26
Wyan men diiz gan pezee yzuun Jesus lo men
(Mr. 14:1-2; Lc. 22:1-2; Jn. 11:45-53)
1 Chene wluzh re Jesus yra neree, re Ne lo xpén Ne:
2 ―Laa de yra de nan de ne nee stxup gbiz rak falt ne ydxiin lni pask, lex ydekwent mén Men ne wdxiid wak Mén chen ykaa mén men lo kruz.
3 Cheguin ke wdop yra fxuz ne rnebééy lo yra fxuz yra men men ne rnebééy lo men-Israel ruxyuu Caifás, fxuz ne mazre nondee.
4 Nga wyan men diiz gan pezee kode men Jesus chen ynëëz men Ne yket men Ne.
5 Per re men:
―Ylaadet bo lo lni chen gakntozdet mengyëz lo be.
Wdxiib te wnaa perfum xtoo Jesus
(Mr. 14:3-9; Jn. 12:1-8)
6 Chene ka Jesus gyëz-Betania ruxyuu Simon men ne rnii ke men Leproso,
7 wbig te wnaa lo Jesus neey men te bot alabastro, yzaa we perfum ne kesentyent nyezh non. Or ne zob Ne lo mezh, wdxiib men perfum guin xtoo Ne.
8 Ne wii yra xpén Ne ne wlaa wnaa guin zenga, wlaa men, lex re men:
―¿Penak noze wxiin wnaa gwa negwa?
9 Mazre wendee ntoo meno no nyezhyaa ndoo we chen nruu med nkyiinen menprob.
10 Ne won Jesus zenga, re Ne lo men:
―¿Penak rnii de por wnaaree? Neree ne wlaa men noo, weno.
11 Porke menprob yzaandxee dxe tsuu men lad de, per le noo che xchedetre tsuu noo lad de.
12 Neree ne wlaa wnaaree ne wdxiib men perfum led noo, wlaa meno chen che list nak noo chene tsugyeer noo.
13 Nligue yna noo lo de yra de ne ydendxee gyëzlyu ledne gakzëëttee xdiznzoon Dëdyuzh, zakzëët ke ne wlaa wnaaree, chen zenga ynileedx mén men.
Wdekwent Judas Jesus
(Mr. 14:10-11; Lc. 22:3-6)
14 Men ne la Judas Iscariote ne nak ke xpén Jesus chibtxup wa lo fxuz ne rnebééy lo yra fxuz,
15 re men:
―¿Palal yniiz de noo ynizkwent Jesus lo de?
Lex wdee men galebchii med plat lo Judas.
16 Desde cheguin wzelo Judas wye Judas gan pezee ydekwent Judas Jesus lo men.
Ne lultim wuxsëë Jesus yra Ne xpén Ne
(Mr. 14:12-25; Lc. 22:7-23; Jn. 13:21-30; 1 Co. 11:23-26)
17 Primer dxe lni pask ne ru mén gyëtxtil ne nootsdet lebadur, wbig yra xpén Jesus wnabdiiz men lo Ne, re men:
―¿Pazh rlaan de yzhexkwaa noo ne guxsëë be lo lniree?
18 Wke Ne re Ne:
―Gutsa Jerusalén ruxyuu te mén ne rnebeey noo, lex gue de lo men: “Zere na Maxter: Le xor Maxter che zëdyob. Ruxyuu de rlaan Maxter tee Maxter pask yra Maxter xpén Maxter.”
19 Lex wlaa xpén Ne zegne wkyeen Ne, wzhexkwaa men ne guxsëë Ne lo pask yra Ne men.
20 Chene wnit lyu, wzob Jesus lo mezh yra Ne chibtxup xpén Ne;
21 or ne kayu Ne yra Ne men, re Ne lo men:
―Nligue yna noo lo de yra de, ne laake de te de nak ne ydekwent noo lo mén chen yzakzi men noo.
22 Ne won men zenga, kesentyent wunles lextoo men, wzelo men rnabdiiz men lo Ne te te men, re men:
―Dechey, ¿peguin noo ne?
23 Wke Ne re Ne:
―Men ne rgoob ne ru lengyaan ke ne rgoob noo ne ru noo nak ne ydekwent noo lo mén chen yzakzi men noo.
24 Men ne wdxiid wak Mén rap men degne sak men zegne re lo xgyiich Dëdyuzh; per ¡prob mén ne ydekwent men! Mazre wendee por laa mén guin ne nyaldet men.
25 Lex wke Judas ne ydekwent Jesus, re men:
―Maxter, ¿peguin noo ne?
Wke Ne re Ne:
―Zegwa we zeg na de.
26 Or ne kayu Ne yra Ne men, wgoob Ne gyëtxtil, wdee Ne dexkyizhtee lo Dëdyuzh, lex wla No wdee No lo yra xpén Ne, re Ne:
―Gunëëz gyëtxtilree, gugu we; laa we nak xkwerp noo.
