80
Amisye anajo indamu Po anakotare raveramu ngkovo wansai jakato
1 Masmur Asap po ratoe. Nto irati akari po vatano matayao ukiny maugavo ransyerane rai ai. Ransyerane so ama kine mo ransyerano kaijinta ramai tavon, namirati ama akari mare: ‘‘Aepare ama ug, mbe urairive rai.’’
2 Inya Amisy, Winyirati Nyo vatano Israel makum maisyare vatano po maero domba makume wemaisy,
syare namarikoame rasakinav de.
Winyirati Nyo Yusup apa susye maugavo mavabe maisyare vatano po maero domba maugave amaisy.
Tugae, Winyirati nde ntuna no ana yatotov kerub aya yasyine rai indamu mbe akarive,
syare Nyo Nya kovo ntiti raroron,
3 ndaroron irati susyo Epraim, Manasye muno Benyamin mai.
Wimbeseo ra Nyo Nya vambunine rarorono reansai,
muno nde ramu Nyo reansapaya irati marova rai.
4 Amisy, reamare Nyo anakotare raveramu ngkovo reansai maisyare arono wusyine wemaisy akato,
Reamare Nya kove mbaro reansai, wirati indamu reampaya irati kakai rai.
5 AMISY, Winyirati Amisy Akari Titi naito munijo ntiti,
Nya kawasae reansambayambe Winai to,
weramu wimpari mangkebe reansai tutir bayave kobea e?
6 Nyo siuri manakoe raugaje reansai ti reamoyov tutir,
weti reansami ngkaru nsoyan maisyare omirati reama anaisye mije,
muno maisyare omirati reama mana ramaname wemaisy.
7 Winseambe reansai ti susyo una reansakijani so taune warare vambinibe mai reama kopa rai,
reama marova wo reansaura tantunawi muno wugoeno reansai.
8 AMISY, Winyirati Akari Titi naito munijo ntiti,
reamare Nyo anakotare raveramu ngkovo reansai maisyare arono wusyine wemaisy akato.
Reamare Nya kove mbaro reansai, wirati indamu reampaya irati kakai rai.
9 Nya kawasae Israel reamamo maisyare angguri moto Nyo rapatin ti ndaugav no Mesir.
Nyo susye kotar una no Kanaan mawatan ti uta muno Nyo reansaveti reantantuna awa muni rai akato,
maisyare Nyo angguri mote umaso rantet no awa kopa rai wemaisy.
10 Maisyare kopa ndatayao ti angguri ranteto rai wemaisy,
Winyo munije ratayao Israel reansamarom.
Muno maisyare angguri ndantete umaso ama wantainye musyo rai wemaisy,
Winyo reansaveti reambambunin, weti reamo munije umaso ratatuv tenambe.
11 Reantantuna munijo Kanaan rai tenambe, maisyare angguri ntubai ti nsani manakoe rave wemaisy,
ti ngkamajugambe irati unate rai janyi muno ama wate mo inyo aras makokoe ratatuv.
12 Maisyare angguri wate nsonao usyo no mayane vone wemaisy,
Israel utantuna munije we raita ti nto musyo no mayane vone.
Maisyare wai nsani ti nto nggwaravainye wemaisy,
Israel utantuna munije we raita ti nto nanto no mana Eprat.
13 Sya Amisy, mbe animaibe wino reansaora akato jewen?
Israel reama marova usisa ti wo reansakupi,
muno susyo mamun una reansakijani ude wo reama ananuge raugaveto reansaora.
14 Maisyare uge siso po nawaisye rakumbire wemaisy,
muno gusye po nawaisye raisy ti mewene wemaisy.
15 Amisy Winyirati Akari Titi naito munijo ntiti,
wintuna no munijo Manunggara, syare nsakina de muno Nyo reansaeno ana mo reansakupi so rai!
Syare Nyo angguri moto ndantet, omirati Israel, reansayaranande.
16 Taune Winyirati Nyo reama aneno Israel matayao maisyare Nyo angguri mote rantete wemaisy,
muno Nyo ama kamino wanyine raveti mbambunin.
17 Weramu soamo reama marova wo raotar bintabo muno wo taname veano ramer,
weti syare Nya pari mangke veano reama marova umaso maupaeta ra makanive!
18 Syare Nyo Nya kawasae nanuga no maije reansayaranande,
weye reamamo vatano Nyo reansatayao terave namarom to.
19 Weti indati reamusya marambe Winai jakato ramu.
Syare Nyo kovo wanyine raude reansai, weamo indati reangkangkamambe Nya tame rai.
20 AMISY, Winyirati Amisy Akari Titi naito munijo ntiti,
reamare Nyo anakotare raveramu ngkovo reansai maisyare arono wusyine wemaisy akato.
Reamare Nya kove mbaro reansai, wirati indamu reampaya irati kakai rai.