neṉ reyaguejch. Che gulejnni, di reyaguejch nusaan niroob gäjlga.
8 Yu'za lajt bitejb binijga lo yusa'c, ro'c gucduxhni. Cheni guroobni, yu' binijga gujc te gayuu xob loj tejga binij ni gule'c dade'ga.
Che gulujx guniini scree, dxejc guniini dip räjpni:
―Palga sajc gucuadiajgtu rediidxga, coḻcuadiagsa'cni.
Xhicuent gunii Jesús recuent
(Mt. 13:10‑17; Mr. 4:10‑12)
9 Dxejcti gunabdiidx rexpejṉpacni lojni räjpreni:
―¿Xhi säloj cuentre?
10 Dxejc räjpni lojreni:
―Lojtu ni najc rexpejṉä suniidx Dios yäḻnajn te gacbeetu reyäḻxhiga'tz xten xcäḻrnibeeni. Loj chutis stee bejṉ, siniä recuent lojreni te mase cadxelojreni, direni fisa'c, luxh mase cacuadiajgreni, direni gacbesa'c.
Rusule' Jesús xcuent ni rbe'c binij
(Mt. 13:18‑23; Mr. 4:13‑20)
11 Räjpzani:
―Scree säloj cuentre, rebinij najc si'c xtidx Dios.
12 Binij ni biajb lo nezyuj najc si'c rebejṉ ni rucuadiajg xtidx Dios. Dxejc riääd beṉdxab, riäddzucajni rediidxga lastooreni te na'c chalilajzreni xtidx Dios, te na'cza ḻaareni lo dojḻ.
13 Binij ni biajb neṉ reguij najc si'c rebejṉ ni rucuadiajg xtidx Dios, rbaalajzreni; per sa'csi xheti xlobaareni, nälajznu, direni gandzu'tz xtidx Dios, rililajzreni te bo'c, per che rsacsí rebejṉreni, rbälazreni xtidx Dios.
14 Binij ni biajb neṉ reyaguejch najc si'c rebejṉ ni rucuadiajg xtidx Dios, per laḻ ni sanuureni xnejzreni, rijia'nreni lo recos guedxliuj, lo yäḻnasa'c ni ruhuiireni, näjza rujnreni si'ctis ni rlajz tiejxhreni. Reni'c rujn runijtreni xtidx Dios, ni'cni direni guzoob xtidx Dios, direni chanuu te gunreni xtzunsa'c Dios.
15 Binij ni riajb lo reyusa'c najc si'c rebejṉ nani rucuadiajg xtidx Dios, ni rililajz diidxga guideb te lastoya ni najc hueen. Randzu'tzreni xtidx Dios, dxejc rudeedreni te yälnasa'c, nalajznu ruzoobreni xtidx Dios, rujnreni xtzunsa'c Dios.
Xhet yu'di ni naga'tz par tejpas
(Mr. 4:21‑25)
16 Räjpzani:
―Ruti te bejṉ ni rucuaguij te bajl dxejc rusäuni te caj yejc bajlga, dizani gusujnini dejtz te loon. Alga rusoobnini neṉ candilieer loj te mex te guzanijni guideb neṉ yu'ga te reni jiu' fiireni lo bajlga.
17 Xhet yu'di ni yuchetzu'tzdi ni di guidzujṉ dxej guiluiini; xhet yu'diza ni naga'tz ṉaj ni di guidzujṉ dxej gacbee bejṉni.
18 ’Ni'cni coḻcuadiagsa'c diidx; sa'csi guiraa rebejṉ ni rajp yäḻracbee, sajprureni yäḻnajn. Luxh reni di ninuu nucuadiajg xtidx Dios, lojni sibicaj näj ni abacuadiajgni, ni rchaloni najnni.
Xnan Jesús con rebejtzni
(Mt. 12:46‑50; Mr. 3:31‑35)
19 Dxejc bidzujṉ xnan Jesús näjza rebejtzni cadro suga'ni, niluxh di niajcdi nibigreni lojni sa'csi tre' xhidalduxh bejṉ ro'c.
20 Dxejcti huisa'n te bejṉ diidx loj Jesús, räjpni:
―Xnan guejblu näjza rebejtz guejblu suga' rolä', luxh rlajzreni fiireni lo guejblu.
