22
Xkwent dooy
1 Lex wuu Jesus zegnak ste kwent lo men, re Ne:
2 ―Ne rkyeen Dëdyuzh nak zegnak te rrey ne wlaa xdooy xpee.
3 Wxaal xmos rrey walëz yra men ne che re rrey lo ne tsa dooy guin, per nadet men nya men.
4 Wberee rrey wxaalgue stebëd xmos rrey, re rrey lo men: “Gutsa gue de lo men ne che re noo lo ne chiid xdooy xpee noo, le nesyaa che nuu, le noo che wkyeen wet xyuz noo, ma ne mazre rroodee, yrandxoo che list nak; gue de lo men chiid men naa.”
5 Per wukasdet yra mén guin xmos rrey. Te men za lo xelyu, le ste men za lo xdxiin,
6 le stebëd men wnëëz xmos rrey, wdee men xkwent men axtegue wket men men.
7 Chene won rrey ne zenga wlaa men, wlayaa rrey. Lex wxaal rrey xsoldad rrey waket men yra menmal guin no wzeey men gyëz ne nuu menmal guin.
8 Zhich guin re rrey lo xmos rrey: “Yrandxoo che list nak chen gak dooy, per yra ménro ne re noo lo ne chiid, rzëëldetre men chiid men.
9 Orrenaa gutsa yde runëzyu wa, yrandxee mén ne ytsëël de gue de lo men chiid men xdooy xpee noo.”
10 Lex wruu yra xmos rrey wa men runëz, wtop men yrandxee mén ne wtsëël men, menmal menwentee; zenga wyezaa mén lenxyuu rrey.
11 ’Per chene wdee rrey ledne ndxin yra mén guin, wii rrey te mgyeey ne nakdet lër ne ryal gak mén lo dooy.
12 Lex re rrey lo mgyeey guin: “Adxii, ¿penak wdee de nee sin lër ne rak mén lo dooy?” Per wkedet mgyeey guin.
13 Orguin re rrey lo yra xmos rrey: “Guliib nii men no guliib nya men, lex gutxoon men fwer lo nkeb ledne goon men axtegue guleey men.”
14 Porke ndalyaa mén wakrëz, per zhindxee men ybee.
Kwent ne rezh zeg impwest
(Mr. 12:13-17; Lc. 20:20-26)
15 Zhich guin sya yra men ne nak farisew, wyan men diiz gan pezee gue men lo Jesus chen gan pe gue Ne chen tsël gan pezee ykagyii men Ne.
16 Lex wxaal men tebëd xpén men no le tebëd xpén Herodes wa men re men lo Jesus:
―Maxter, nan noo yra noo ne nli ne rnii de no ne nli ne rneluu de ne ybán mén zegne rlaan Dëdyuzh. Zadet lextoo de gan txu nak mén porke por laa de tese nak mén.
17 Guna gan ¿pe wen gyizh noo zeg impwest lo rrey-Roma u wendeto?
18 Per kom wyenen Jesus ne ngyidet ne rlebleedx men, lex re Ne lo men:
―Gugannaa laa de wen, ¿penak rye de gan pezee gyab noo lo xetramp de?
19 Guluu te med ne rgyizh de zeg impwest gan.
Orguin wluu men te med lo Ne.
20 Lex wnabdiiz Ne lo men, re Ne:
―¿Txu lo wa no txu la wa ka lo we?
21 Wke men re men:
―Lo rrey-Roma we no le la rrey-Roma we.
Lex re Ne lo men:
―Guex gudee ne nak xen rrey lo rrey, le ne nak xen Dëdyuzh gudee lo Dëdyuzh.
