55
Amisye anajo indamu no wansaora irati marova mai
1 Daud apa ransyerano ananyao. Nto irati akari po vatano matayao ukiny maugavo ransyerane rai ai. Ukinyo rai, wo itari raeyan dai.
2 Sya Amisy, syare namarikoame rasakinavo sya sambaya rai,
vemo winakirive sya ana danajo ore so rai jinya.
3 Syare Nyo rinaraniv muno Nyo sya ana danajo ore so ravera mamaisy!
Rinanuga nseo majeve muno syoyov weye rino ana nsosobe rai.
4 Weye sya marova ugwain akoeve ware wo inatondobe
muno vatano mamune wo inatawanto.
Muno wo rinansewabe,
muno upari ti umarovave rinai.
5 Inanuga so ntutar,
weye yanivo wene mo inakukupi ti inanakea uga ntararai.
6 Yanive mo inaveti tutar,
ijanivo wene mo inatatuv asyo.
7 Weti syo ratantona syare: ‘‘Ranivara sya pepake no rinai,
maisyare insani puname amaisy datire,
ibadirir ti to syo munijo ntanamanine rakani.
8 Tugae, weamo ibadirir ti to nggwaravainy dave ije,
indamu ito no no anoko kanen anamainitu rai.
9 Syavave syo varoro inamamavube rai rakani,
risarar rito kokaibe irati marova awa panyoano
maisyare ovar akoe tipu ti po inarone wemaisye rai.’’
10 Sya Akoe, syare Nyo sya marova maveramu wananepabe, Nyo awa ana udatore rangkaunanive,
weye syo raen no muni so maugaje nsivuiny muno wo arare rave.
11 Namane rinit wo munije umaso rakijani, ntuna ntoabe yano orame ama vone rai,
muno munije ama uga rai, inta wanakakaive muno wo ivuinye rave tutir.
12 No muni so ama uga raita, wo siurije muno ana nsosobe raugavere rai,
wo vatane matawanto muno wo maponae anyi no pasari.
13 Ranivara sya marova mawakea vivibe rinai,
weamo inatawandi rai.
Ranivara vatano manuga mamuno rinai nanawirati mararin ware wo rinakivan,
weamo rito no marambe mai yaje.
14 Weramu sya arakovo imanivuvive winy,
imanya kava muno syanave nai rave,
winyirati nyo inave tatugadi.
15 Wusyinoeamo ingkavave,
muno inta kava no Yavar Amisy no vatano wanui awa yasyin.
16 Koveamo wene mo sya marova maunto papabe tenambe,
mo mansaunto jayaibe asyo no amani.
Weye mansanuga mamune obo mirati no mansai,
no awa yavaruga.
17 Weramu risyamo syo Amisye awain,
muno indati AMISY Po rinapaya irati sya marova mai.
18 Namane rinit, syanonae akoeve muno syoyov,
muno Opamo Po sya oyove raraniv.
19 Sya marova udaran ti ude umarovave rinai,
muno maroyaro rinai,
weramu Amisye Po inapaya mai ti rino kovo saumane rai.
20 Amisye Opirati be akarive no nugo pitawarowe,
indati Po sya ana danajo raraniv muno Po mapinde.
Weye wonae usakinavo awa ana udaveti ngkakai raiji,
muno wo Amisye asyanive ramu.
21 Sya arakovo rimanivuvive umawe sarirae ti be marovave
apa arakovo wusyinoeamo ube arakobe mansai jakato,
po apa urairijo mo maokaisye rakanyoandi.
22 Awa mamo manavan dave,
weramu anuga mamo kakai mi po ratantona rai.
Apa ana datore mamo mani nsaawa rai rave,
weramu omamo maisyare weyamo po rave inaugake wemaisy.
23 Nya anakotaro nanuga mamauno rai mamo ndaugave to no AMISY Nui,
weamo indati Po sopambe nai.
Weye vatano ubeto Ai nanawamo,
Po mapaya ra awa marova wo mapinde jewen.
24 Yara vatano maneme nijam
muno wayarurijabe nanawamo
indati awa tume raotar aje tumaimbe.
Weye sya Amisy, indati Nyo mapinto atem mamai raito.
Yara risyamo syanave Winai.