33
Kangkaman raura seo irati Amisye Ai
1 Inya, vatano wabeta AMISY Ai weap,
wasanamote raijaseo wasanuga rananibe rautan!
Weye vatano utavondi AMISY Apa bekere rai wo ararimbe omamo mamaisy.
2 Kove raura seo AMISY Ai, wapo itarijo mamaune raeyan dai,
wakinyo ransyerane raijo Ai, wapo itari anakoe ama wai abusyine raeyan dai.
3 Wakinyo ransyeran wanyine raijo Ai,
wapo itarije raeyan da ngko dave rai muno wasanamote raijaseo manakoeve wasananibe rautan.
4 Weye AMISY Apa ayao mamo tugae,
Apa anakotar tenambe Po rave mamo mamaisyo Apa urairi rai.
5 Opamo anuga no irati ana mamaisye muno moyare rai,
mine so ntairi jirati AMISY Apa muinyo no tawane rai.
6 AMISY Po raura awa obo rai, weamo naume no,
muno anamote obom, weamo naume ama anakotaro ntuna rai no tenambe.
7 Po mana mayane ransop ti ntuna varore intai,
Po nawanane raugaje ntami ama ntento rai.
8 Koveamo vatano munije tename so wo AMISY asyaniv,
koveamo vatano mine tename so ntarurandi no Amun muno ubeaje Ai.
9 Weye Po raura awa obo rai, weamo anakotare no tenambe,
muno Po Apa ayao raugaje, weamo anakotare no tindimuve kobe.
10 AMISY Po susyo wanave Ai jewene awa anakotaro wo ratantona ransopi vintabo,
Wepi Po susye kotare awa anakotaro manatantonave raije raorai.
11 Yara AMISY taune Apa anakotaro Po ratantona mamo no tawan ntoa nuge nuganui,
muno Apa bekero Po ratantona no anuga rai mamo manya tutiro nugo merere nto rai.
12 Kove ngkov irati susyo are nawirati wo AMISY aura ware Opamo awa Amisye Pije,
onawamo Apa kawasae Po matayao terave indamu Apa ura maija ntoa nuge nuganui.
13 No munijo Manunggara, AMISY ami ntami munije tename so rai,
Po vatan tenambe mine tename so mansanyanyut.
14 Nai Apa tuna ri rai,
ami ntetero vatan tenambe ntuna no mine so mai.
15 Wepirati Po vatane mansanuga ranari tenambe,
muno Po awa anakotaro udave raen tenambe.
16 Akari titi inta apa naite wanui rave kai, weramu wemi mo anasineko raunande ai ramu.
Naito anaaniv kakui inta dave kai, weramu apa vambunine mamo mo apaya marova aneme raije ramu.
17 Kuda marova pamo umba ta mamaisye jewen kobe anaveano amen indamu po anasineko raunande aiji,
opamo bambunin dave kai, weramu mamaisyo po apaya marova aneme raije ramu.
18 Tugae rave, AMISY opamo Po vatano wo asyanive mansayaranande tutir,
onawamo vatano manaveano Apa muinyo no tawane ramen.
19 Indamu Po awa jugara apaya irati wene rai,
muno Po mansakum arono marore tami.
20 Weti wamo AMISY anyut weye wamanave tugaeve Ai,
Wepi Po wansayaranande muno darino wansaora.
21 Wansananibe Amisye Ai weye Po anakotare raveti ngkovo wansai,
muno Apa tamo ndandinite mirati wansanaveano ramen.
22 AMISY, syare Nya muinyo no tawane mamo ntavono reansai tutir,
weye Wibuiny irati reansanaveano namen.