21 Badzu' Jesús diidxre lojreni, räjpni:
―Xnanä näjza rebetzä najc rebejṉ ni rucuadiajg, ni ruzoobza xtidx Dios.
Basiacdxi Jesús te beduxh
(Mt. 8:23‑27; Mr. 4:35‑41)
22 Te dxej biu' Jesús näjza rexpejṉpacni neṉ te barcw. Dxejc räjpni lojreni:
―Coḻcho' stelaad ro' nisre.
Basyu'reni barcw lo nis, sä'tireni.
23 Cheni sadejdreni galäii nisga, gudiejs Jesús neṉ barcw. Dxejc gubi' te beduxh lo nisga, luxh sa'csi lacti nadip ro' bejga, gusloj cayu' nis neṉ barcw, ameerli jiääz barcwga lo nis.
24 Dxejcti huicuäänreni Jesús, räjpreni lojni:
―¡Mastr! ¡Mastr! ¡Cayääznu lo nis!
Che gubajṉni, huistieni, dxejc gudidxa'ni lo bejga näjza lo nis ni cayäsjiaa. Dxejc guläjz bejga, guredxiza nisga.
25 Dxejc räjpni lojreni:
―¿Con xcäḻrililajztu, ä?
Per laareni bidxejbreni, bidxeloduxhreni, canabdiidxreni lo sa'reni:
―¿Chuni'c najc niguiire te rnibeeni bej näjza nis, luxh rusobdiajg bej näjza nis xtiidxni?
Te beṉ Gadara ni guyu' rexsprit beṉdxab lastooni
(Mt. 8:28‑34; Mr. 5:1‑20)
26 Bidzujṉtireni lo yuj xten Gadara ni tre' stelaad ro' nis nez loj reyuj xten Galilee.
27 Cheni biäjt Jesús neṉ barcw baläjni lo yuj, gubig te bejṉ ni siääd guejdxga lojni. Agujc xchej yu' rebeṉdxab neṉ lastooni. Dini gacw xhajbni, dizani cuääz neṉ yu', alga rbäjzni cadro yu' rebaa.
28 Che bahuiini loj Jesús bazuxhijbni nez lojni, guredxa'ni räjpni:
―¿Xhicuent riädchu'lu loonu, luj, Jesús Xi'n Gueb Dios ni rbäjz xhaguibaa? Rniabduxhä lojlu, na'cru gusacsílu nuurnu.
29 Guniini rediidxre sa'csi canibee Jesús guirii rebeṉdxabga neṉ lastoo bejṉre. Agujc xchero cazob rniaaz rebeṉdxabga bejṉga ruliib rebejṉ ni'ni, ṉaani con cadeṉguiib te guilibdzu'tzni, te xhet gundini bejṉ. Niluxh laani rutiugya'ni recadeṉ, dxejc rebeṉdxabga rinärenini nez lo reyubijdz.
30 Jesús gunabdiidx lojni, räjpni:
―¿Chu laalu?
Dxejc badzu'ni diidxre loj Jesús räjpni:
―Legión najc laä.
Si'c guniini sa'csi xhidalduxh najc rebeṉdxab ni yu' neṉ lastooni.
31 Dxejc gunabduxhreni loj Jesús na'c guxhaḻsacnireni cadro biriireni.
32 Lagajc dxejc suga' xhidajl cuch cayajwreni guixa' lagajc nejzga lo te bala'. Dxejc gunab rebeṉdxabga loj Jesús te gusaanni jiu'reni neṉ recuchga. Che cuäjb Jesús,
33 biṟii rebeṉdxabga neṉ lastoo dade'ga, biugajcreni neṉ recuchga. Che biu'reni neṉ recuch, baxuṉ recuchga bitejbreni ro' te bala', dxejc biajbreni lo nis, ro'cti gujtreni.
34 Baxuṉ reni cayajp recuchga che bahuiireni xhini'c gujc ro'c, huisa'nreni diidx lo rebeṉguejdxga näjza lo rebeṉ ṟench.
35 Dxejc biädhuii rebejṉ xhini'c gujc ro'c. Che bidzujṉreni cadro suga' Jesús, bahuiireni loj bejṉ ni biṟii beṉdxab lastooni. Sobga'ni cuä' ni' Jesús, najcwni xhajbni, luxh xhetru rajcdi yejcni; dxejc bidxebduxh rebejṉga.