22 Ne won men zenga, wzee wzak men; wsan men Ne, syague men.
Kwent ne yban mengut
(Mr. 12:18-27; Lc. 20:27-40)
23 Dxe ke guin, wa tebëd men ne nak sadusew lo Jesus. Kom rlaleedxdet men ne sban mengut, por neguin re men lo Ne:
24 ―Maxter, re Moises ne belne guet te mén, per wapdet xewnaa men mëëd, bech men rap degne ytsëlnyano wnaa guin, chen gap men mëëd ne gak zegnak zhiin mén guin ne wet.
25 Chekwlo wuu guedx mén lad noo yra noo, tese bech men yra men; lex wtsëlnya men ne nak mengoldee lo men yra men, per wet men. Kom wuudet zhiin men, lex wtsëlnya men ne wrup yrup men xewnaa mén guin ne wet.
26 Zenga ke wzak men ne wrup, wet ke men; zhich guin wtsëlnya men ne wyon yrup men wnaa guin; zenga wlaa men yra men axtegue ne wzaa men guedx.
27 Chene che wet men yra men, no ke wnaa guin wet.
28 Orrenaa, chene yban mengut, delo yra guedx mén guin, ¿txu xewnaapee gak wnaa guin ne yrandxee men wtsëlnyano men?
29 Wke Jesus, re Ne:
―Laa de yra de ngyidet ne rnii de, porke rdeedet de kwent ne zëëd lo xgyiich Dëdyuzh, ni rdeedet de kwent pezee nak xpoder Ne.
30 Chene yban mengut, che ytsëlnyadetre men, ni mgyeey ni wnaa, sinke zegnak angel ne nuu gyeybaa gak men.
31 Belne rlaleedxdet de ne sban mengut, ¿pe gardet gool de lo xgyiich Dëdyuzh ledne re Ne:
32 “Noo nak XDëdyuzh Abraham, XDëdyuzh Isaac, XDëdyuzh Jacob”? Nakdet Dëdyuzh XDëdyuzh mengut, sinke le Dëdyuzh nak XDëdyuzh menmbán.
33 Ne won yra men guin neree, kesentyent wzee wzak men por yra ne rneluu Jesus.
Ne mazre nondee ne zëëd lo xley Dëdyuzh
(Mr. 12:28-34)
34 Chene won yra men ne nak farisew ne wsoow Jesus ruu yra men ne nak sadusew, wdop men yra men.
35 Lex wbig te ke farisew ne nak maxter ley wnabdiiz men lo Ne gan pe gue Ne, re men:
36 ―Maxter, ¿gonezhe nak ne mazre nondee ne zëëd lo xley Dëdyuzh?
37 Wke Ne re Ne lo men:
―“Gugyaan XDëdyuzh de ydebgyiky ydeblextootee de, ydebxanem de.”
38 Laa neree nak ne primer no ne mazre nondee ne zëëd lo xley Dëdyuzh.
39 Le ne wrup nak ko zegnak ne primer, re we: “Gugyaan semén de zegne ryaan ke de de.”
40 Mén ne rlaa yrup neree, laa ne rlaa men yrandxee ne zëëd lo xley Dëdyuzh nga no le ne wkaa yra profet.
Gan txu xpee nak Crist
(Mr. 12:35-37; Lc. 20:41-44)
41 Or ne benak ndxin yra men ne nak farisew nga, wnabdiiz Jesus lo men,
42 re Ne:
―¿Pagox yna de por Crist? ¿Txu xpee nak zhaa?
Wke men re men:
―Xpee David.
43 Lex re Jesus lo men:
―¿Penak chene waknonen Espíritu Sant David cheguin, wnesela David Crist XDëdyuzh David? Porke re David:
44 Dëdyuzh re lo XDëdyuzh noo:
“Gusob koo noo ladbëë
axtegue ne ylaa noo ne gyichnii de yrandxee mén ne rlaa lo de.”
45 Belne David ke rnesela Crist XDëdyuzh David, ¿pezee gak Crist xpee David?
46 Ni te men wundet gan nke ni te diiz lo Jesus; kwlotee dxe guin ni ste men wyezhdetre nnabdiiz lo Ne.