18
Kove raura seo Amisye Ai weye Po inapaya sya marova mai
1 Masmur Daud, wepirati vatano panapatambe AMISY Ai, po ratoe. Nto irati akari po vatano matayao ukiny maugavo ransyerane rai ai. Ransyerane somamo Daud kinyo raijo AMISY Ai, arono AMISY Po apaya marova mai tenambe, muno akarijo Saul anem uga rai.
2 Sya AMISY, rimuinyo Nai,
Winyirati sya vambunine nsawa Nai.
3 AMISY Opirati sya unato oram muno yano no inaora, Opirati Po rinapaya irati kakai rai.
Sya Amisye Opirati sya unato oram inamamavube Ai.
Opamo maisyare vakano no rinaora, muno Opamo bambunin Po rinapaya irati kakai rai.
Opirati sya yano oram ntiti rinino aowan.
4 AMISY Opirati mamaisyo aura titive;
syo awain umba Po rinapaya irati marova mai.
5 Risyamo waijo wene mo inapaka to,
muno wene mo inaunto maisyare manayame nsepadi rinai to wemaisy.
6 Waijo amani mo rinapapakai to,
muno wene mo inaman maisyare aviri ratugar ti mo inaman no sya usye wemaisy.
7 Arono rino ana nsosobe ama uga rai, syo AMISY awain,
syanonaeto Amisye Ai indamu Po sopambe rinai.
No no Apa yavaro tuna ri Po inanamote ranaun,
muno Po risya ana syo ranonae seo Aije raraniv muno Po rinasopan.
8 Umba mine tename so mangkiki muno raunuve,
muno unate mantaun masyo no ama ate waraya muno ntutar,
weye Amisye Apa pari mangke mbadurur.
9 Apa pari umaso maisyare kijao ntutupo atumateme raide,
tanamo mbadurure muje no awa rai,
muno neno nsundive muje rai tavon.
10 Po naume raporar ti paje kobe,
paje te no andoramo naaman dave ama vone rai.
11 Seo tuna naito Amisy kerub ai weti badirir de,
ovare po amawisy ti pavave de maisyare insani apa pepako mbadiriro autane wemaisy.
12 Po nugo naamane raijaro aora,
andorame muno maruge wenairati maisyare randumo no aora wemaisy.
13 Weramu nai taune amunamo vare ntami,
muno andorame muje raijo marugo esije me tanamo nsundive me rautan.
14 Umba AMISY anamote ravari no naume warae;
AMISY Titi Rave anamote ngkinde ti ranaun.
15 Wepi Po ato veano marova maivuiny weti mpusyek tatugadi,
omamo ivako Po ratatukande ti rantebai tutiro mai ti mo maungkananive.
16 Naije mayane mamo eravo anawadi to no ate waraya,
mine so ama ajijo mo ratugare raeno kakavimbe.
Weye sya AMISY, Winyo sya marova mansaneneno soowabe,
muno nanawayo parije veano mapuar.
17 Amisy Wepi tuna no Manunggara, aneme rareande Po inaijaseo,
Po inakarimu sen no ana mo inatawanto,
maisyare manayam akoe inta ama vambunine ramaisye rai.
18 Wepi Po inapaya irati sya marova ubambunin dave mai,
muno vatano manuga mamuno rinaije mai,
weye wenawamo awa vambuninen mo inakivan.
19 Onawamo maroyaro rinai arono ana nsosobe mo inakep,
weramu AMISY Po sopambe rinai.
20 Opirati Po inapaato no varoro ntanenae rai,
muno Po inapaya irati ana ngkakai rai weye Opamo anayanambe rinai.
21 AMISY Po kove rasakinavo rinai mamaisyo sya ana daveti ngkove rai,
muno Po kove raugaje rinai weye syo ana inta ravera ngkakai ramu.
22 Weye risyamo ritavondi tutiro AMISY Apa unanuije rai,
muno rinakirive Aije ramu.
23 Weye risyamo ibeto Apa anaparatote rai tenambe,
muno Apa ananyao mamo idapaya ra ntami ramu.
24 Risyamo syo ana inta ravera nggwambe no Amune rai ramu,
muno inanasine so raisyisyi ana ngkakainoanive rai.
25 Weti AMISY Po kove rasakinavo rinai mamaisyo sya ana daveti ngkove rai,
muno Po kove raugaje rinai weye syo ana inta ravera ngkakai no Amune rai ramu.
26 Sya Amisy, nde irati vatano matawandi utavondi Nya ananyao raije mai, winteto Nya urairi raijo mai;
muno nde irati vatano manuga nsarokire mai, Winyamo nanuga nsarokire rarorono mai.
