65
Kove raura seo Amisye Ai weye muinyo wansai ti wama nawaisye ama ine manui
1 Masmur Daud po ratoe. Ransyeran. Nto irati akari po vatano matayao ukiny maugavo ransyerane rai ai.
2 Reama Amisy, reangkakamambe Nai no munijo Sion omamo mamaisy,
muno reama urairijo reandaokae nande Winaije mamo reandaveti mamaisy.
3 Indati vatan tenambe ude Nai,
weye Winyirati Nyo anakotaro reandanajo raveti mamaisy.
4 Arono rui reama ayao kakai manakoe ti mangkeo reansai rave,
weamo Winyirati Nyo rapaya irati reansai.
5 Kove ngkov irati vatano taune Nyo matayao terave mai,
muno Nyo mawain ti ude umararai indamu una no Nya Yavar!
Reaman irati Nya kove rai no Nya Yavare ama uga,
no Nya Yavaro ndandinit.
6 Winyo reama ana ndanajo raunande reansai mbe anaanibe rave mamaisyo Nya moyare rai,
Winyirati Amisy Nyo reansapaya anakotaro ngkakai rai.
Winyirati susye kotaro mine so mansanaveano namen,
ti muija nto nupatimu nggwaravainye rai janyi muno munije ama mamarane rai tenambe.
7 Winyo unate raveseo nsayae tindimuve irati Nya vambunine rai,
mbe rarorombe Winyi Nya vambunine manakoe rave.
8 Winyi Nyo mayane ama rarene muno ranauni mpanyoane rapamo akasyo ti ntanamanin,
muno Nyo susye kotaro usea maugananave mapamo tavon.
9 Maisyare omaiti vatan tenambe mine tename so
wo Nya ana ndaveti mbe anaanibe umaso raen ti ujaniv.
Nai ranijo muram ti nto no ranijo varet,
Winyo anayanambe raude mai ti ukiny mananibe.
10 Wimbekobe kopa so rai, muno Nyo maruge raugaje rai ti anare kotare ama ine raivuve.
Amisy Winya mana njam tutir,
Winyo anare raveti ntubai ti ntuna mawebe vatane mai,
tugae, Winyo ratayao ti mawe dave.
11 Winyo maruge raugaje ti nsaakopo awa kopa wo rakarore rai janyi,
muno Nyo mana raugaje ti nsaakopo kopa ngkanembe rai.
Winyo maruge veano kopa ngkarendene randami ti ngkov dave,
Nyo kove raugaje anare rai ti ama tuba ngkarimu sen muno ntubai ngkov dave.
12 Nya kove omirati tume yanteteramo wo awa anamuke ama mane ranugane manui rave,
munije rui mirati Nyo ratakaramo, anakotaro ngkove ntairi rai.
13 Ama anoke mainyamo ntairijo insumai njayaibe rai,
papukame ama anakotaro ntubai rai mo vatane maveti manayanambe rai.
14 Anoko insumai njayaibe umaso mamo maero kambin muno domba ntairi rai,
muno ama pate mainyamo kasyambere mo ratatuv,
weti papukame, anoke muno papate mananibe muno ukinyo ama kove rai.