36 Sas reni bahuiloj xho gujcni, bijreni diidx xho basiajc Jesús bejṉ ni guyu' rebeṉdxabre lastooni.
37 Dxejc guiraa rebeṉ Gadara näjza reguejdx ni tre' nejzga, gunabreni jiunejz Jesús ro'c sa'csi cadxebduxhreni. Ni'cni biu' Jesús neṉ barcw te gubisacni nejz cadro siäädni.
38 Dade' ni biṟii rebeṉdxab lastooni gunabni lo Jesús gusaanni chanajlnini, niluxh Jesús gunibee jia'nni, räjpni lojni:
39 ―Gubi' rolijzlu te güilu diidx recosro ni bejn Dios xcuent luj.
Dxejc sääni, batie'chni diidx guideb lo guejdxga xhi bennäj Jesúsni.
Xindxa'p Jairo näjza te gunaa ni gudajn xhajb Jesús
(Mt. 9:18‑26; Mr. 5:21‑43)
40 Che gubi' Jesús stelaad nis, bibalajz rebejṉ gubi'ni, sa'csi cabäjzpacreni guibisacni.
41 Dxejc bidzujṉ te bejṉ ni laa Jairo, ni rnibee te guidobäz, bazuxhijbni nez loj Jesús, gunabni chanänini rolijzni
42 sa'csi yu' tejtis xindxa'pni. Yu'ni tzubitio'p ijz, luxh cayacxhuuni, ameerli guetni. Laḻsi sää Jesús rolijzni, birinajl xhidalduxh bejṉni, catäälirenini.
43 Loj rebejṉga nadxaag te gunaa ni agujc tzubito'p ijz cayacxhuuni, cayajcni yäḻguidxbäii. Xlia'si abanijtni guiraa xhixtenni cua' renani rujn remeed.
44 Gubig gunaaga dejtz Jesús te gudajnni ro' xhajbni. Lagajc dxejc biacgajcni.
45 Dxejcti gunabdiidx Jesús räjpni:
―¿Chuni'c najc ni gudajn narä, ä?
Guiraa rebejṉ räjp:
―Dinu gan.
Räjpza Pedr:
―Mastr, ni yu'lu galäii rebeṉ xhidajl, luxh cagutäälireni luj. ¿Xhicuent rniabdiidxlu: “¿Chu gudajn narä?”
46 Räjppac Jesús lojni:
―Yu' chu gudajn narä, sa'csi gucbeä yu' chu basiajc xcäḻrnibeä.
47 Che gucbee gunaaga anajn Jesús gudajnni xhajbni, bidxejbni, racsejslini gubigni loj Jesús, bazuxhijbni lojni. nez loj guiraa rebejṉ räjpni xhicuent gudajnni xhajbni näjza xho biacgajcni.
48 Dxejc räjp Jesús lojni:
―Huij. Gulecdxilajzlu, xinda'pä. Abiajclu sa'csi huililajzlu.
49 Laḻni canii Jesús si'c bidzujṉ te bejṉ ni siääd rolijz Jairo, ni rnibee te guidobäz. Räjpni loj Jairo:
―Agujt xindxa'plu. Na'cru gutajllu xtzuun Dad Mastr.
50 Che biejn diajg Jesús rediidxga, räjpni loj Jairo:
―Na'c guidxejblu. Huililajztis te jiac xindxa'plu.
51 Che bidzujṉreni rolijzni, xtebtis Pedr, Jacoob, Juan näjza xcuzajn dxape'ga biunäjni neṉ yu'ga. Peta rebejṉ ni siädnajlni bia'nreni rolä'.
52 Cayonduxh guiraa rebejṉ ni sobga' neṉ yu'. Dxejc Jesús räjp lojreni:
―Na'c roontu, gajd dxape're guet, nagayejstisni.
53 Alga baxhiznäjrenini, sa'csi anajnreni agujt dxape'ga.
54 Dxejcti gunaaz Jesús ṉaa dxape'ga, dip guniini, räjpni lojni:
―¡Dxape', huistie!
55 Dxejc gubaṉsac dxape'ga, huistiegajcni. Dxejc gunibee Jesús gudeedreni xhi gauni.
56 Bidxeloduxh rexcuzajnni. Per gunibee Jesús na'c güireni diidx xhini'c gujc ro'c.