9
Wneseyaken Jesus te mgyeey ne noze waknet led
(Mr. 2:1-12; Lc. 5:17-26)
1 Lex wdee Jesus lenbark, wdekaa Ne stebkoo nis wdxiin Ne ledne nuu Ne.
2 Nga wdxiin mén lo Ne, wdxinneey mén te mgyeey ne noze waknet led, zhoob men te lo lonwin. Ne wii Ne ne rlaleedx yra mén guin Ne, re Ne lo mengyiz guin:
―Bet tsadet lextoo de zhiin, le xdol de che wak perdon.
3 Orguin nuu lextoo tebëd maxter ley: “Diizree ne re ménree, diznyaan rnii men por Dëdyuzh.”
4 Per kom nan Jesus gan pe nuu lextoo men, re Ne lo men:
―¿Penak rzaa ne mal lextoo de?
5 ¿Pe mazre mbëëdee gue noo lo men: “Le xdol de che wak perdon”, u ne gue noo: “Gutsaxee, gugya”?
6 Orree kwii de yra de gante ne Men ne wdxiid wak Mén rap men poder nee gyëzlyuree por ne gun men perdon xdol mén.
Lex re Ne lo mengyiz guin:
―Gutsaxee gulis xloon de, gugya ruxyuu de.
7 Orguin waxee mén guin sya men ruxyuu men.
8 Ne wii yra mén neguin ne wak, wdxe men, wzelo men wzaknzoon men Dëdyuzh por ne wdee Dëdyuzh poder guin lo mengyëzlyu.
Wbëz Jesus Mdëw
(Mr. 2:13-17; Lc. 5:27-32)
9 Chene wruu Jesus nga ne sya Ne, wii Ne te men ne la Mdëw, zob men ledne rgoob men zeg impwest, lex re Ne lo men:
―Gutanal noo.
Orguin wzuli men zanal men Ne.
10 Te chene zob Jesus ruxyuu Mdëw yra Ne xpén Ne, zob Ne lo mezh zobyu Ne yra Ne tebëd men ne rgoob zeg impwest no le stebëd mendol.
11 Ne wii yra men ne nak farisew neguin, re men lo yra xpén Ne:
―¿Penak ru xmaxter de yra men men ne rgoob zeg impwest no le yra men mendol?
12 Ne won Jesus ne re men zenga, re Ne lo men:
―Men ne ngyëël, rkyiinden men doctor, sinke men ne rzhuun, men guin rkyiinen doctor.
13 Gugya, guseed gan pe rna ne ka lo xgyiich Dëdyuzh ledne re: “Logne rlaan noo nak ne yles lextoo de semén de, lugar ne rket de maa lo fkuuk.” Noo zëëdet noo zëdye noo menwen, sinke le noo zëdye mendol chen ysaan men xgyelmal men.
Wnabdiiz xpén Xwa gan penak rkwandet xpén Jesus
(Mr. 2:18-22; Lc. 5:33-39)
14 Lex wbig xpén Xwa ne rtxobnis, re men lo Jesus:
―Noo yra noo no yra men ne nak farisew, kesentyent rkwan noo rudet noo chene rnab noo lo Dëdyuzh, le xpén de, ¿penak rkwandet men?
15 Wke Jesus, re Ne:
―Lo te dooy, ¿peguin zak noze nles kwiin xemyooz nobye myentras ne benak zu nobye lo men? Per sdxiin dxe ne ybetxee nobye lo men; cheguin si ykwan men.
16 ’Rut rkadaadet tebla lërkweb led te lëryuux, porke rdop lërkweb, lex rtxëzo lëryuux, mazre raknzhoodee ledne wrëz.
17 Ni rgaadet mén binkweb lengyedyuux, porke belne ylaa men zenga, srëz gyedyuux, nigle xiin bin, nigle xiin gyed. Por neguin leen ke gyedkweb taa binkweb, chen zenga ni tebo xiindet.