27 Nde irati vatano manuga ndandinite mai, Winyo Nya nanuga ndandinite rarorono mai,
yara nde irati vatano wo kakai ratantona mai, Winyo namuno nsansinao rarorono mai.
28 Susyo matawanto nawamo Winyo mapaya irati rai,
yara vatano umararine nawamo Nyo maveaje.
29 AMISY, Winyirati Nyo vare raugaje rinai maisyare yawainyo mbaro rinai wemaisy,
sya Amisy, wimbaro kaumudi no rinakijani so rai.
30 Weye Winyirati Nyo vambunine raugaje rinai ti inaroyaro marova mai,
muno sya Amisy Nya vambunino mo inasopane mirati syo sya marova maukir ti risiso no awa munije rai.
31 Amisye Apa ana dave mamo mamai dave,
Amisye Apa urairi mamo mamai dave ti anave rai,
Opirati vakano darino vatan tenambe ude mansamamavube Aije maora.
32 Weye AMISY obo Pirati wama Amisye Pije,
Amisy obo Pirati wama unato oram wansamamavube Ai pije.
33 Wepirati Amisy, Po vambunine raunande wansai,
muno Po inaugavo unanui syanya raije raito kovo saumane rautan.
34 Wepi Po inajo raveti ndaradam, maisyare rusa ajo ndaradam ti po raansandi wemaisy,
muno Po inapaato no mariraave no unato ntiti rai, weti marova wo inaubaisye jewen.
35 Wepi Po inanyao irati marova rave rai,
weti ribambunin syo apae moto tembaga mpanyoane raivit.
36 Sya Amisy, Winyi Nyo rinapaya irati sya marova mai,
maisyare Nyo vakane raunande indamu no irati rinaora wemaisy.
Nanem ngkov vambunine wemi mo inasopan,
muno wimbekobe rinai weti umba syo anasineko.
37 Winyi Nyo varoro maneka ratayao rinai no marova ama uga rai,
weti ritet tawan ti rimarovave tutir, yara ritende jewen.
38 Syo sya marova mawatan ti syo maijar,
muno syo maotada mewen dainyamo syansop akare ramu.
39 Syo kaipate ko mai ti wakaeyove akato kakai,
wenawamo ntarurandi ti ntuna no inajo ate rai.
40 Weye Winyirati Nyo vambunine raunande rinai indamu risiso marova rai,
weti sya marova nawamo Nyo mataopon bintabo no inanem ate rai.
41 Winyi mbewaramo syo anasineko sya marova mai, ti wansuk unanajibe,
muno vatano manuga mamuno rinai umaso nawamo syo mao bintabo.
42 Ugwain wanonae, weramu vatane inta ude wo sopambe mai ramu,
wenawamo wanonaeto AMISY Ai, weramu Po maranive ramu.
43 Syo maakoyandija ngkupi ti ntuna maisyare kapumo ovare damawisyamo nsaone wemaisy,
muno syo kamumu tawano mai ti mparakami maisyare kopa mparadakambe no unanui wemaisy.
44 Winyi Nyo inapaya irati sya kawasaeyo wonae ubeta rinai mai,
muno Winyo inaijaseo ti ibe akariveo susyo mato siso Israel mai jewene mai tavon,
weti soamo syo vatano syantukambe maije mave anakebe no inanem ate rai.
45 Vatano marane umaso ubeaje irati rinai,
muno sya ayao idaugaje mamo wo ranaun ubeta rai kobe.
46 Vatano marane umaso awa mangkakeraive raumandi mai to,
wenawamo ututar wuje irati awa varoro ukaokaibe raije raora.
47 Tugae! AMISY Opamo jayaisy tutir!
Opirati sya unato oram inamamavube Ai, ti syo ararimbe.
Kangkamambe Amisye Ai, Wepirati Po inapaya kakai rai!
48 Amisye Pi Po kakai rasakinavo sya marova mai,
Wepi Po susye kotare maveaje ntuna no inanem ate rai.
49 Amisy, Winyi Nyo inapaya irati sya marova mai,
muno Winyi Nyo anasineko raunande rinai irati vatano umarovave rinai mai,
Winyi Nyo inapaya irati vatano usivuiny dave mai.
50 Maisyare omaiti, sya AMISY, syare syo kove raura seo Nai no susye kotare so awa yasyin,
muno rikiny kangkamambe Nya tame rai.
51 Winyo vambunine raunande akari titi Nyo aijaseo ai, weti po anasineko.
Muno Nyo Nya muinyo no tawane rarorono vatano Nyo atayao terave indamu be akarive umaso ai,
opamo Daud muno apa susyo merere nto maija ntoa nuge nuganui.