6
1 Ri'itu ankatu benne ribentu len Tata Do Yebáha lo sina gebie. De nuha nna rulisatu le abittu udelha lattile nu tse redá le Tata Do Yebáha rutebie gele.
2 Kumu lo ka yetsi geeha rinnebie ree:
Neti gwa bedoba nagaa gelu la sá tti chi ga'anati udo nagaa gelu,
lhe gwa beteba náya lenlu, la sá atti chi ga'anati odiláya ka benne.
Gwaluyúruga, nnanna chi bisia sáha. Nnanna nuha chi bisia sá atti chi ga'anani Tata Do Yebáha odilábie ka benne.
Pabluha rigixxi'abie ge nu ratebie de rekie rigixxi'e ka tisa ge Cristuha
3 Ri'itu labí ruintu ttu bixa nu utsetsinna ka benne. Labí rutsetsintu ke ki abittu itua bala'ana ge sina ruintu ge Tata Do Yebáha.
4 Nu ruinlatu, bixaba ruintu latsiruba ruintu na. Ruinbatu atti galába ttu benne rixú lo sina ge Tata Do Yebáha. Gwa rutto ruchíabatu
ttixka ratetu ttu bixa,
lhe tti riyasintu ttu bixa lhe,
anágaba tti ruyútu ttu bixa elha disa,
5 lhe rutto ruchíagabatu tti raya ka benne ri'itu,
lhe tti rattatu lisiyya lhe,
anágaba tti rebi'i nookana ri'itu,
lhe tti ratú rebisiba letu de ribentu sina,
lhe anágaba tti rebeatu bisiela,
lhe tti rattitu ubina abí tee gotu lhe.
6 Ruinbatu nu anka taga'a tse atti galába runi ttu benne rixú lo sina ge Tata Do Yebáha.
Rule'e loobatu nu yutu gebie.
Anágaba ankagabatu benne re besi letu,
lhe re tse letu,
lhe rule'etu deki gwalí yu'u Espíritu ge Tata Do Yebáha latitu.
Anágaba nna ankagabatu ka nu gwalígintu rakintu ge ka benne
7 lhe rinnegabatu nu ankaba gwalí,
lhe rixúgabintu nu tsitsi ra le Tata Do Yebáha.
Ruinbatu attiba runi ttu soldadu diana ritilhana denna iyába nu ixuinna.
Aníha‑gaba ri'itu tti rinnetu lhe tti rekabitu ge ka benne, rigixxi'abatu ge nu dika ose'e tsena ke arlo Tata Do Yebáha.
8 Gwadú gwa ria lekani ri'itu, gwadú nna rigu'uba ni'akani ri'itu.
Gwadú nna rinnekana rákana deki tseba ruintu, gwadú nna rigualakana bala'ana getu.
Ri'itu rinnebatu nu ankaba gwalí, ttaka lakana rálakana deki nu gwen lasiba ankatu.
9 Gwadú meskiba gwa ankabiakinna ri'itu nna rálakana deki labí ankabiakinna ri'itu.
Gwadú nna rugwekana ri'itu ttu bixa elha disa, ttaka labí ridaakana uttikana ri'itu.
Ttiba ttu nu yatti rakakinna chi ankatu, ttaka sa reki benbatu.
10 Rákana deki ri'itu ankatu benne du si'i letu, ttaka satíaba du itta letu.
Rákana deki ankatu benne dii, ttaka ri'itu ruinlatu kini ixeba ka benne gatta elha tse geke arlo Tata Do Yebáha.
Rágabakana deki ri'itu labí bi tee getu, ttaka arlo Tata Do Yebáha iyába gwa teeba getu.
11 Lhixxa rába rigixxi'entu le xa benne Corinto, labí bixa rudhea letu.
12 Len lebi'i labí rudhea letu ttu bixa; lebi'ila nuná rudhea lele.
13 Rulisaa le attiba ttu xi'inia. Gwaluni attiba ruintu, abittu ku'u lele ttu bixa, gwalinneba na len ri'itu.
Ri'i ankari'i yotu ge Tata Do Yebáha
14 Abittu iyietile uinle tti runi ka nu abittu ria lekani Cristuha.
Kumu lebi'i gwa yu xeabale, nu anka tseha labí raxxína nuha len nu anka satsaha
lhe anágaba chulhaha labí raxxína nuha len xianiha.
15 Anágaba Cristuha labí raxxína benneha len nu xxegwiha,
lhe ttu benne ganna ria lebie Cristuha, labígaba raxxína benneha len nu abittu ria leni Cristuha,
16 lhe anágaba labí raxxína yotu ge Tata Do Yebáha len ka nu labí gwalí ankakana diosi.
Kumu ri'i nuní chi do Tata Do Yebaa benne anka baniha lhe'e lastori'i, delába ankari'i attiba yotu gebie attiba chi ree lo ka yetsi geeha:
Neti dhoa lhe tsekia lagwi ge ka benne.
Akaa Diosi geke, lake nna akake benne kia.
17 Laxkala de nuha nna ra Tata Xisiha:
Gwaliria lagwi ge ka nu abittu ria lekinna, gwalukwitta kwe'e ka nuná,
lhe abittu kanle nu anka tsiga lhe.
Neti nna gulabibaa le.
18 Neti akaa xxudile nna,
lebi'i nna akale xi'in biyúa lhe xi'iniunnáya lhe.
Aníha ra Tata Xisiha benne ra tsitsi xxatta leeha.