27 Zhich guin wgoob Ne bas ne nuu bin, wdee Ne dexkyizhtee lo Dëdyuzh, lex wdee No lo men yra men, re Ne:
―Gugoo ne nuu lenbasree yra de,
28 porke laa we nak xren noo ne yzhe chene guet noo por ndal mén, chen gyal te nëzkweb ne gak ydxiin men lo Dëdyuzh.
29 No yna noo lo de yra de ne goodetre noo bin ub, axtegue chene ydxiin dxe ne goo noo binkweb yra noo de ledne rnebééy Xuz noo.
Wzëët Jesus ne ykedxnruu Bëd Ne
(Mr. 14:26-31; Lc. 22:31‑34; Jn. 13:36-38)
30 Wluzhse wolbaan Jesus te salmo yra Ne xpén Ne, za Ne gyey-Olivos yra Ne men.
31 Lex re Ne lo men:
―Sboleedx de noo yrandxee de negyëëlree, porke zenga zëëd lo xgyiich Dëdyuzh ledne re: “Yket noo men ne rapkwent mëkzhiil, le mëkzhiil noze yrëëts.”
32 Per chene che wban noo, sanergue noo lo de tsa noo Galilea.
33 Wke Bëd, re Bëd:
―Mase koleedx men de yra men, per noo nunk koleedxdet noo de.
34 Lex re Jesus lo Bëd:
―Nligue yna noo lo de ne negyëëlkeree, antes ne ykarëz ngyedgol, che wyon tir wkedxnruu de ne rnebeey de noo.
35 Lex re Bëd ste:
―Mase guet noo tese yrup noo de, per ykedxnruudet noo ne rnebeey noo de.
Zenga ke re yra xpén Ne.
Le Jesus wdxiin ledne la Getsemaní
(Mr. 14:32-42; Lc. 22:39-46)
36 Ne wdxiin Jesus ledne la Getsemaní yra Ne xpén Ne, re Ne lo men:
―Nee gusob myentras ne le noo tsa nodese ynab noo lo Dëdyuzh.
37 Wzano Ne Bëd no le yrup xpee Zebedew, lex wlen kesentyent wunles lextoo Ne, axtegue baanske wuu lextoo Ne.
38 Orguin re Ne lo men:
―Kesentyent nles nuu lextoo noo, zem zet noo lo gyelenlesree. Nee gugyan, gusobna.
39 Lex za Ne nodese, wandeslo Ne wtee lo Ne lyu wnab Ne lo Dëdyuzh, re Ne:
―Dëde, belne gak yselaa de noo lo gyelenlesree, guselaa noo; per gakdet zegne rlaan noo, sinke zegne rlaan de.
40 Zhich guin wberee ke Ne ledne wyan men gyon men; chene wdxiin Ne, le men ndxinguees. Orguin re Ne lo Bëd:
―¿Pe ni te or wakdet nzobna de?
41 Gusobna, gunab lo Dëdyuzh chen ysegyeedet Bzelo lextoo de. Rlaan de ylaa de ne wen, per led de rundet gan.
42 Ne wrup tir wa Jesus wnab Ne lo Dëdyuzh, re Ne:
―Dëde, belne gakdet tesu gyelenlesree sin ne sakdet noo we, gak zegne rlaan de.
43 Chene wberee Ne, le men ndxinguees ke ste, porke noze rdiib bzalo men tant zëëden men mkaal.
44 Lex wsan Ne men za Ne zanab Ne lo Dëdyuzh ne wyon tir, zenga ke re Ne.
45 Chene wberee Ne ledne ndxin men ste, re Ne lo men:
―¿Pe benak ndxinguees de? ¿Pe benak ndxinne de? Le or ne ynëëz mén Men ne wdxiid wak Mén che wdxiin, chen ydekwent mén men lo mendol.
46 Gutsaxee, guseyoo naa; le men ne ydekwent noo che zëdguex.
Le Jesus wzuun
(Mr. 14:43-50; Lc. 22:47‑53; Jn. 18:2-11)
47 Benak kanii Jesus chene wdxiin Judas; te ke men ne nak xpén Jesus chibtxup nak Judas; wdxinno Judas ndalyaa mén ne nzen spad no mén ne nzen yag. Laa fxuz ne rnebééy lo yra fxuz no le men ne rnebééy lo men-Israel wxaal yra mén guin.
48 Che re Judas lo yra mén guin gan pezee ydekwent Judas Ne lo men, re Judas:
―Men ne goo noo bzhid gyedkwes, laa men nga; ynëëzgue de men.
49 Zegne wdxiin Judas, wbiggue Judas lo Jesus, re Judas:
―¡Payuz, Maxter!
Lex woo Judas bzhid gyedkwes Ne.
50 Wke Ne re Ne lo Judas:
―Judas, gulaa ne zëëd de ylaa de.
Lex wbig yra mén guin wnëëzgue men Ne chen sano men Ne.
51 Orguin wboo xespad te ke men ne zuno Jesus nga, wkyits meno gyedyag xmos fxuz ne mazre nondee, wtxugnëz meno tebo.
52 Lex re Jesus lo men:
―Gugutsoow spad gwa xlugaro. Porke yrandxee men ne rdil kon spad, kon spad ke guet men.
