13
Xkwent mén ne rguu bni
(Mr. 4:1-9; Lc. 8:4-8)
1 Dxe ke guin wruu Jesus ruyuu, wa Ne wzob Ne runis.
2 Kom kesentyent ndal mén wdop lo Ne, lex wdee Ne lenbark wzob Ne, le yra mén wyan runis.
3 Lex wzelo Ne wzëët Ne ndal diiz lo men zegnak te kwent, re Ne:
―Te dxe wruu te mén ne rguu bni, zalabni men zhobxtil.
4 Chene kalaal meno, nuu we wyab nëz; lex wyab mgyin wu ma we.
5 Nuuzego wyab lad gye ledne yëtet ndal yu; wlengoo por ne yëtet ndal yu lad gye guin.
6 Per chene wlen ngbiz, wzeey ngbizo; kom yëtet ndal lu we, wbidxo.
7 Nuuzego wyab lad lbagyëts; wroo lbagyëts, wket lbagyëtso.
8 Per nuuzego wyab ledne wen lyu, kesentyent wako; nuu we wak tebgwyuu zhob, nuuzego wak tsonlal zhob, nuuzego wak galebchii zhob.
9 Men ne rkagyedyag diiz, gon men neree ne rzëët noo.
Ne gan penak rzëët Jesus xdiiz Dëdyuzh zegnak te kwent
(Mr. 4:10-12; Lc. 8:9-10)
10 Lex wbig yra xpén Jesus lo Ne, re men:
―¿Penak rzëët de xdiiz Dëdyuzh lo mén zegnak te kwent?
11 Wke Ne re Ne:
―Laa de yra de, Dëdyuzh wniiz si ne gaknan de logne ngueedx ne rkyeen Ne, per le yra ménree wdeedet Ne si ne gaknan meno.
12 Porke men ne che rdee kwent pezee rnebééy Dëdyuzh, laa Ne ylaa ne mazre ydee men kwento no kesentyent ydee men kwento. Per le men ne rdeedet kwento, axtegue ne chendxee rdee men kwent, ydeedetre men kwento.
13 Por neguin rzëët noo we lo men zegnak te kwent, porke rwii men, per nak men zegnak mén ne rwiidet; ron men diiz, per nak men zegnak mén ne bet rondet, ni rdeedet men kwento.
14 Neree ne kazak men rak kumplir diiz ne re profet-Isaías chene re men:
Mase mazre ykagyedyag men diiz, per ydeedet men kwento;
mase mazre kwii men, per bet gyenden men.
15 Porke yra ménree wakndíp lextoo men;
rtsëë gyedyag men chen gondet men diiz,
no rtsëë bzalo men,
chen kwiidet men,
ni ykagyedyagdet men diiz,
ni ydeedet men kwento,
ni ysaandet men xgyelmal men chen gakdet yselaa noo men lo xdol men.
16 ’Per le laa de yra de nzoon de, porke rwii de neree no ron de neree.
17 Nligue yna noo lo de ne ndal profet no ndal mén ne wbán xnëz wlaan nwii neree ne rwii de yra de, per wiidet meno, no wlaan men nyon men neree ne ron de, per wondet meno.
Le Jesus rzëët ne rna xkwent mén ne rguu bni
(Mr. 4:13-20; Lc. 8:11-15)
18 ’Gugon ne rna xkwent mén ne rguu bni.
19 Men ne ron xdiiz Dëdyuzh no rdeedet men kwento, mén guin nak zegnak zhobbni ne wyab nëz; rdxiin Bzelo rboo diiz guin ne che nuu lextoo men.
20 Le zhobbni ne wyab lad gye nak zegnak mén ne ron xdiiz Dëdyuzh; rzhiilen men ron meno,
21 per kom nak men zegnak ne yëtet ndal lu, rundet men wantar; chene le men pe rzak o chene rwinyaan mén men por ne rlaleedx men xdiiz Dëdyuzh, rsalzaangue men ne rlaleedx meno.
