☰ MASMUR 15
15
Vatano mamaisyo de no AMISY Ai
1 Masmur Daud po ratoe.
 
AMISY, are pirati Nyo amayaro de siso no Nya randumo sambaya* rai?
Umba are pirati Nyo amayaro no natavon no Nya unato ndandinit† rai?
2 Wepamo vatano ana ngkakaije inta raeno ai jewen,‡
muno po ana mamai dave obo rave,§
muno po ayao tugae obo raura anuga kakui rautan.
3 Wepamo po apa vatane maura tantunawi jewen,
muno panakakaive irati apa arakove mai jewen
muno po yavaruga kaije maura tatugadi jewen tavon.
4 Wepamo po vatano AMISY ponae mansai, matantona titive jewen,
yara po vatano ubeta AMISY Ai matantona titive.
Muno vatane so teto apa urairi rai tawan kobe.
Ranivara nanto ana nsosobe inta rai weamo akirive apa urairi umaso raije ramu.
5 Wepamo apa arakove inta po doije inta augavo arijat,
pare ranijan akare mamaisyo po raugave bo rai,
yara ama nako nseo raija datavone mamo pare jewen kai.
Muno wepamo vatano po doijo yanyano rawatambe
indamu vemo ama mangke makare vatano mamaisye po ranawan inya.
 
Vatano apa ana dave mamai tenambe maisyare so,
wepamo indati teto tindimuve tawan ntoa nuge nuganui.
* 15:1 Randumo sambaya somamo mo wama randumo no no naiso ramaisye ramu. Yara Israel awa randumo no no ratuije mamo wo maero domba muno kambine awa kea wemi wo rave randumbe, omamo Akari Titi Daud wepi po ransano vayave ra usambayambe rai ma. 2Sam. 6:12-17 † 15:1 Nya unato ndandinit omamo unato Sion no no Yerusalem, Yavaro Amisye ntuna rije. ‡ 15:2 Apa ana dave tai maisy weti vatane wanaikebe ai kakai. § 15:2 Mamai dave weye mamaisyo Amisye Apa ananyao rai.
☰