35
Amisye anajo indamu no wansaora irati marova mai
1 Masmur Daud po ratoe.
Sya AMISY, syare winaroyaro vatano maroyaro rinai so mai,
wimarovave irati vatano umarovave rinaije mai.
2 Syare Nyo Nya vakano mamaune me anakoe me yaijaro tindimuve,
muno nseo ra nde Nyo sopambe rinai.
3 Winyo weame muno tama raijaseo,
indamu naroyaro vatano wo inangkarimuge so mai.
Syare Amisye Winyo raurade rinai, nyare:
‘‘Risyirati AMISY, Syo napaya irati kakaije rai.’’
4 Koveamo vatano ware wo rinaubaisye nawamo,
indati usamane muno awa tame ngkakai.
Koveamo vatano wo kakai ratantona rinai
wansuk akiri muno wananepabe.
5 Koveamo onawamo maisyare kapumo ovare po ransaonto wemaisy,
muno naito AMISY Po mansamayo rijat.
6 Koveamo wo unanuijo nsaremo ngkaumudi raronto wemaisy,
muno naito AMISY Po mangkarimu rijat.
7 Weye ana inta mbe ayaobe rinai ramu, weramu wo isyeane ratugar ti mo rinaman,
umba wo ateme rawae ti mo rinaman.
8 Koveamo wene nde mai papabe vayave,
koveamo taune usawa awa isyeano wo ratugare rai,
muno utatayasyo atemo wo rawae rai weti ugwenen dai.
9 Weti rinanayanambe weye AMISY Nya vambunine raroron,
muno rinananibe weye Winyo rinapaya irati kakai umaso rai.
10 Inanuga ntenami syo raura, syare: ‘‘AMISY, Winyamo inta po namaisye ramu!
Winyirati Nyo vatano mayondi apaya irati vatano bambunine ai.
Muno Nyo vatano atawanto muno apa ana jajewembe ai apaya irati vatano wo ananuge raowenta mai.’’
11 Vatano mamune ubeseo, wangkarive ware wo ana ngkakai inta raeno rinai,
wo rinantutibe ana idaene jewene rai.
12 Sya ana daveti ngkove mamo wo rasakinavo kakai rai,
weti rinanimaumbe mo inatatuv asyo.
13 Weramu arono wenawa ujajoram,
risyamo rinanimaumbe mai, weti inatawandi marore rai,
muno syo mana raijame jewen yara syo ansuno wusyine obo rave.
Umba inami ratu syo sya sambaya raura seo Amisye Ai,
14 maisyare risambayambe sya arakovo taun dave ai rako,
sya arakovo ingkavave inta ai wemaisy.
Risyoyovo mansai
maisyare inanimaumbe sya ingkoa rai wemaisy.
15 Weramu arono rino ana nsosobe ama uga rai,
onawamo manayanambe muno wanugan tenambe umarovave rinai.
Vatano syantatukambe mai nao,
wo kaipate ko rinai tutir.
16 Vatano ubeta Amisye Ai jewene umaso wo inaura tantunawi tutir,
matomokane ntitiki nande rinai.
17 Sya Akoe Winy, Winyo rinanyanyut bayavea ntoa nanduija?
Syare Nyo inapaya vatano maroyaro rinai ti ware wo inakupi so mai,
syare Nyo rinapaya sya marova maisyare make sivuiny dave so mai!
18 Wea indati syo kove raura seo Nai no anugan akoe awa yasyin,
syo winararimbe no vatano wanui mansamun.
19 Vemo winaneme mpaya rinai mo sya marova wo rinambaone umananibe inya,
syo ana inta ravera ngkakai jewen, weramu onawamo umarovave rinai vayave.
Vemo nakirive rinai mo vatane umaso wugoeno rinai jinya,
sya ana dave inta ngkakai jewen, weramu onawamo manuga mamuno rinai vayave.
20 Weye awa ayao mamo nsaumane jewen,
yara ubeker ware wo vatano una kovo saumane rai no munije so mansapamponae.
21 Ugwain wo rinakekebe ware:
‘‘Ko dave, ko dave, umba reamo nya ana ndave raeno reansami rai ije.’’
22 Weramu AMISY, Winyo raen to,
weti vemo manin bayave inya;
sya Akoe Winy, vemo Winy nggwaravainyo rinai jinya.
23 Wimbeseo ra Nyo marimbe rinai!
Amisy, sya Akoe Winy, syare Nyo sopambe rinai weye wo ayao rangkivano rinai.
24 AMISY, Winyirati sya Amisy,
syare Nyo patimu moyare raude rinai,
indamu vemo sya marova woaro rinai jinya.
25 Vemo wo rinaura no manuga ware:
‘‘Ko dave! Reama mbekere mamai to,
reamo anasineko ai to!’’ wemai nora.
26 Koveamo vatano manayanambe sya siuri so rai nawamo,
wananepabe muno usamane.
Koveamo vatano umararino rinai nawamo,
vatano kaije wo mavororobe indamu usamane.
27 Syare koveamo vatano ubekero wo rinaeno patimu moyare raugaje rinaije,
umananibe muno ugwain manayanambe.
Koveamo wo raura tutir ware: ‘‘AMISY ararimbe! Opirati titi rave!
Wepi anayanambe Po kovo saumane raude irati Apa vatano panapatambe Aije ai.’’
28 Weamo indati risyo Nya moyare ravov,
muno rikangkamambe Winai namane rinit.