22 Le zhobbni ne wyab lad lbagyëts nak zegnak mén ne ron xdiiz Dëdyuzh, per por ne mazre za yra ne nuu gyëzlyuree lextoo men no por ne rbode ne non ne nuu gyëzlyuree men, neguin rlaa ne le men rsalzaan xdiiz Dëdyuzh, rdeedeto si ylaa men ne wen.
23 Per le zhobbni ne wyab ledne wen lyu, nak zegnak mén ne ron xdiiz Dëdyuzh, rdee men kwento, lex rlaa men ne wen. Nuu men nak zegnak te zhobbni ne wak tebgwyuu zhob, nuuzeg men nak zegnak te zhobbni ne wak tsonlal zhob, nuuzeg men nak zegnak te zhobbni ne wak galebchii zhob.
Xkwent gyizh ne bat rkyiindet ne nuu lad zhobxtil
24 Wzëët Jesus zegnak ste kwent lo men, re Ne:
―Ne rkyeen Dëdyuzh nak zegnak te mgyeey ne wguu teblose zhobxtil lo xelyu.
25 Per chene nexguees yrandxee mén, wa te mén ne rwinyaan mgyeey guin walu men medx ne bat rkyiindet lad xzhobxtil mgyeey guin, lex sya men.
26 Le chene le zhobxtil wroo ne le we wlen do, wlalo no gyizh ne bat rkyiindet lado.
27 Lex wa yra mén ne rlaa dxiin lo mgyeey guin ne nako xen, re men: “Dechey, ¿pe let teblosedet zhobxtil wguu de lo xelyu de? ¿Pa wzaa gyizh ne bat rkyiindet ne nuu lado?”
28 Lex re mgyeey guin ne nako xen: “Nuu mén ne rwinyaan noo wlaa negwa.” Orguin wnabdiiz yra mén guin ne rlaa dxiin lo mgyeey guin, re men: “¿Pe rlaan de tsalaaz noo we?”
29 Per wke mgyeey guin ne nako xen, re men: “Tsadet de porke tegue ylaaz de no zhobxtil or ne ylaaz do.
30 Mazre wendee gudee si yroo we yrup rlo we axtegue ne gak zhobxtil; lex yxaal noo mén ne ytopo. Per primer ytop men gyizh ne bat rkyiindet, lex yliib meno por mzhuun chen tseekyo; luzh nga, ytop men zhobxtil, gutsoow meno ledne tsutsoowo.”
Xkwent medx lyagwlizh
(Mr. 4:30-32; Lc. 13:18-19)
31 Wzëët Jesus zegnak ste kwent lo men, re Ne:
―Ne rkyeen Dëdyuzh nak zegnak te medx lyagwlizh ne rlabni mén lo xelyu mén.
32 Medx guin nak ne mazre windee ke lo yra medx, per chene le we rlen rroo we, laa we nak ne mazre raknzhoodee ke lo yrandxee gyizh; rako zegnak tebzhaan yag, axtegue mgyin ra rzhexkwaa xeftxëës zhuuko.
Xkwent lebadur
(Lc. 13:20-21)
33 Wzëët Jesus zegnak ste kwent lo men, re Ne:
―Ne rkyeen Dëdyuzh nak zegnak lebadur ne rgoots te wnaa tson medid rin chen ynesegyi we yrandxee ngob.
Ne gan penak wzëët Jesus xdiiz Dëdyuzh zegnak te kwent
(Mr. 4:33-34)
34 Yra neree ne wzëët Jesus lo mén, teblose zegnak kwent wzëët No; bet nzëëdet Ne lo men belne nzëëdet No zegnak kwent.
35 Wak yra neree chen gak kumplir diiz ne re profet chene re men:
Teblose diiz ne nak zegnak te kwent ynii noo
yzëët noo logne rdeedet yra mén kwent desde ne waa gyëzlyu.
Wzëët Jesus gan pe rna xkwent gyizh ne bat rkyiindet
36 Wluzhse wguli Jesus mén nëz, wdee Ne lenyuu; lex wbig yra xpén Ne lo Ne, re men:
―Guzëët gan pe rna xkwent gyizh ne bat rkyiindet ne nuu lad zhobxtil.
