5
Yisha' daa ndos' gall sey
1 Na' beena' llia chṉabia' nox̱ee lo nee de shḻina' to yish dii ndobə, na' c̱hop ḻaaten' nyoj. Na' gana' biyoll bidoban ndosa'n gall sey.
2 Na' ble'id' to anjl, beṉ' nap yeḻ' wak xen, na' wṉie' zillj inlleb, chṉabe':
―¿Notg zakii wxoxje' seyka' na' wselle' yisha'?
3 Na' kono bllel yabana' ni lo yell-liona', ni xan yell-liona', beṉ' gak wzeshe'n na' wwie' bin da'n.
4 Na' ḻe wchellchga' daa kono bllel beṉ' zakii wzeshe' yisha' na' wwie' bin da'n.
5 Na'ch to beena' len beṉ'ka' tapichoa wne' nad':
―Bich kwello', ḻa' beena' nsi'gake' Bell c̱he Judá daa mbejlawe' lo dia c̱he dii Judána', beena' nak xiiṉ dia c̱he dii Davina', ba bene' gan dii mala' na' wak wxoxje' seyka' gall na' wzeshe' yisha'.
6 Na'ch ble'idee zie' gchoḻ gana' llia beena' chṉabia' na' gana' nec̱hj beṉ'ka' tap na' beṉ'ka' tapichoa. Na' ble'idee ka to xil'do', ba betgake'. Na' llia gall ḻozb na' zi gall jalaob, diikan' nak espírituka' gall daa nak c̱he Chioza' daa nseḻee doxen yell-lioni.
7 Na'ch beena' ble'id' ka xil'do' wbiguee lao beena' llia chṉabia' na' wdoyoe' yisha' daa ndobə daa nox̱ee lo nee de shḻina'.
8 Na' kon ka wdoyoe' yisha' daa ndobə, beṉ'ka' tap na' beṉ'ka' tapichoa bc̱hek' xibe'ka' lao beena' ble'id' nak ka xil'do'. To togake' nox̱'gake' twejə arpa, na' ḻekzka' nox̱'gake' barser de or yoogakan yala' daa chzeygake', na' llen yala' zaklebin xtill' beṉ'ka' nak lall' na' Chioza', dill'ka' choe'lengake'ne' kat' choe'ḻwillgake'ne'.
9 Na' beḻgake' to dii kob dii chgoon ḻe' balaaṉ, na' ki nan:
Lin' chidoḻoo gox̱oo yishi ndobə na' wxoxjo' seyka', daa betgake' li',
na' daa blalj xc̱heno'na' biya'o bizi'o
beṉ' za' yog' dia, yog' yell na' yog' nación,
na' beṉ' chṉe wde wdeli dill',
kwenc̱he nakgake' lo na' Chioza'.
10 Na' ba nono' lall' na'gake' iṉabia'gake' lo yell-liona'
na' gakgake' bx̱oz c̱he Chios c̱hechona'.
11 Na'ch ble'id' anjl zan, na' benid' shi'eka'. Nec̱hjgake' gana' llia beena' chṉabia' len beṉ'ka' tap na' beṉ'ka' tapichoa. Na' daa nakgake' beṉ' zan inlleb ni bi wbabid'gake'.
12 Na' wnagake' zillj nlleb:
Beena' nak ka xil'do', beena' betgake',
chidoḻee we'nto' xtillee nape' yeḻ' wṉabia' xen,
na' naki c̱he' yog'ḻoḻ yeḻ' wni'a dii de,
nape' yeḻ' sin' xen na' yeḻ' wak choo yeḻ' wak xen,
nake' beṉ' zakii nlleb,
na' chidoḻee we'la'onto'ne' na' koonto'ne' balaaṉ.
13 Na' benid' wṉe yog'ḻoḻ dii de yeḻ' mban c̱heyin na' yog'ḻoḻ diika' bx̱e bsil Chioza' yabana' na' yell-lioni, na' xan yell-lioni, na' ḻoo nisdo'na', nagakan:
Beena' llia chṉabia' len beena' nak ka xil'do',
chidoḻ'gake' we'la'ocho ḻegake' na' koocho ḻegake' balaaṉ zejḻi kaṉi,
na' we'cho xtill'gake' nakgake' beṉ' zakii nlleb, na' napgake' yeḻ' wak choo yeḻ' wak xen.
14 Na' beṉ'ka' tap nec̱hj ḻe', nagake':
―¡Kan' nakan!
Na' beṉ'ka' tapichoa bc̱hek' xibe'ka' be'la'ogake' ḻegake'.