Xsaap Jairo no le wnaa ne wtee nya led xab Jesus
(Mr. 5:21-43; Lc. 8:40-56)
18 Or ne re Jesus zenga lo men yra men, wdxiin te mén ne rnebééy lenydoo, lex wzuzhib men lo Jesus, re men:
―Le xsaap noo wluzhlo orree, per yoo tsa be yxob nya de led nzeb, sban nzeb.
19 Orguin wzuli Ne zanal Ne men yra Ne xpén Ne.
20 Lex wdxiin te wnaa ne rzhuun, che wzaa chibtxup iz ryab men ren, lex wbig men nes zhich Ne wtee nya men luzh xab Ne,
21 porke nuu lextoo men: “Naal pezee maske nonchee ytee nya noo led xab mén gwa, laa ne gyaken noo nga.”
22 Per wcheree lo Ne wii Ne lo men, lex re Ne:
―Bet tsadet lextoo de zhiina; por ne wlaleedx de noo, wyaken de.
Orgueguin wyaken men.
23 Chene wdxiin Jesus ruxyuu mén guin ne rnebééy, wii Ne ne le musk che ndxin rool, noze rakrëz mén roon mén.
24 Lex re Ne lo yra mén guin:
―Guruu lo leey. Wetet nzaapree, noze nexguees nzeb.
Orguin wzhidxno yra mén guin Ne,
25 per chene che wruu men lo leey, wdee Ne, lex wnëëz Ne nya nzaap guin, waxee nzeb.
26 Ydendxee nes guin wrëëts diiz neguin ne wak.
Wlaa Jesus ne wyenii bzalo txup menngwlëë
27 Chene wruu Jesus nga, wrunal txup menngwlëë Ne, rkarëz men Ne, re men:
―¡XPee David, gules lextoo de noo!
28 Chene wdxiin Ne ruyuu ledne nuu Ne, wbig yrup menngwlëë guin lo Ne; lex wnabdiiz Ne lo men, re Ne:
―¿Pe rlaleedx de ne zun noo gan gyenii bzalo de?
Wke men re men:
―Rlaleedx noo we, Dechey.
29 Lex wtee nya Ne bzalo men, re Ne:
―Por ne rlaleedx de ne zun noo gan gyenii bzalo de, gyenii we.
30 Orgueguin wyenii bzalo men. Lex re Ne lo men:
―Rut lo guedet de gan pezee wyenii bzalo de.
31 Per nonchegue wruu men nga, wzelo men wuu men diiz ydendxee nes guin neguin ne wlaa Ne.
Wlaa Jesus ne wnii te menngup
32 Zegne wruu yrup mén guin lo Jesus, wdxinnogue mén te menngup ne nuu menzab lextoo lo Ne.
33 Zegne wboo Ne menzab lextoo menngup guin, wzelogue men wnii men. Kesentyent wzee wzak yrandxee mén, lex re men:
―¡Nunk gardet kwii be klas gyelmilaguerree Israel!
34 Per le yra men ne nak farisew re:
―Bzelo ne rnebééy lo yra menzab rdee poder lo ménree ne rboo men menzab lextoo mén.
Wneluu Jesus mén lenydoo
35 Wa Jesus yrandxee gyëznzhoo no le rya gyëzwin, wneluu Ne mén lenydoo te te ledne wa Ne, wzëët Ne zegne rkyeen Dëdyuzh no wneseyaken Ne yrandxee mén ne rzak kwaskyertee gyelgyiz no le gyelerzebyoob.
36 Chene wii Ne ndalyaa ndalduxtee mén, wles lextoo Ne men, porke nles rlaa men, nak men zegnak mëkzhiil ne yët gan txu gapkwent.
37 Lex re Ne lo yra xpén Ne:
―Nli ne ndalyaa mén ne rlaan gon xdiiz Dëdyuzh nuu, per yëtet ndal mén ne yzëëto lo men.
38 Por neguin gunab lo Dëdyuzh chen yxaalre Dëdyuzh mén ne yzëëto lo men.