53
Vatane awa ana udave ngkakainoanive
1 Daud apa ransyerano ananyao. Mamaisyo ransyeran ‘‘Mahalat’’ rai. Nto irati akari po vatano matayao ukiny maugavo ransyerane rai ai.
2 Vatano wantatukambe wo raura no manuga ware: ‘‘Amisye Pa inta no ramu.’’
Awa ana udave mamo mamun muno ngkakainoanive
vatan inta po ana ngkove rave ramu.
3 No munijo Manunggara Amisy tuna Po vatan tenambe mansanyanyut,
indamu Po mansaen vatane inta apa ana datantona ntiti no aija rako,
muno beaje Aija nene rako.
4 Weramu vatan tenambe makirive Ai,
wenao tenambe awa ana udave ngkakainoanive.
Vatan inta po ana ngkove rave ramu,
vatan inta mamaisye jewen bayave.
5 Amisy pare: ‘‘Vatano awa ana udave mamune so nanawamo
awa ana udatantona no maija rako, jewena e?
Wenanawamo wo Sya kawasae Syo matayao mave tatugadi,
muno wonae usambayambe Rinaiji.’’
6 Indati vatano mamune umaso ujaniv dave,
ujanive somamo mo awa wusyino ujanibe rakivan.
Weye Amisye pare Po Israel wapa marova maubaisy muno Po manasine rakupi,
wenawamo indati wapo mapinde muno wapo mave samaneve,
weye Amisye ponae mai.
7 Syare koveamo Amisy Wepi no no Sion de Po Israel mapaya vatano mamune mai!
Arono rui Amisy Po kovo ngko dave raugav akare Apa kawasae mai,
Weamo indati Yakop apa susyo Israel mananibe.