1 Làniana inte' Juan hua'á' ru'a indatù'a nna gudú'a' nía. De repente taá bilá' te' riria ttu cosa nu bàni le' indatù'a nu riquíla'ní latsi' ri'u. Tsìa gàtsi iqquį nna tsìi tsitta iqquį. Lo ttu ttu tsitta iqquį nna tsìa ttu corona. Ttu ttu iqquia nna ga'na escrito titsa' mal contra Tata Dios. 2 Nu bàni nu tuxu gani nu bilá' ti'á nna ną́ tì'ba ná tigre, pero ca nì'į nna ná cą tì'ba ná nì'a oso. Rú'į nna ną́ tì'ba ná rú'a león. Dragón ènni'į ènni'ą' betią la'huacca quì'į, ą'hua betią la' rigú'ubia' quì'į nna poder quì'į nna. 3 Ttu iqquia niá nna bilá'ní qui'ni ną́ huee' tì'batsi ttu huee' nu dacca' gáttiníą, pero beyacca bą́. Acca ituba yétsiloyu nna yala uccuaỹí latsi'į nna guduló tanó cą na. 4 Ca ènni'a nna beni tabá cą adorar Dragón porqui'ni ną́ enne' bete poder qui' nu bàni nu tuxu gánía nna, ą'hua beni cą adorar nu banía nna rudàliani cą na nna ra cą: Nuni ná enne' ỹeni tì'a nu túxúa cá. Nuni tháa til·lą lani ą cá.

5 Nu bàni nu tuxu gánía nna té permiso quì'į para ebàta'ą nna innią titsa' mal contra Señor. Ą'hua té permiso quì'į cu'ubi'ą le' yétsiloyu por tsunna ida nàl·la'. 6 Ą' benią nna yala titsa' mal gùnnią contra Tata Dios, ą'hua uccua latsi'į qui'ni gatta' líį enne' ỹeni ti'ba Tata Dios. Ą'hua gùnnią titsa' mal contra iyaba ca enne' tse'e ỹiabara', ą'hua contra canu retùppa cabi le' templo qui'e. 7 Ą'hua té permiso quì'į gunią guerra contra iyaba canu ná cabi qui' Tata Dios para gunią cabi vencer. Lą nna guỹi'ą poder para cu'ubia'nią iyaba ca raza nna, iyaba ca yétsi nna, iyaba ca titsa' le' yétsiloyu nna, ttu ttu tsa ca nación nna. 8 Iyaba ca enne' tse'e le' yétsiloyu nna guni cą nu bàni nu túxúa adorar nna, quiere decir iyaba ca enne' canu bittu ga'na escrito lá quį lo libro nu tsìa nombre qui' iyaba canu té la'labàni nu labí ttíą qui' cabi nna ga'ną escrito dèsdeba ántesca cue' yétsiloyu. Ca enne' nna bètti cą Jesucristo enne' ná Cordero enne' ná qui'e líbrua.

9 Lebi'į canu riyénini ca tìtsi'į nna líhue' cuidado qui'ni iyeni tsè'ni le nu nia' annana: 10 Iyaba le canu ná para ccá le preso, seguro ba gudàxu' cą le. Iyaba le canu ná para gatti le por nuỹa enne', seguro ni gúttíą le. Acca iyaba le canu ná qui' Tata Dios, caduel·la' gappa le adí confianza lani lèe nna bittu guttse'e latsi' le tsal·lue' néda, sino guchia le iyaba ca prueba lani la'ỹeni.

11 Làniana bila' te' riria attu nu bàni nu tuxu le' lóyúa. Tsìa chùppa tsitta iqquį tì'ba ná chùppa tsitta tsìa iqquia ttu cuyù' to', pero ca titsa' nu rinnią nna ną́ titsa' nu dacca' gátsini ca enne', tì'ba ca titsa' nu gunne Dragón. 12 Lą nna duą ru'a lo nu bàni nu tuxu nu cca primeru nu uccua huee', tì'batsi ną́ para gáttiníą pero beyacca bą́. Lą nna gulù'ubi'ą lani iỹeni poder tì'ba nu tuxu primérua. Benią duel·la' qui'ni iyaba ca enne' tse'e le' yétsiloyu guni cą nu tuxu primérua adorar. 13 Nu bàni nu tuxu nu cca chuppáa nna yala cosa milagrosa benią, hàsta benią qui'ni bìnnia yí' dèsdeba ỹiaba hàsta yétsiloyu miéntraste iỹé ca enne' chi rinna' cą. 14 Por medio de ca señal luetsi nuą' nna ridi' yé'nią ca enne' tse'e iyaba lugar. Té permiso quì'į gunią ca señal nu caỹí latsi' ri'u, pero beni bą́ cą ru'a lo nu tuxu nu cca primérua. Benią mandado qui'ni iyaba ca enne' nna guni cą formar ttu imagen xeni nu rilá' tabání tì'ba nu tuxu primérua nu beyacca baníą después de uccuą huee' lani espada, para guni cą na adorar. 15 Lą nna gùỹi'ą permiso quì'į gunią qui'ni imagen qui' nuá nna té movimiento quì'į nna gunne huą́ tì'a ttu enne' nna benią mandado nna rą: Liudu ỹibi le ru'a lua', porqui'ni canchu labí nna, gatti ba le. 16 Lą nna benią duel·la' nna bethítsinią iyaba ca enne' qui'ni ccá ttu marca lani tinta lo ná' bàni quį o lo ỹigá quį, sea canu labí dacca' cą según ca enne' o màsqui'ba yala re' cuenta ná cą l·le, ą'hua canu rico l·le, ą'hua canu labí biỹa té qui' quį l·le, ą'hua canu runi tsina ru'a lo nuỹa l·le, ą'hua canu ná cą xana' tsina. 17 Lanú enne' té permiso tsíą huì'i biỹa cosa le' tienda canchu labí rèni marca lo ná' banį o lo ỹiguį. Nìhua lanú enne' té permiso quì'į gúttí' cą biỹa quì'į canchu labí rèni marca, quiere decir nombre qui' nu túxúa o ca número nu ccą representar. 18 Para ttélíni ri'u nui nna yala la' riyeni tse' riquína'ni ri'u. Canchu té la' ritelíni qui' lu' nna, ethàtsilà'na lu' número qui' nu túxúa. Pues ccą representar nombre qui' ttu nubeyu'. Número quì'į nna ną́ 666.