37 Wke Ne re Ne lo men:
―Mén ne wguu teblose zhobxtil nak Men ne wdxiid wak Mén,
38 le lyu nak gyëzlyu, le teblose zhobxtil nak xpén Dëdyuzh, le gyizh ne bat rkyiindet nak xpén Bzelo,
39 le mén ne wguu gyizh ne bat rkyiindet nak Bzelo, le ne ydop zhobxtil rna chene nitlo gyëzlyu, le mén ne ytopo nak yra angel.
40 Zegne rdop gyizh ne bat rkyiindet chen tseekyo, zenga ke gak chene nitlo gyëzlyu.
41 Men ne wdxiid wak Mén yxaal men xangel men chen kowaa xangel men yra mén ne rlaa ne ryab ste mén lo dol no le yra mén ne rlaa dol,
42 chen ysee angel yra men guin lo gyirenii ledne goon men axtegue guleey men.
43 Le yra mén ne rlaa ne wen, ykabtsa men ledne rnebééy Dëdyuzh zegne rkabtsa ngbiz. Men ne rkagyedyag diiz, gon men neree ne rzëët noo.
Xkwent ne non ne nulaan
44 ’Ne rkyeen Dëdyuzh nak zegnak te ne kesentyent non ne nulaan lo tebla lyu. Lex rzëlen te mgyeeyo, zhich guin rgulaan meno nga ke; kesentyent rzhiilen men, ra men ratoo men yrandxee ne rap men, lex ra men raka men lyu guin.
Xkwent perla ne kesentyent nyezh non
45 ’No nak ke ne rkyeen Dëdyuzh zegnak te mén ne rkaa rkaye perla ne kesentyent nyezh non, chen yka meno.
46 Chene rzël te perla ne kesentyent nyezh non lo men, ra men ratoo men yrandxee ne rap men, lex ra men raka men perla guin.
Xkwent gyix
47 ’No nak ke ne rkyeen Dëdyuzh zegnak te gyix ne rtxoon mén lo nisdoo ne raag yralondxee mël leen.
48 Chene ryezaase mël lengyix, rboo mén ne rkaa gozmël gyix lo nisdoo rdxinneey meno runis. Lex rzob men rbe men mël; mëlwen rguu men lentsegwed, le mëlngyidet rsee men.
49 Zenga gak chene ydxiin dxe ne nitlo gyëzlyu. Schiid ndal angel chen kwe ne yra menmal lad menwen.
50 Lex ysee ne menmal lo gyirenii ledne goon men axtegue guleey men.
Ne kweb no ne yuux
51 Lex wnabdiiz Jesus lo men yra men, re Ne:
―¿Pe rdee de kwent yra neree?
Wke men re men:
―Rdee noo kwento, Dechey.
52 Lex re Ne lo men:
―Yra maxter ley ne rseed ne rkyeen Dëdyuzh, nak men zegnak te ngwzan ne rbe ne kweb no le ne yuux lad yra ne non ne ngutsoow men.
Le Jesus wdxiin Nazaret
(Mr. 6:1-6; Lc. 4:16-30)
53 Chene wluzh wzëët Jesus yra neree zegnak te kwent, wruu Ne nga.
54 Ne wdxiin Ne laz Ne, wzelo Ne wneluu Ne mén lenydoo ne zob nga. Kesentyent wzee wzak yra mén, re men:
―¿Pazh wseed mén gwa yra negwa ne nan men? ¿Pezee run men gan rlaa men gyelmilaguer?
55 ¿Pe let laadet xpee karpinter wa? ¿Pe let xnaadet men nga nak Mli, le bech men nak Jacob, nak Xeb, nak Simon, no le Judas?
56 ¿Pe let needet nuu yra bzaan men lad be? ¿Pazh wseed men yra negwa?
57 Por neguin wukasdet men Jesus, per re Ne lo men:
―Yrandxee lugar rzaknon mén te profet, per le laz men rzaknondet mén men, ni men ne nak xfamilye men rzaknondet men men.
58 Wlaadet Ne ndal gyelmilaguer nga por ne wlaleedxdet mén Ne.