53 ¿Pe nandet de ne zak ynab noo lo Xuz noo no orgueree yxaalgue me mazdee tsonlalno-chibtxupmil xangel me chidselaa noo?
54 Per belne ylaa noo we, ¿pezee gak kumplir ne re lo xgyiich Dëdyuzh cheguin, ledne re ne rap degne gak zeree?
55 Orguin re Jesus lo yra mén guin:
―¿Penak zëëd de zëdnëëz de noo kon spad, kon yag, zeg teleg ngbaan nak noo? No yzaandxee dxe wzu noo lenxeydoo Dëdyuzh wkaneluu noo de yra de, no wnëëzdet de noo.
56 Per kayak yra neree chen gak kumplir yra ne wkaa profet lo xgyiich Dëdyuzh.
Orguin wzhoon yra xpén Ne, wsan men Ne tendxee Ne.
Wano men Jesus lo xtis-Israel
(Mr. 14:53-65; Lc. 22:54-55, 63‑71; Jn. 18:12-14, 19-24)
57 Yra mén ne wa wanëëz Jesus, wano men Ne lo Caifás, fxuz ne mazre nondee. Nga ndxin yra maxter ley yra men men ne rnebééy lo men-Israel.
58 Le Bëd zanal Ne nat nat axtegue ne wdxiin Bëd ruxyuu fxuz ne mazre nondee. Lex wdee Bëd wzob Bëd yra Bëd men ne rapkwent xeydoo Dëdyuzh, chen kwii Bëd gan kox ylaa men Ne.
59 Le yra fxuz ne rnebééy lo yra fxuz no le yra xtis-Israel rye mén ne noze ykade chen tsël gan pezee ykagyii men Ne, chen gak ykyeen men guet Ne.
60 Per wzëldet gan pezee nkade men, mase ndal mén wbig wkagyii Ne. Zhich guin wbig stxup men ne noze rkagyii Ne,
61 re men:
―Re ménree: “Noo zun noo gan ylitla noo xeydoo Dëdyuzh no tsonegue gbiz ylep ke noo we.”
62 Orguin wzuli fxuz ne mazre nondee, re men lo Jesus:
―¿Pe bet ykedet de? ¿Pe rna rnii men zeree por laa de?
63 Per wkedet Jesus. Lex re fxuz ne mazre nondee:
―Por la Dëdyuzhmbán ykyeen noo de ne yzëët de belne laa de nak Crist XPee Dëdyuzh.
64 Lex re Jesus:
―Zegwa we zeg na de, yna noo lo de yra de, ne swii de zob Men ne wdxiid wak Mén koo Dëdyuzhnzoon ladbëë no swii de zëëd men lad bëw gyeybaa.
65 Orguin wtxëz xab fxuz ne mazre nondee, re men:
―Diznyaan rnii ménree por Dëdyuzh; pe ylar be testig. Laa de yra de che won de ne diznyaan rnii men.
66 ¿Pe na de, pezee gak men?
Wke yra mén guin, re men:
―Guet men rzëël.
67 Lex wtxonxen men txegwlo Jesus no wgupunyet men Ne; le stebëd men wgap txegwlo Ne,
68 re men lo Ne:
―Belne laa de nak Crist, ¿txu rniiz xkwent de gan?
Wkedxnruu Bëd ne rnebeey Bëd Jesus
(Mr. 14:66-72; Lc. 22:56‑62; Jn. 18:15-18, 25-27)
69 Or ne zob Bëd ruxyuu fxuz ne mazre nondee, wbig te wnaa ne rlaa dxiin nga lo Bëd, re men:
―¿No de nak xpén Jesus men-Galilea ye?
70 Per wkedxnruu Bëd nes lo yra mén guin, re Bëd:
―Axtegue nandet noo gan pagox gwa rnii de.
71 Zhich guin or ne zaruu Bëd ruporton, wii ste wnaa ne rlaa dxiin nga ne za Bëd; lex re men lo yra mén ne ndxin nga:
―No mgyeeyree nak xpén Jesus men-Nazaret.
72 Per wkedxnruu Bëd ste, wgon Bëd Dëdyuzh, re Bëd:
―¡Axtegue rnebeeydet noo mgyeey gwa!
73 Orsegue wako, wbig men ne ndxin nga lo Bëd, re men:
―Nlipee ne no de nak te xpén men, porke axtegue zegne rnii de nakbeey.
74 Lex wgon Bëd Dëdyuzh, re Bëd:
―Dëdyuzh yzakzi noo belne nlidet rnii noo. ¡Noo axtegue rnebeeydet noo mén gwa!
Orke guin wkarëz te ngyedgol.
75 Orguin wnileedx Bëd ne re Jesus lo Bëd: “Antes ne ykarëz ngyedgol, che wyon tir wkedxnruu de ne rnebeey de noo.” Lex wruu Bëd nga; baanske woon Bëd.